Umunyarwandakazi wa mbere wize kubaga indwara z’ubwonko yagarutse mu Rwanda

Yanditswe na Ferdinand Maniraguha
Kuya 2 Kanama 2018 saa 02:44
Yasuwe :
2 0

Dr Karekezi Claire wari umaze umwaka yiga amasomo ajyanye no kubaga indwara zifata ubwonko, yagarutse mu Rwanda gushyira mu bikorwa ibyo yize.

Dr. Karekezi Claire, ni we munyarwandakazi wa mbere wize amasomo arebena no kubaga indwara zifata ubwonko. Yari amaze umwaka yiga mu Bitaro biri i Toronto muri Canada.

Kuri uyu wa Gatatu ibitaro bya Kaminuza bya Kigali, CHUK byatangaje ko Dr Karekezi yakiriwe na bagenzi be basanzwe babaga indwara zifata ubwonko muri ibyo bitaro, barimo Dr Sévérien Muneza na Dr Steven Nshuti.

Ibi bitaro bibinyujije kuri Twitter, byatangaje ko byishimiye kugaruka kwa Dr Karekezi kandi ko azafashwa mu kazi agiye gutangira.

Byagize biti “Inzobere zacu mu kuvura indwara zifata ubwonko zishimiye kwakira umunyarwandakazi wa mbere w’inzobere mu kuvura indwara zifata ubwonko, Dr Karekezi uvuye muri Canada. Zamwijeje kumuha ubufasha bushoboka mu cyumba gishya azakoreramo cyo kubagiramo indwara z’ubwonko.”

Uyu muganga azongera umubare w’abanyarwanda bazobereye mu kubaga indwara z’ubwonko bari mbarwa dore ko rwari rufite abatarenze bane.

Mu kiganiro yagiranye na Televiziyo yo muri Canada mu minsi ishize, Dr Karekezi w’imyaka 35 y’amavuko yavuze ko yakuze afite inzozi zo kuba umuganga akaba yarabashije kurenga ku ntego yari yarihaye akinjira muri kimwe mu byiciro by’ubuvuzi gisaba imbaraga nyinshi n’ubwitange.

Mu 2001 nibwo yarangije amashuri yisumbuye, kubera ko yari yagize amanota meza leta yemera kumwishyurira kwiga ubuganga (medicine) muri Kaminuza Nkuru y’u Rwanda.

Nyuma yo kurangiza amasomo ye ya kaminuza mu 2009, yagize amahirwe yo kwemererwa kwiga by’igihe gito ibirebana no kubaga ubwonko muri Kaminuza ya Oxford mu Bwongereza.

Kubera ko yari yiyemeje kugera ku nzozi nshya yari afite, yandikiye Umuyobozi w’Ikigo gihugura abavuzi b’indwara z’ubwonko bakiri bato giherereye muri Maroc (Rabat Reference Center for Training Young African Neurosurgeons). Mu 2011 yabonye amahirwe yo kujyayo abifashijwemo na Guverinoma y’u Rwanda, akaba yaramaze imyaka itanu yongera ubumenyi ahava ari umuganga mu kubaga indwara zifata ubwonko.

Mu 2013 yahawe igihembo cy’umugore ubaga indwara zifata ubwonko, igikorwa giterwa inkunga na Dr. Mark Bernstein uvura mu Bitaro bya Toronto Western.

Nubwo batari barigeze bahura, yahise afata umwanzuro wo kumwandikira amusaba kujya kwihugura mu bijyanye na kanseri zifata ubwonko, kubera ko yari yaramwumvise mu bahawe ibihembo atera inkunga, yemera ubusabe bwe.

Umwaka ushize nibwo Karekezi yageze mu Mujyi wa Toronto, aho yagiye gusoreza urugendo rw’imyaka 12 azenguruka hirya no hino atyaza ubwenge mu bijyanye no kubaga ubwonko.

Dr Karekezi Claire usoje amasomo yo kubaga indwara z'ubwonko
Dr Karekezi (hagati) ari kumwe n'izindi nzobere mu buvuzi bw'indwara z'ubwonko mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza