Abikorera baciriritse bataka ko kugera ku nguzanyo ya banki ari ingorabahizi

Yanditswe na Jean Pierre Tuyisenge
Kuya 19 Ukwakira 2017 saa 04:58
Yasuwe :
0 0

Bamwe mu bafite ibigo bito n’ibiciriritse bagaragaraza ko impamvu babishinga ntibikomere cyagwa bikagwa bidateye kabiri harimo imbogamizi zirimo umwanya bitwara kugira ngo usaba inguzanyo muri banki ayihabwe.

Ni imbogamizi abahura nazo bavuga ko zishobora kubasubiza inyuma ndetse zikadindiza ibikorwa byabo, hakaba n’abahitamo kubihagarika bitewe no kubura ubushobozi.

Ibyo bishobora kumvikana cyane cyane mu bakurikiranira hafi iby’ubukungu kuko ikibazo cy’ibigo by’imari bito n’ibiciriritse bihomba bigifungura kimaze iminsi kivugwa cyane mu Rwanda. Ubushakashatsi bwakozwe n’ikigo cy’igihugu cy’ibarurishamibare (NISR) mu 2014 bwagaragaje ko 50% y’ibigo by’imari bihomba bitarakomera.

Twahirwa Dieudonné ufite ikigo cyohereza mu mahanga urusenda, avuga ko ibigo by’imari bihari ndetse hakaba hari n’ibyashyizweho kugira ngo bifashe abashaka amafaranga ariko ikibazo kikaba ari igihe bifata kugira umuntu agere nguzanyo.

Yagize ati “Ibintu bikigoranye muri ibyo ni uko inzira ari ndende kugira ngo ugere kuri ibyo byose, kubona umwanya wo kubyirukamo no kugira ngo ubone umwanya wo gukora kandi nk’uko mubizi tuba turi ibigo bigitangira ntabwo uba ufite abakozi benshi bo kwirirwa babyirukankamo, kandi hari usanga ari wowe ubikora gusa, ibigo bifasha ba rwiyemezamirimo kubona amafaranga birahari ariko ikibazo ushobora gutangira kubyirukamo umwaka ukarinda urangira utarayibona.”

Avuga ko hari utangira kwiruka ku mafaranga yazamubera igishoro nyamara bika byamufata nk’umwaka wose, bigatuma acika intege.

Gusa nubwo abafite byo bigo bavuga gutyo, abatanga inguzanyo babanenga ubumenyi n’ubushobozi buke mu bikorwa byabo harimo no gutegura imishinga.

Umukozi mu kigo gifasha ba rwiyemezamirimo kugera ku mari (Access to Finance, Iyacu Jean Bosco, yanenze ko hari abatangira ibikorwa by’ubucuruzi badafite amakuru kuri byo ndetse nta n’ubumenyi bufatika bafite.

Yagize ati “Hari imishinga mu by’ukuri itanoze hakabamo n’ubushobozi bwo gucunga ishoramari umuntu afite kuko usanga bamwe batanafite aho bandika ibyinjiye n’ibisohoka n’inyungu, yajya kuri banki yabibabwira mu magambo ntabwo bashobora kubyumva, wakagombye kuba ukora ibaruramari rihamye ku buryo baza bakabibona.”

Ibyo bibazo ni bimwe mu byatumye Minisiteri y’Ubucuruzi n’Inganda (MINICOM) ihuriza hamwe abafie ibyo bigo, ibigo by’imari, abaterankunga n’abandi bafite aho bahuriye n’iterambere ry’ibigo bito n’ibiciriritse kugira ngo harebwe icyakorwa kugira ngo imbogamizi zihari zikurweho mu buryo burambye.

Umuyobozi ushinzwe gahunda zo guhanga imirimo muri MINICOM, Niyomutabazi Germain, yavuze ko bahuje inama ngo barebe igituma ibigo by’imari bito n’ibiciriritse bihomba n’umuti wavugutirwa icyo kibazo.

Yagize ati “Ubu twahujwe by’umwihariko no kurebera hamwe ikibazo cyo kugera ku mafaranga kuko nicyo usanga ahanini abantu bagiye bagaragaza; aha turahava tujyanye ingamba zizafasha leta mu gutegura gahunda zifatika zo guhangana n’icyo kibazo, imyanzuro iva hano izadufasha kugira ngo twese turebe uko ikibazo cy’ibigo bito n’ibiciriritse byatera imbere.”

Kugeza ubu ibigo by’ubucuruzi bito n’ibiciriritse nk’uko ubushakashatsi bwakozwe mu 2014 bubigaragaza bigize 98% by’ibigo byose mu Rwanda bibarirwa mu bihumbi 154.

MINICOM ivuga ko kugeza ubu ibigo by’imari bito n’ibiciriritse biha akazi Abanyarwanda bagera kuri 41%, ikavuga ko ari ho ihera ishaka kurushaho kubiteza imbere.

Umukozi mu kigo gifasha ba rwiyemezamirimo kugera ku mari ( Access to Finance), Jean Bosco Iyacu

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza