Ikigo cy’Abanyamerika kigiye gufasha u Rwanda guhangana n’indwara zo mu mutwe

Yanditswe na Evariste Nsengimana
Kuya 7 Kanama 2018 saa 05:04
Yasuwe :
0 0

Ikigo mpuzamahanga cy’Abanyamerika gitanga ubufasha mu by’ubuvuzi cyitwa ‘Johnson & Johnson’ cyasinyanye amasezerano y’ubufatanye bw’igihe kirambye na Guverinoma y’u Rwanda, agamije kuyifasha gukora ubushakashatsi ku ndwara zo mu mutwe, guhugura abaganga bazo no gutanga imiti.

Minisitiri w’Ubuzima, Dr.Diane Gashumba n’umuyobozi wa Johnson & Johnson, Paul Stoffels, nibo bashyize umukono ku masezerano kuri uyu wa kabiri.

Dr. Gashumba yavuze ko mu by’ibanze Johnson & Johnson, izafasha u Rwanda ari gukora ubushakashatsi ku gitera indwara zo mu mutwe n’uko uzirwaye yakwitabwaho.

Ati “Ni inyigo izareba uburemere bw’ikibazo cy’indwara zo mu mutwe mu gihugu cyose, ikareba impamvu zitera ibibazo byo mu mutwe, ikareba nanone ibisubizo bigendeye no ku mpamvu, uburyo dushobora kwirinda. Twanashizemo ikibazo cy’ibiyobyabwenge kugira ngo turebe uburemere bwacyo.”

Uretse ubwo bushakashatsi, iki kigo kizakomeza no gufasha Leta mu bikorwa isanganye byo kwita ku bafite uburwayi bwo mu mutwe, nko kugeza ubuvuzi kuri buri muturarwanda ubukeneye, bikavanwa ku bitaro by’uturere, bikagezwa ku mavuriro mato no ku midugudu.

Si ibyo gusa kuko Johnson & Johnson izanafasha mu bukangurambaga ku banyarwanda ku kwita ku muntu ufite ubwo burwayi, kubona imiti hafi kandi ihendutse, guhugura abaganga bavura indwara zo mu mutwe n’abajyanama b’ubuzima.

Dr. Gashumba yashimiye iki kigo ku bufatanye gitangije na Leta y’u Rwanda, avuga ko bizagira uruhare mu kunoza gahunda za Guverinoma zo kwita ku bafite ubwo burwayi.

Paul Stoffels yavuze ko biyemeje gufasha u Rwanda guhangana n’uburwayi bwo mu mutwe kuko ari ikibazo gihangayikishije Isi muri rusange.

Ati “Uburwayi bwo mu mutwe ni ikibazo gikomeje kwiyongera ku Isi, kandi cyangiza ubuzima bw’umuntu ku giti cye, umuryango we n’abaturanyi muri rusange, cyane cyane abo mu bihugu bikennye, ku buryo bikwiye ko tucyitondera.”

Umuganga w’inzobere mu kuvura indwara zo mu mutwe ku Ibitaro bya Ndera, Dr Bizoza Ritakayire, asanga aya maserano azagirira akamaro benshi, kuko uretse ubushakashatsi, azaba anagamije gukora ubukangurambaga ku ndwara zo mu mutwe, bamwe usanga bazirwara ntibivuze, bakazitiranya n’amarozi, bigatuma badafata imiti neza.

Uretse kuba uburwayi bwo mu mutwe bushobora guterwa n’izindi mpamvu zirimo nko gukoresha ibiyobyabwenge, ihohoterwa n’ibindi, mu Rwanda bifite umwihariko bamwe babitewe n’ibikomere batewe na Jenoside yakorewe abatutsi mu 1994.

Nubwo nta bushakashatsi bugaragaza umubare w’abanyarwanda bafite indwara zo mu mutwe, ni ikibazo gihangayitse kuko ibitaro bya Ndera, byakiriye abarwayi 994 mu 2010, mu 2015 byakirwa 1,432 mu wa 2016, byakirwa 2804, naho mu mu mu 2017 byakirwa 1960.

Minisitiri w’Ubuzima, Dr.Diane Gashumba n’umuyobozi wa Johnson & Johnson, Paul Stoffels, nibo bashyize umukono ku masezerano
Dr. Gashumba yavuze ko mu by’ibanze Johnson & Johnson, izafasha u Rwanda ari gukora ubushakashatsi ku gitera indwara zo mu mutwe n’uko uzirwaye yakwitabwaho.
Paul Stoffels yavuze ko biyemeje gufasha u Rwanda guhangana n’uburwayi bwo mu mutwe kuko ari ikibazo gihangayikishije Isi muri rusange

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza