Hilton yaba yarasahuriye mu nduru z’abanyamigabane ikigarurira Ubumwe Grande Hotel?

Yanditswe na Herve Ugirumukunda
Kuya 16 Ukwakira 2017 saa 09:40
Yasuwe :
0 0

Mu ntangiriro z’Ukwakira 2017, nibwo inkuru yasakaye ko Hilton, icyamamare mu gucunga amahoteli, igiye gutangira gucunga Ubumwe Grande Hotel, imwe mu zikomeye ziri hagati mu Mujyi wa Kigali.

-  Mbere yo kwitwa Ubumwe Grande Hotel, yagombaga guhabwa izina rya Zinc Hotel

-  Amakimbirane yadutse mu banyamigane hoteli itarafungura imiryango

-  Mu kuyegurira Hilton, umunya-Nepal, Binod Chaudary, ufitemo imigabane myinshi avuga ko atigeze amenyeshwa

-  Aracyafite ubushake bwo gushora imari mu Rwanda no mu Karere nubwo atahiriwe n’ishoramari rya mbere yahakoreye

Ubumwe Grande ni hoteli yafunguwe muri Nzeri 2016, ifite ibyumba 153 birimo 134 by’abashyitsi na 19 byo guturamo. Hilton ivuga ko izakora impinduka kugira ngo iyihindurire izina, maze yitwe Double Tree by Hilton Kigali City Centre.

Ba nyiri Ubumwe Grande bamaze igihe badacana uwaka

Iyi hoteli ijya gutangira yitwaga Zinc Hotel, ifite agaciro ka miliyoni 40 z’amadorali ya Amerika. Abanyamigabane bayo ni Ikigo CG Corp Global cya Binod Chaudhary, umugabo ukize kurusha abandi muri Nepal, wari no gukora imirimo yo kuyicunga mu gihe cy’imyaka 15 na Mukwano Group, bombi bafite imigabane 80%. Undi ni Robert Bapfakurera ufite imigabane ingana na 20%.

Izina Zinc, ryari ryihariwe n’uwo muherwe wo muri Nepal kubera ko afite n’andi mahoteli menshi yitwa atyo hirya no hino ku isi.

Gusa yaje guhinduka yitwa Ubumwe mbere gato y’uko Inama rusange y’Umuryango w’Ubumwe bwa Afurika itangira muri Nyakanga 2016. Bivugwa ko Mukwano Group yirukanye ikigo cyari cyahawe isoko ryo kuyicunga mu gihe cy’imyaka 15.

Umunyemari Binod Chaudhary yaje kubimenya ahita atangira gukurikirana Mukwano Group ayishinja ubwambuzi.

Inkuru yatangajwe na The East African mu Ukwakira 2016 ivuga ko icyo gihe uwari Umuyobozi w’Ikigo cy’Igihugu cy’Iterambere (RDB), Francis Gatare, yagerageje kunga abo bashoramari ariko ngo asanga ikibazo gikomeye.

Gatare yagize ati “Babiri mu banyamigabane batatu bafite iriya nyubako barashwanye, twagerageje kubunga ariko byaje kugaragara ko amakimbirane yabo akomeye kurusha uko twabitekerezaga.”

Icyo gihe CG Corp Global yashatse umunyamategeko, Apollo Nkunga, itanga ikirego mu Rukiko rw’Ubucuruzi rwa Nyarugenge, ariko Mukwano nayo ijurira mu Rukiko Rukuru rw’Ubucuruzi.

Umuhungu wa Binod Chaudhary yaburiye Hilton Hotel ko igiye gucunga hoteli isanzwe ifite ibibazo biba iby’ubusa

Umuyobozi wa Hilton, Ishami ry’u Burayi, Uburasirazuba bwo hagati na Afurika, Patrick Fitzgibbon, yitabiriye inama y’Ihuriro ry’Abashoramari mu by’Amahoteli muri Afurika (AHIF) yabereye i Kigali ku wa 11 Ukwakira 2017.

Mu kiganiro n’abanyamakuru yongeye gushimangira ko Hilton igiye kuza mu Rwanda igashora imari mu gucunga Ubumwe Grande Hotel.

Umunyamakuru wa IGIHE yabajije Fitzgibbon niba azi iby’amakimbirane ari hagati ya ba nyiri hoteli avuga ko agiye gucunga. Undi ati “Nta makuru na make mbifiteho, uwabikubwiye abe ari we uzabibaza. Munyihanganire.”

Rahul Chaudhary, Umuyobozi wa CG Hospitality Holdings Global, akaba n’umuhungu w’umuherwe Binod Chaudhary uri mu bibazo na Mukwano Group yatangaje ko hashize iminsi myinshi abuza Fitzgibbon kugura Ubumwe Grande ariko akavunira ibiti mu matwi.

Rahul ahamya ko yahuye na Fitzgibbon muri AHIF yabereye i Kigali mu mwaka ushize, akamutekerereza iby’inkuru yari yamaze kuba kimomo ku makimbirane ari hagati y’abanyamigabane, akanamumenyesha ko umuryango we (Chaudhary) ufitemo ubwiganze bw’imigabane.

Nyuma y’ikiganiro na IGIHE, CG Corp yasohoye itangazo rigira riti ““CG Hospitality Holdings (CG) yamaze kumenya amakuru ko Hilton yaba yarashyize umukono ku masezerano yo gucunga Ubumwe Grande Hotel. Ayo makuru yadutunguye kandi aratubabaza nka CG.”

“Nta na rimwe CG yigeze imenyeshwa ibiganiro birebana n’ayo masezerano nubwo CG ari yo ifite imigabane myinshi muri ba nyiri Ubumwe Grande Hotel kandi hari amakimbirane arebana n’imicungire y’iyo hoteli, yagiye anatangazwa mu itangazamakuru. Kuri ubu CG iri gushaka ubujyanama mu by’amategeko ngo igire icyo yakora kuri ibi byose.”

CG Corp ni ikigo kinini cy’ubucuruzi gifite umutungo ubarirwa muri za miliyoni z’amadorali ya Amerika, kigizwe n’ibindi bigo bito by’amabanki, amahoteli mu bihugu bigera kuri 25, inganda zikora sima, ibiryo, za kaminuza n’ubundi bucuruzi.

Inkuru bifitanye isano: Ubumwe Grande Hotel igiye kugurwa na Hilton, igihangange mu gucunga amahoteli ku isi

Umuyobozi wa Hilton mu Burayi, Uburasirazuba bwo Hagati na Afurika, Patrick Fitzgibbon, yongeye gushimangira ko Hilton igiye kuza mu Rwanda igashora imari mu gucunga Ubumwe Grande Hotel
Ubumwe Grande Hotel yaguzwe n'Ikigo kizobereye mu gucunga amahoteli ku rwego mpuzamahanga
Iyi hoteli ifite ubwogero mu bushorishori

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza