U Rwanda rugiye kunguka ibitaro bitandatu by’uturere bizatwara izisaga miliyari 30Frw

Yanditswe na Evariste Nsengimana
Kuya 31 Nyakanga 2018 saa 01:25
Yasuwe :
0 0

Guverinoma y’u Rwanda ikomeje kongera ibikorwa remezo byifashishwa mu buvuzi, ubu mu mwaka w’ingengo y’imari wa 2018/2019 hakaba hateganywa kubaka no kuvugurura ibitaro bitandatu biri ku rwego rw’Uturere, bizuzura bitwaye asaga miliyari 30Frw.

Ni ibikorwa byitezweho kuzamura urwego rw’ubuvuzi mu gihugu, binyuze mu kugeza ubuvuzi bukenewe ku baturage kandi bakabusanga hafi yabo, mu gihe hari bamwe bafataga umunsi wose bajya kwa muganga.

Minisiteri y’ubuzima igaragaza ko mu ngengo y’imari ya miliyari 205Frw yagenewe muri uyu mwaka, hateganywa kuvugurura ibitaro bibiri birimo ibya Byumba mu karere ka Gicumbi bizuzura bitwaye asaga miliyari 4.1Frw n’ibya Munini mu Karere ka Nyaruguru bizatwara miliyari 7.9Frw.

Hari n’ibishya bizubakwa birimo iby’Akarere ka Nyarugenge bizuzura bitwaye miliyari 5.9Frw, ibya Nyabitekeri mu Karere ka Muhanga bizuzura bitwaye miliyari 6.9Frw, ibya Gatunda mu Karere ka Nyagatare bizuzura bitwaye miliyari 3.6Frw n’ibya Gatonde mu Karere ka Gakenke bizatwara asaga miliyari 2.49Frw.

Umuvugizi wa Minisiteri y’Ubuzima, Kayumba Malick, yabwiye IGIHE ko ibi bitaro bishya byitezweho kuzamura urwego rw’ubuzima bijyanye na serivisi zizajya zihatangirwa.

Yagize ati “Ni ugukora ibishoboka byose kugira ngo twegereze umuturage serivisi, aho yakagombye kujya kuyishaka i Kigali hari ibitaro biri ku rwego rwo hejuru, abe yayibona hafi y’aho ari. Ibizavugururwa ni ukugira ngo bijye ku rwego rukwiye.”

“Turi no gushyira imbaraga cyane mu kubaka za Poste de Santé kugira ngo tugabanye umwanya umuntu agenda agiye gushaka serivisi z’ubuvuzi mu buryo bushoboka bwose [...] Uko serivisi zibegera ni nako zirushaho guhenduka.”

Umuyobozi w’Akarere ka Gakenke nka kamwe kagiye kunguka ibitaro bya Gatonde, Nzamwita Deogratias, yabwiye IGIHE ko imirimo yo kubyubaka igeze kuri 70% ku buryo muri Gashyantare umwaka utaha abaturage bazatangira kubyivurizaho, bikabaruhura urugendo rurerure bakoraga.

Yagize ati “Mu gace k’Imirenge ya Janja, Muzo, Mugunga, Busengo na Rusasa, kugira ngo umurwayi bamukureyo bamuzane ku bitaro bya Nemba hari kure cyane. Guhamagarayo Imbangukiragutabara bitwara igihe, hari n’ubwo umurwayi ashobora kuba yahawe serivisi ariko mu buryo bugoranye. Urumva ko bizabafasha cyane.”

Akarere ka Gakenke gasanzwe gafite ibigo nderabuzima 23 n’ibitaro by’abanyamadini bibiri birimo ibya Ruli n’ibya Nemba.

Ibitaro bya Gatonde kimwe n’ibindi bizubakwa mu gihugu, bizaba bitanga serivisi zitandukanye zirimo aho ababyeyi babyarira, ubuvuzi bw’indwara z’ubuhumekero, izo mu nda, iz’abana, izo mu kanwa n’izindi.

Ubwo Minisitiri w’Intebe, Dr. Edouard Ngirente, yagezaga ku bagize Inteko Ishinga Amategeko ibikorwa bya Guverinoma muri gahunda y’imyaka irindwi (2017-2024), yavuze ko iteganya kubaka n’ibigo nderabuzima 17 mu mirenge itabigiraga, muri ibyo bitanu bikazubakwa muri uyu mwaka, na Poste de Santé nshya 150 mu gihugu hose.

Dr. Ngirente yanatangaje ko ku bufatanye n’abikorera hazashyirwaho ibigo by’ubuzima by’icyitegererezo bizajya bivura zimwe mu ndwara zitandura zatumaga Abanyarwanda batari bake bajya kuzivuriza hanze kandi bibahenze nk’iz’umutima, Kanseri n’izindi.

Umwaka ushize u Rwanda rwungutse ibitaro bya Shyira biri mu Karere ka Nyabihu, inzu z’ababyeyi (Maternité) ku mavuriro arindwi, arimo ibitaro bya Rutongo, ibya Gisenyi mu Karere ka Rubavu, ibya Rwamagana, ibitaro bya Gahini muri, ibya Nyanza, ibya Kabutare muri n’ibya Gihundwe muri Rusizi, hagamijwe kugabanya impfu z’abana no kwita ku buzima bw’umubyeyi n’ibindi.

Uretse kwegereza ubuvuzi abanyarwanda, kubaka ibi bitaro bizanafasha guverinoma kugera ku ntego zitandukanye yagiye yiha mu byerekezo bitandukanye.

Kuva mu 2010 kugeza 2017, mu gihugu hubatswe Poste de santé 400, ibitaro bishya bine ( Ruhango, Kinihira, Kirehe na Masaka) n’ibigo nderabuzima bigezweho bine i Remera, Kanyinya, Gatenga na Mageragere.

Byatumye u Rwanda rugira ibitaro 51 birimo iby’icyitegererezo birindwi, ibyo ku rwego rw’intara bine, iby’uturere 36, ibigo nderabuzima 504, poste de santé 555 mu gihugu hose n’abajyanama b’ubuzima. Hubatswe kandi ibyumba 24 birimo Laboratwari, aho babyarira n’ahatangirwa serivisi zihutirwa, ibitaro bitandatu byarasanwe binongererwa ubushobozi.

Ibitaro bishya bya Byumba byamaze kubakwa bigiye gutangira gukoreshwa
Umwaka ushize u Rwanda rwungutse ibitaro bya Gihundwe mu Karere ka Rusizi
Ibitaro bya Shyira Perezida Kagame yemereye abaturage biratanga serivisi kuva umwaka ushize
Ibitaro bya Shyira biri mu Karere ka Nyabihu byishimiwe cyane n'abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza