Tumenye indwara y’agahinda gakabije izwi nka ’dépression’ – Ubuhamya

Yanditswe na Dr Yvonne Kayiteshonga
Kuya 8 Ukwakira 2019 saa 08:43
Yasuwe :
0 0

“Jenoside yansize iheruheru kuko yamazeho abantu, kandi ababishe barampohotera banambyaraho umwana.” Uku niko Sifa (izina ryahinduwe) yatangiye ubuhamya burebure bukubiyemo amateka ye yatumye arwara indwara y’agahinda gakabije izwi nka dépression mu Gifaransa.

Kubera kunanirwa kwakira ibyamubayeho, Sifa yagerageje kwiyambura ubuzima ariko biranga. Mu buhamya bwe agira ati “mu gihe nari ntwite nagerageje kunywa imiti ngo mve ku Isi ariko sinapfa. Naguze n’ikiziriko ngo nimanike ariko birananira."

"Nari mbabaye cyane, kuba nta muryango nsigaranye ahubwo nkaba ntwite inda y’abanyiciye. Nari mfite ipfunwe cyane kuko numvaga n’uwagaruka mu banjye yangaya cyane. bityo nkumva nta mpamvu n’imwe yo kubaho nsigaranye.”

Sifa akomeza avuga ko amezi icyenda yamaze atwite yose yayamaze arira.

Icyakora igihe cyo kubyara kigeze, yasanze abandi bantu basangiye ibibazo kwa muganga aho yabyariye. Nyuma yo gusezererwa mu bitaro akomeza kubaho mu gahinda ariko noneho aharanira gukomeza guhura na bagenzi be yari yamaze kumenyana nabo mu gihe yari kwa muganga, biza kurangira bakoze itsinda bahura bakaganira ku bibazo bahuye nabyo kuko bose bari babisangiye.

Sifa yagize ati “twese twari dusangiye amateka, twari twarahohotewe muri Jenoside yakorewe Abatutsi kandi twese twaravanyemo abana. Abo bana twabyaye nta rukundo na ruke twari tubafitiye.”

Sifa na bagenzi be baje kubona umuntu w’impuguke mu buzima bwo mu mutwe, abatega amatwi, bamubwira ibibazo byose bahuye nabyo, arabahumuriza abereka ko nta ruhare bagize mu byababayeho byose abaha urubuga rwo kuvuga ibyo banyuzemo bamwisanzuraho kugeza aho bamufata nk’umubyeyi.

Sifa avuga ko guhera icyo gihe ari bwo kwigirira icyizere byagarutse ndetse n’urukundo ku bana babyaye rutangira kuza.

Itsinda ryabo ntabwo rakomeje iryo gusangira agahinda gusa ahubwo batangiye kujya bahanahana udufaranga duke, ndetse batangira no kwitabira gahunda zitandukanye za Leta.

Uyu munsi Sifa avuga ko yateye intambwe igaragara mu rugendo rwo kuva mu gahinda, ibyo akabigaragaza iyo arondora ibyo amaze kugeraho.

Yagize ati “ubu naratojwe ndi mu Itorero ry’Imbangukiragutabara, ni jye ushinzwe ubumwe n’ubwiyunge mu kagari ntuyemo, ndi umujyanama w’ubuzima, mfite inzu yanjye kandi irimo n’amashanyarazi, mfite inka ya Girinka kandi na wa mwana nabyaye ubu ariga neza muri Masters”

Sifa ahamya ko yakize indwara y’agahinda kuko yagize amahirwe yo guhura n’umuntu ubihugukiwe akamufasha. Ndetse akemeza ko n’abandi bafite icyo kibazo bashobora kubona ubwo bufasha kuko abahugukiwe n’ubuzima bwo mu mutwe bahari mu Rwanda.

Indwara y’agahinda cyangwa dépression ni iki?

Dépression ni indwara irangwa n’agahinda gakabije no kwiheba. Ishobora gufata uwo ari we wese, ku myaka iyo ariyo yose kandi iyo itavuwe ishobora gutuma uyirwaye afata imyanzuro yo kwiyambura ubuzima nk’uko Sifa yabigerageje inshuro zirenze imwe.

Iyo iyi ndwara itavuwe kandi igira ingaruka zikomeye ku bukungu ndetse n’imibereho muri rusange kuko uyirwaye adashobora kugira icyo yimarira cyangwa ngo agire icyo akora cyamuteza imbere.

N’ubwo abarenga miliyoni 300 ku isi bafite iki kibazo cy’indwara y’agahinda, dépression ni indwara ishobora kuvurirwa ku rwego rw’ubuvuzi bw’ibanze kandi igakira.

Mu Rwanda

Mu gihe u Rwanda rwitegura kwifatanya n’isi yose mu kwizihiza umunsi mpuzamahanga wahariwe kwita ku buzima bwo mu mutwe tariki ya 10 Ukwakira, ubushakashatsi ku buzima bwo mu mutwe bwakozwe muri iki gihugu mu 2018 bugaragaza ko agahinda gakabije kari gafitwe n’Abanyarwanda 12%.

Abagaragaje guhangayika no kwikanga ni 8.1%; mu gihe 4% aribo bagaragaje ihungabana. Ubwo bushakashatsi bugaragaza ko 35% by’abacitse ku icumu rya Jenoside bafite agahinda gahoraho gatuma bumva ubuzima butabashimishije, 28% bafite ihungabana.

Jenoside yakorewe abatutsi niyo mpamvu iza ku isonga mu kuba yarahungabanyije ubuzima bwo mu mutwe bw’abanyarwanda. Mu zindi mpamvu zagaragajwe n‘ubwo bushakashatsi harimo impamvu zishingiye ku ihohoterwa ryaba iribabaza umubiri cyangwa rihungabanya imitekerereze, hakabaho kandi n’impamvu y’ikoreshwa ry’ibiyobyabwenge cyane cyane mu rubyiruko.

Ubuvuzi

Ubuvuzi buhabwa abahuye n’ikibazo cya dépression bugizwe n’imiti hamwe n’uburyo bw’ibiganiro umurwayi agirana n’umuganga. Mu Rwanda, ubuvuzi buboneka mu mavuriro yose. Nyamara ariko n’ubwo ubuvuzi buhari, imwe mu mpamvu ikomeye ituma umurwayi atagana ivuriro, ni imiterere y’indwara ubwayo.

Umuryango n’ababana n’umurwayi muri rusange basabwa kugira uruhare rukomeye mu gufasha umuntu ufite uburwayi bwa dépression kugera ku ivuriro, kugira ngo ahabwe ubufasha akeneye bityo asubire mu buzima busanzwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza