Udupaki tw’amaraso ibihumbi 14 twagejejwe ku bitaro byo mu Rwanda hifashishijwe ‘Drones’

Yanditswe na Evariste Nsengimana
Kuya 8 Kanama 2018 saa 06:44
Yasuwe :
0 0

Minisiteri y’ubuzima mu Rwanda ivuga ko kwifashisha indege nto zitagira abapilote (drones) mu kugeza amaraso ku bitaro hirya no hino mu gihugu, bimaze gutanga umusaruro mwiza kuko zagejejeyo udupaki turenga ibihumbi 14 mu myaka hafi ibiri.

Mu Ukwakira 2016 nibwo Perezida Paul Kagame yatangije igikorwa cyo kwifashisha Drones mu kugeza amaraso ku bitaro byo hirya no hino mu gihugu, ziyakuye ku kibuga cyazo kiri mu Karere ka Muhanga.

Icyo gihe yavuze ko izo ndege zifatiye runini u Rwanda kuko zizoroshya ubutabazi ku barwayi bakeneye amaraso byihutirwa batuye mu misozi, aho byari bisanzwe bigorana kuyageza vuba.

Izo drones z’ikigo cyo muri Leta Zunze Ubumwe za Amerika cyitwa Zipline, ku bufatanye n’ikigo gikora ibijyanye no gutwara imizigo (UPS), zayajyanaga ku bitaro 12 birimo Muhororo, Kabgayi, Nyanza, Gitwe, Gakoma, Gikonko, Kaduha, Kabaya, Shyira, Ruhango, Kirinda na Ruli ariko hiyongereyeho ibindi bitanu birimo Kinihira, Mugonero, Nemba, Kigeme na Murunda.

Muri Mutarama 2017, Minisante yari yavuze ko zari zimaze kugezayo udupaki tw’amaraso turenga ibihumbi bitanu.

Mu kiganiro cyihariye IGIHE yagiranye n’Umuyobozi w’ikigo cy’igihugu cyo gutanga amaraso, Dr. Gatare Swaibu, yavuze ko umusaruro wa Drones zitwara amaraso wiyongereye bishimishije kuko kuva byatangira kugeza ku ya 1 Kanama 2018 zari zimaze gutwara udupaki 14 028.

Utwo dupaki ngo twagejejwe ku bitaro byose hamwe uko ari 17 na Drones 20 zikoreshwa mu gihugu hose, zikoze ingendo 7538.

Ati “Biradufasha cyane, zatumye kubona amaraso birushaho kwihuta. Ufashe nk’urugero, ibitaro bya Muhororo, kuza no kuva i Kigali gutwara amaraso byashoboraga gutwara amasaha hagati y’abiri n’atatu. Ariko ubu barahamagara mu minota 30 akaba abagezeho.”

Yakomeje agira ati “Mbere batwaraga menshi bakayabika, hari ayarenzaga igihe noneho bakaba bayatwika kuko yashaje.”

Umuyobozi w’ibitaro bya Murunda mu Karere ka Rutsiro, bimaze amezi atatu bihabwa amaraso na Drones, Dr. Niringiyimana Eugène, yabwiye IGIHE byagize impinduka zikomeye.

Yavuze ko mu ntangiriro byabaje kugorana bitewe n’imisozi ihanamye iri mu karere ariko nyuma bazanye Drones zishoboye kuyigendamo no kugenda igihe kirekire, ubu bikaba byarahindutse.

Ati “Impinduka imwe ikomeye ni ukubona amaraso wari ukeneye ku gihe kuko hari igihe twayakeneraga tukajya kuyafata ku kigo kibishinzwe ku Kibuye. Kujyayo n’imodoka, kuyategura kongera kugaruka bigafata amasaha arenga abiri ariko ubu iminota 45 uyasabye uba uyabonye.”

Uretse ibyo, ibitaro bihabwa amaraso na Drones, bigaragaza ko byakemuye ibindi bibazo birimo amaraso yashoboraga kwangirika bitewe no kutagira ububiko bwizewe, byagabanyije ingendo za hato na hato z’abakozi bajya kuyazana, bituma babona uko banoza akazi.

Ibitaro bya Murunda, bivuga ko byakira Drone imwe ku munsi, cyangwa zikaba zagera kuri eshatu bitewe n’ubwiyongere bw’abayakeneye kandi ko nta muntu ubura cyangwa ngo akererwe guhabwa amaraso.

U Rwanda rumaze kwamamara mu bikorwa byo gukoresga Drones kuko muri Nzeri 2017, rufatanije n’Ikigo Zipline bahawe igihembo mpuzamahanga gihabwa abantu cyangwa ibigo byabaye indashyikirwa mu guhanga udushya kizwi nka Index Awards 2017.

Ubwo rwakiraga icyo gihembo, Minisitiri w’Ubuzima, Diane Gashumba, yavuze ko Drones zigira uruhare rukomeye mu kwihutisha Serivisi z’ubuvuzi.

Hagiye kuboneka ikindi kibuga cya Drones

Dr. Gatare yavuze ko uretse mu Karere ka Muhanga zisanzwe zihagurikira, i Kayonza mu Ntara y’Iburasirazuba hari kubakwa ikindi kibuga gishya ku buryo mu gihe kiri imbere, ibitaro byose bishobora kuzajya bihabwa amaraso na Drones.

Uretse ibyo kandi, yanavuze ko mu cyumweru gitaha, hari izindi Drones eshatu u Rwanda rwitegura kunguka zizarufasha kugeza amaraso ku bayakeneye vuba.

Gukwirakwiza no guhaza amaraso ibitaro mu Rwanda biri ku gipimo cya 96%, naho mu gukoresha Drones by’umwihariko ni 100%.

Uburyo drones zikoreshwa

Umukozi w’ibitaro yoherereza ubutumwa kuri telefoni cyangwa kuri Whatsapp mugenzi we wa Zipline (izifite mu nshingano), amubwira ko akeneye amaraso n’ingano yayo, bwamugeraho akamenyesha abari mu bubiko bwayo, bakayashyira muri drone ikayanyarukana, mu gihe gito cyane, akagoboka uyakeneye. Zishobora kuguruka ibirometero 135 zidakeneye kongerwamo umuriro uzikoresha.

Drones zimaze kugeza udupaki turenga ibihumbi 14 tw’amaraso mu bitaro bitandukanye byo mu Rwanda
Gukwirakwiza no guhaza amaraso ibitaro mu Rwanda biri ku gipimo cya 96%, naho mu gukoresha Drones by’umwihariko ni 100%
Mu Ukwakira 2016 nibwo Perezida Paul Kagame yatangije igikorwa cyo kwifashisha Drones mu kugeza amaraso ku bitaro byo hirya no hino mu gihugu, ziyakuye ku kibuga cyazo kiri mu Karere ka Muhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza