Rusizi: Uruganda rw’icyayi rwa Shagasha rugiye kwegurirwa abahinzi

Yanditswe na Sitio Ndoli
Kuya 13 Ugushyingo 2017 saa 07:17
Yasuwe :
0 0

Ikigo cy’Igihugu gishinzwe kohereza mu mahanga ibikomoka ku buhinzi mu Rwanda (NAEB) cyatangaje ko uruganda rw’icyayi rwa Shagasha ruherereye mu Karere ka Rusizi ruzegurirwa abahinzi b’icyayi mu gihe kiri imbere.

Hashize imyaka irenga itatu urwo ruganda rweguriwe umushoramari Sir Ian Hood. Kuri ubu rutunganya toni icyenda z’ibibabi by’icyayi mu mwaka.

Umuyobozi wa NAEB, Kayonga William, yasobanuye ko uruganda rwashyizwe mu maboko y’umushoramari hagamijwe kubanza kurushyira ku rwego rwiza ruzungukira abaturage, ariko igihe nikigera rukazahabwa abahinzi.

Yagize ati “Leta yarumweguriye mu 2012 mu mpera zawo, uyu ni umwaka wa kane; yarumugurishije rutameze neza rucyeneye kuvugururwa, yaba ari imashini , yaba aho duhagaze aha ngaha (mu ruganda ) ndetse n’imirima icyeneye igishoro cy’amafaranga kugira ngo rugere ku rwego rushimishije. Icyo tumushimira, uburyo iri shoramari ryakozwe, ntabwo ryari rigamije inyungu kandi yari igamije kugira ngo habeho gusana uruganda, gusana imirima, habeho gutunganya umusaruro mu bwinshi no mu bwiza.”

Uruganda ruzegurirwa abahinzi bagera ku 4500, bahabwe imigabane ingana na 90% naho Leta isigaranemo 10 %.

Abahinzi bishimira kuba bagiye kuzegurirwa uruganda rw’icyayi ndetse bakemeza ko aribwo bazarushaho kurucunga neza.

Nyirahategikimana Judith ati “Mbere y’umushoramari twarasoromaga amafaranga tukabona nta kintu atumariye, yari make cyane ndetse abantu bari batangiye kukirandura ariko aho umushoramari aziye turi gushishikarizwa kugihinga tuzarushaho kurucunga nibarutwegurira, ni byo byiza rwose.”

Hakizimana Anthere wo mu Murenge wa Nyakarenzo muri Rusizi yunzemo ati “Inyungu dufite kuri uyu mushoramari ni uko mbere batwibaga kubera iminzani mibi ariko nabwo natwe nibaruduha tuzarucunga neza nta kibazo ahubwo nibyo byiza abe ari twe twishyiriraho ubuyobozi.”

Inzira yo gushyira uru ruganda mu maboko y’abaturage yatangiye, haherewe kuri gahunda yo kubahugura kugira ngo bazaruhabwe mu gihe cy’imyaka itanu iri mbere bamaze guhugukirwa n’imikorere yarwo.

Uruganda rw’icyayi rwa Shagasha
Abahinzi bishimira ko uruganda rugiye kubegurirwa
Abahinzi bagiye kwegurirwa uruganda rw'icyayi rwa Shagasha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza