Ibigo bikomeye byo muri Canada na Australia bishaka kuza gucukura Coltan y’u Rwanda

Yanditswe na Herve Ugirumukunda
Kuya 31 Ukwakira 2017 saa 01:14
Yasuwe :
0 0

Ibigo by’ubucukuzi bw’amabuye y’agaciro byo muri Canada na Australia birifuza gucukura amabuye y’agaciro ya Coltan aboneka cyane mu Rwanda kubera ahandi asigaye ahenze cyane.

Coltan ivanwamo ibinyabutabire bihenze bya Niobium na Tantalum. Tantalum ikenewe cyane ku isi muri iki gihe kuko ikoreshwa mu gukora ibice cy’imashini zikomeye no mu bikoresho by’ikoranabuhanga nka telefoni zigendanwa, mudasobwa zigendanwa, ibikoresho byo mu modoka na Camera.

Nubwo u Rwanda atari rwo rukorerwamo Tantalum nyinshi ku isi, kuko itunganyirizwa mu mahanga, ubutaka bw’u Rwanda kuri ubu bwihishemo 90% bya Coltan isigaye ku isi.

Umuyobozi w’Ikigo cy’Igihugu gishinzwe ubucukuzi bw’Amabuye y’Agaciro na Peteroli, Francis Gatare, yabwiye Rwanda Today ko ibigo bibiri by’ubucukuzi byo muri Canada na Australia byatangiye ibiganiro n’u Rwanda ngo bisuzume amahirwe yo gucukura Coltan.

Gatare yasobanuye ko Australia na Canada byakoraga Coltan nyinshi ku isi, ariko muri iki gihe bisigaye bihendwa kubera ubutaka icukurwamo bukomeye cyane naho mu Rwanda ho bikaba bicyoroshye kuyicukura.

Ati” Ibigo mpuzamahanga bimwe byo muri ibyo bihugu byamaze kutugaragariza ko bishaka gutangiza ibikorwa mu Rwanda.”

Australia, Brazil na Canada bicukurwamo 80 % bya Coltan ikoreshwa ku isi ariko umusaruro wabyo ukomeje kugabanuka cyane kubera kuyicukura bisigaye bihenze cyane dore ko ahanini bisaba kwasa urutare.

Ni mu gihe kandi tantalum ikomeje gushakishwa cyane kubera ubwiyongere bwa telefoni zigendanwa zigezweho, ku buryo mu mwaka ushize ingano ya tantalum USA yakeneye yiyongereyeho 40%.

Icukurwa cya Coltan ryari ryaradindijwe n’ikomanyirizwa ry’amabuye y’agaciro yo mu Rwanda na Repubulika Iharanira Demokarasi ya Congo.

Gatare yavuze ko u Rwanda rwatsinze intambara ikomeye yo kwerekana ko rufite amabuye y’agaciro yarwo bwite rukaburizamo ibihuha byari byakwirakwijwe na bimwe mu bigo bikomeye by’ubucukuzi bivuga ko u Rwanda ruvana amabuye muri Congo mu duce tuvugwamo intambara.

Iryo komanyirizwa ryavanweho nyuma y’igenzurwa ryakozwe u Rwanda rukagaragaza ko amabuye arukomokamo acukurwa hakurikijwe amabwiriza mpuzamahanga, ndetse impuguke zigatemberezwa mu birombe bitandukanye.

Mu gihe ikilo cya Tantalum kigeze ku madolari 193 (asaga 160 000 Frw); u Rwanda rwakuwemo tantalum ingana na 25 % by’iyakoreshejwe muri Leta Zunze Ubumwe za Amerika mu mwaka ushize, rukurikira Brazil yagurishijeyo 38%; Australia na Canada byo byagurishije ku isoko rya USA 8%.

No muri 2015 u Rwanda nicyo gihugu cya kabiri cyari cyagurishije tantalum nyinshi, toni 410 zingana na 37% by’iyaguzwe ku isi yose, rukurikirwa na RD Congo yacukuwemo toni 350 zingana na 32%.

Guverinoma y’u Rwanda ishaka kuzamura inyungu iva mu mabuye y’agaciro nubwo ibiciro byayo ku rwego mpuzamahanga biherutse kumanuka.

Mu myaka itatu ishize ibiciro by’amabuye yo mu bwoko bwa tin byamanutseho 38%, wolfram, 25% naho coltan imanukaho 22%.

Banki Nkuru y’Igihugu igaragaraza ko amafaranga u Rwanda rwinjije mu kohereza hanze amabuye y’agaciro yavuye kuri miliyoni 226 z’amadorali muri 2013, ajya kuri 206 muri 2014, na 150 muri 2015.

Naho agaciro ka Coltan, Tin na Wolfram u Rwanda rwohereje mu mahanga kavuye kuri miliyoni 117.81 $ muri 2015 kakagera kuri miliyoni 82.42$ muri 2016.
Gusa mu gihembwe cya kane cya 2016, ibiciro by’amabuye y’agaciro byari byongeye kuzamukaho 10% kubera ubwiyongere bw’ubusabe bw’u Bushinwa.

Gatare avuga ko Leta y’u Rwanda ishaka ko muri 2017-2018 amafaranga amabuye y’agaciro yinjiriza u Rwanda azikuba kabiri akava kuri miliyoni 200 $ akagera kuri 400 ndetse akazagera kuri miliyoni 600 $ mu myaka itanu iri imbere.

Umuyobozi w’Ikigo cy’Igihugu gishinzwe ubucukuzi bw’Amabuye y’Agaciro na Peteroli, Francis Gatare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza