Marriot International yasinye amasezerano na hoteli nshya ziri kubakwa muri Afurika

Yanditswe na Ferdinand Maniraguha
Kuya 16 Ukwakira 2017 saa 12:28
Yasuwe :
0 0

Sosiyete icunga ikanakora ibijyanye n’amahoterli, Marriot International, yasinye amasezerano yo gucunga hoteli zirindwi ziri kubakwa muri Afurika, muri gahunda ifite yo kuba ifite nibura izigera kuri 200 kuri uyu mugabane mu 2022.

Iyi sosiyete isanzwe inafite hoteli mu Rwanda yasinye ayo masezerano mu Nama Nyafurika yiga ku ishoramari mu mahoteli (Africa Hotel Investment Forum) yaberaga i Kigali kuva tariki 11 kugeza 12 Ukwakira 2017.

Marriot International iri muri gahunda yo kuba ifite hoteli 200 mu 2022, zifite ibyumba 37 000, ikaba iteganya ko bizayitwara miliyari 8.5 z’amadolari ya Amerika, bigatanga akazi ku bantu 50 000.

Iyi sosiyete isanzwe iri mu za mbere muri Afurika mu gucunga amahoteli, nyuma yo gusinya amasezerano na hoteli za sosiyete Protea Hotels yo muri Afurika y’Epfo kuri miliyoni 210 z’amadolari mu mwaka wa 2014, yongereye ingufu mu kwagura ibikorwa byayo kuri uyu mugabane.

Umuyobozi Mukuru wa Marriot International muri Afurika no mu Burasirazuba bwo hagati, Alex Kyriakidis, yavuze ko bashimishijwe n’umuvuduko w’ubukungu muri Afurika ariyo mpamvu bifuje kuhashora imari mu by’amahoteli.

Yagize ati “Twizera ubushobozi Afurika ifite ndetse n’amahirwe ahari. Uko ubukungu bwiyongera ndetse no gutera imbere kw’abafite amikoro aringaniye, ukongeraho no gutera imbere kw’imijyi bituma abantu benshi bashaka aho kurara no kuruhukira heza, bikaduha amahirwe yo gukomeza gutera intambwe no gutanga umusanzu wacu mu gufasha ubucuruzi bukizamuka kuri uyu mugabane.”

Marriot yamaze kugirana amasezerano yo gufungura izindi hoteli mu bihugu nka Benin, Botswana, Madagascar, Mali, Mauritania, Sénégal na Côte d’Ivoire zizongera ibyumba 1300 ku byo yari ifite, ikanongera ibikorwa byayo mu bihugu nka Ghana, Ethiopia na Nigeria.

Amwe mu mahoteli mashya Marriot igiye gufungura:

Abidjan Marriott Hotel, Côte d’Ivoire

Iyi hoteli iherereye mu Mujyi wa Abidjan hafi y’Ingoro ya Perezida w’icyo gihugu, mu gace ka Plateau kabarizwamo ubucuruzi bukomeye n’ibiro bya Leta muri uwo mujyi.

Iyo hoteli yari isanzwe icunzwe na Côte d’Ivoire Investissement biteganyijwe ko izaba yafunguye imiryango mu 2021, ifite ibyumba 200.

Sheraton Abidjan na Four Points by Sheraton Abidjan, Côte d’Ivoire

Hoteli Four Points by Sheraton y’ibyumba 258 biteganyijwe ko izafungura imiryango mu 2022. Izafungurirwa rimwe na Sheraton Abidjan y’ibyumba 300.

Renaissance Landmark Lagos Hotel na Marriott Executive Apartments

Izi hoteli zizaba ziri ku Birwa bya Victoria mu Mujyi wa Lagos muri Nigeria, zigomba kuba zuzuye mu mwaka wa 2020.

Marriot izacunga Renaissance Landmark Lagos Hotel y’ibyumba 216 ndetse na Marriot Executive Apartments y’ibyumba 44. Izi hoteli zizaba ziri ku kirwa aho uba witegeye neza Inyanja ya Atlantique.

Le Meridien Accra, Ghana

Iyi hoteli y’ibyumba 160 iri kubakwa hafi y’Ikibuga cy’Indege Mpuzamahanga mu Mujyi wa Accra. Aho iherereye hegereye ahakorerwa ubucuruzi, ibigo bya Leta ndetse n’inzego z’ububanyi n’amahanga. Biteganyijwe ko izafungura imiryango mu mwaka wa 2021.

Protea Hotel by Marriott Addis Ababa, Ethiopia

Iyi hoteli ifite ibyumba 165, izaba iherereye ku muhanda wa Churchill mu Mujyi wa Addis Abeba, aho biteganyijwe ko izaba yafunguye imiryango mu mwaka wa 2021.

Mu ntangiriro z’uyu mwaka Marriot yanatangaje ko yasinye amasezerano yo gucunga hoteli y’ibyumba 90 na The Ritz-Carlton Zanzibar iri mu Birwa bya Zanzibar ndetse na Aloft Port Louis, yo mu Birwa bya Maurice.

Mu zindi hoteli zafunguwe na Marriot mu minsi mike ishize harimo Four Points by Sheraton Dar es Salaam, New Africa Hotel, Sheraton Cairo mu Misiri, Protea by Marriott Owerri Select muri Nigeria, Four Points by Sheraton Nairobi Hurlingham n’izindi.

Kuri ubu Marriot International ifite hoteli zigera ku 140 mu bihugu 20 bya Afurika, zifite ibyumba bigera ku 24 000.

Ifite hoteli mu bihugu nka Algeria, Djibouti, Misiri, Ethiopia, Gabon, Ghana, Guinea, Kenya, Malawi, Mauritius, Maroc, Namibia, Nigeria, Rwanda, Seychelles, Afurika y’Epfo, Tanzania, Tunisia, Uganda na Zambia.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza