U Bwongereza: Ibiribwa n’ibinyobwa birimo isukari nyinshi byasabiwe kongererwa imisoro

Yanditswe na Ferdinand Maniraguha
Kuya 8 Kamena 2019 saa 05:26
Yasuwe :
0 0

Ikigo The Institute for Public Policy Research (IPPR) cyasohoye raporo isaba igihugu cy’u Bwongereza kongerera imisoro ibicuruzwa birimo ibiribwa n’ibinyobwa birimo isukari nyinshi.

Icyo kigo gitangaza ko ibyo biribwa ari bimwe mu bikomeje gutuma indwara y’umubyibuho ukabije yiyongera mu Bwongereza.

Mu bicuruzwa byatunzwe agatoki harimo ibisuguti, imigati yifashishwa mu birori izwi nka gateaux, bonbons, ibyo kurya byoroshye bahekenya bizwi nka snacks n’ibindi birimo n’ibinyobwa bibamo isukari nyinshi.

Ikigo IPPR cyasabye ko imisoro kuri ibyo bicuruzwa yongerwa kandi ibigo bibikora bigategekwa kubipfunyika mu buryo budahamagararira rubanda kubigura.

Uburyo nkubwo ni nabwo bwifashishwa hirya no hino ku isi mu gupfunyika itabi.

IPPR kandi yasabye ko kwamamaza ibyo biribwa n’ibinyobwa kuri televiziyo byakumirwa mbere ya saa tatu z’ijoro.

Umuyobozi wa IPPR, Tom Kibasi yagize ati “Gupfunyika ibyo biribwa mu buryo budashamaje bizadufasha gukora amahitamo nyayo binagabanye umuvuduko byagurwagaho bikozwe n’ababyeyi badafite akanya.”

Yakomeje agira ati “Turashaka ko u Bwongereza buvanaho iby’ibiryo abantu bitwaza, tukagaruka ku biryo byatekewe mu rugo.”

Umwe mu bakoze ubushakashatsi Dean Hochlaf, yavuze ko abantu benshi cyane cyane abo mu miryango itishoboye bari kurwara indwara zakabaye zirindwa kubera kurya ibiribwa bifite ingaruka ku buzima bwabo.

Yavuze ko nubwo ibyo biribwa ari byo bihuye n’amikoro y’abantu ndetse n’umwanya baba bafite, Guverinoma idakwiriye kurebera kuko kubareka bikabagiraho ingaruka bifite ingaruka kuri ejo heza h’igihugu.

Ikinyamakuru Sky muri Mutarama uyu mwaka cyatangaje ko kimwe cya gatatu cy’abantu bakuze mu Bwongereza bafite umubyiho ukabije.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza