00:00:00 IGIHE NETWORK KN KINYARWANDA EN ENGLISH FR FRANCAIS

Ibihugu bya EAC biravugwaho guheza mu gihirahiro abaturage babyo bagana Urukiko rw’uyu muryango

Yanditswe na Nkundineza Jean Paul
Kuya 13 Ukwakira 2021 saa 08:26
Yasuwe :
0 0

Inteko Ishinga Amategeko y’Umuryango wa Afurika y’Iburasirazuba (EALA) yagaragaje ko hari abaturage batanga ibirego mu Rukiko rwa Afurika y’Iburasirazuba ariko basubira mu bihugu byabo imyanzuro bahawe ntibiyishyire mu bikorwa.

Byagarutsweho ku wa Kabiri, tariki ya 12 Ukwakira 2021, mu Nteko Rusange y’Inteko Ishinga Amategeko ya Afurika y’Iburasirazuba aho yagarutse cyane ku iyubahirizwa ry’amategeko yashyizweho n’uyu muryango.

Depite Rutazana Francine yagarutse cyane ku bihugu bitubahiriza amategeko agenga uburenganzira bwa muntu n’agenga ubucuruzi ndetse n’imbogamizi abaturage bafite zituma batabona ubutabera burambye.

Nk’umwe mu bagize Komisiyo ikurikirana ibijyanye n’amategeko, Depite Rutazana Francine, yavuze ko mu bihugu bimwe na bimwe bigize EAC, abaturage babura ubutabera kugeza ubwo bagana Urukiko rwa Afurika y’Iburasirazuba.

Ikibabaje ni uko uru rukiko iyo rufashe umwanzuro n’ubundi ibi bihugu bitayishyira mu bikorwa bigatuma abaturage bahora basiragira bakongera bagasubira gutanga ibirego.

Ati “Ubundi dufata umwanzuro ku muturage wo muri aka karere watugannye ariko abawushyira mu bikorwa ngo urubanza rurangizwe, arenganurwe, ni igihugu aba yavuyemo. Ikibabaje ni uko akenshi iyo uwo muturage agiye mu gihugu cye kugira ngo arangirizwe urubanza, agerayo akishaka akibura bikarangira agarutse gutanga ikindi kirego.”

Yakomeje ati “Ntabwo bigoye mu gihe byaba byahawe umurongo muzima. Mu mategeko hari ihame rivuga ko ubutabera butinze buba butakiri ubutabera, none usibye no gutinda uyu munsi nta n’ubwahabaye.”

Ntiyavuze imibare y’abaturage bahuye n’iki kibazo cyangwa ibihugu byabo. Yakomeje avuga ko batanze umurongo ko Akanama k’Abaminisitiri b’Umuryango wa Afurika y’Iburasirazuba kakwiga kuri iki kibazo kakagishakira ibisubizo ku buryo abaturage babona ubutabera bakeneye.

Inteko Rusange y’Umuryango wa Afurika y’Iburasirazuba yatangiye ku wa 3 Ukwakira 2021 bikaba biteganyijwe ko izasoza imirimo yayo ku wa 20 Ukwakira uyu mwaka.

Abadepite basuye Urukiko rwa Afurika y'Iburasirazuba batanga ibitekerezo ku bibazo bitandukanye bibangamiye urwego rw'ubutabera
Perezida w'Inteko Ishinga Amategeko y'Umuryango wa Afurika y'Iburasirazuba, Martin Ngoga, yumva ibitekerezo by'abadepite
Depite Odda Gasinzigwa uhagarariye u Rwanda muri EALA
Depite Rutazana Francine, yavuze ko mu bihugu bimwe na bimwe bigize EAC, abaturage babura ubutabera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .