Inkomoko y’Insigamugani: Araseka Muhinya!

Yanditswe na IGIHE
Kuya 10 Kanama 2018 saa 09:23
Yasuwe :
0 0

Uyu mugani bawuca iyo babonye umuntu w’inshamadutsi yubahuka guseka icyagombaga kubahwa; nibwo bavuga ngo “Araseka Muhinya;” cyangwa se bakabivuga nk’igitutsi, ngo “Aragaseka Muhinya!”

Wakomotse ku bana b’i Nyarusange rwa Remera rya Rukoma na Ngamba (Gitarama) basetse umusinga w’umuhoryo w’i Bunyambilili (Gikongoro) witwaga Muhinya; ahasaga umwaka w’i 1700.

Ubwo hari mu rwimo rwa Mibambwe Sentabyo, mu Ruhango rwa Kanyinya na Remera, hacanye izuba rikomeye, haduka udusimba mu myaka. Kagungu yirara mu migozi y’ibijumba ibibuza kwera, utundi dusimba tujya mu bishyimbo na byo birarimbuka.

Abatware n’abiru babwiye Mibambwe ko akwiye gushaka Abahoryo bo kuvuma utwo dukoko twangabaje imyaka, batumiza abo kwa Nyiranzana birabananira, birukira mu Basinga bo kwa Mashushu b’i Bunyambilili aribo bo kwa Buroro bwaroye inkungu ibisiga bikumira hejuru; haza umugabo witwa Muhinya, bamucumbikira i Nyarusange ku murenge wa Remera.

Nuko igihe cyo gukora imihango ye yo kuvuma cyagera akambara imyambaro y’Abahoryo: intobo n’ibindi by’insiro. Abana b’i Nyarusange bakamugendaho bamushungera baseka n’ibyo yambaye.

Haciyeho iminsi, ariko Muhinya yarasubiye i Bunyambilili, kuri Nyarusange haduka indwara mu bana; ihatera icyorezo kibi, rubanda barasakabaka, bavuga ko bazize Muhinya kuko abana bajyaga bamusekera kandi ari umuvumyi.

Ibyo byatumye ababyeyi babo bikora bajya mu Ruhango kwa Mibambwe, bati “Nyagasani tuje kukumenyesha ko abana bacu bakubaganye by’abana, babonaga Muhinya yambaye imyambaro Abahoryo bavumana udukoko bakamuseka batazi icyo bakora; bituma arakara arabavuma; none turagusaba ko wamudusabira imbabazi akabavumura.”

Ubwo Mibambwe yohereza intumwa gusaba Muhinya ngo aze avumure abana abasigaye abarokore, irabumamira n’i Bunyambilili iravunyisha.

Muhinya yakiriye iyo ntumwa ayiha inzoga baranywa baraganira; arayibaza, ati “Ese ntiwamenya icyo bantumiriye?” Dore ko kera intumwa yavaga ibwami ariko yabigenzaga, kugira ngo bagende bazi icyo batumiriwe.

Na yo iti “Ndakizi; kandi ndakikubwira, ariko ni ibanga ntuzarimene." Yamubwiye ko bamutumiriye kuvumura abana b’i Nyarusange yasize avumye.

Muhinya amaze kubyumva azana n’iyo ntumwa ibwami; ariko aza yishegesheje kuko yabimenye, ageze mu Ruhango, Mibambwe aramubwira, ati “Nagutumiriye kugira ngo uvumure abana b’i Nyarusange wavuye ino uvumye.”

Muhinya aramusubiza, ati “Ni jye wabavumye koko, nabahoye ko naje kubakiza ubukoko bakanseka, kandi ba se ntibababuze; none sinabavumura ba se batampaye icyiru."

Ibwami bati “Ni koko, cyo subira mu icumbi ryawe ba se bakiguhe.” Muhinya aremera, ababyeyi b’abana bazana amahene n’amasuka baramutura, ariko babanje gushyira abana babo mu ihaniro kugira ngo batongera guseka, umwana ariko by’abana yajya guseka agaseka buke yifashe ku munwa.

Muhinya amaze gushima icyiru, yabwiye abana, ati “Ndavumuye!” Kuva ubwo inkomoko yo kubona umuntu useka na buke icyo atagombaga guseka, bati “Dore ngo araseka Muhinya.” Baba bamugereranya na ba bana basekaga buke batinya kongera guseka Muhinya.

Uwo batuka ngo aragaseka Muhinya, baba bamugereranya n’ubw’amambere bamusekaga bikabakorera ishyano. — Guseka Muhinya = Kwishikuriza ibara: Kwikururira amakuba.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza