Ibyihariye ku itongo ry’Umwami Kigeri IV Rwabugiri ry’i Karongi,ahateguriwe ibitero bikomeye

Yanditswe na Evariste Nsengimana
Kuya 14 Kanama 2019 saa 09:10
Yasuwe :
0 0

Kigeri IV Rwabugiri ni umwe mu bami bayoboye u Rwanda mu kinyejana cya 19. Yaruyoboye kuva mu 1853 kugera atanze mu 1895, hafi imyaka 42. Uyu Mwami ukomoka mu bwoko bw’Abanyiginya, mwene Mutara II Rwogera, yasimbuwe n’umuhungu we, Mibambwe IV Rutarindwa.

Kuwa 7-10 Kanama 2019, Umunyamakuru wa IGIHE kimwe n’abafite ibigo bifasha ba mukerarugendo mu Rwanda, basuye ahahoze urugo rwa Kigeri IV Rwabugiri, mu rugendo rugamije gutangiza inzira nshya y’ubukerarugendo bushingiye ku muco n’amateka.

Uru rugendo rwateguwe n’ ikigo gishinzwe Ingoro z’Umurage w’u Rwanda n’Umushinga w’Abadage wita ku iterambere (GIZ), rwabimburiwe no gusura inkima zo mu birunga Umuvumbuzi w’umudage Dr Richard Kandt yakozeho ubushakashatsi.

Rwakomereje i Shangi aho Kandt yabanje gutura, muri Pariki ya Nyungwe aho yavumbuye isôoko y’uruzi rwa Nil no gusura Abanyamuryango ba koperative zirimo Abagi ikorera uburobyi n’ubwato mu Kiyaga cya Kivu mu masaha y’ijoro na Tugarure Umuco yo muri Karongi.

Iri tsinda ryasobanuriwe ko uyu mwami yari afite ingo nyinshi mu gihugu akoreramo ibikorwa bitandukanye byo kuyobora igihugu no gusigasira ubusugire bwacyo.

Kigeri IV Rwabugiri wabaye ikirangirire n’igihangange, atsinda amahanga mu bitero byose bigera kuri 16 yagiye agaba, yubatse urugo mu cyahoze ari Kibuye mu 1874, ubu ni mu Karere ka Karongi, Umurenge wa Rubengera, ari naho yateguriragamo ibitero. Ni urugo rwari ruguru gato y’ikiyaga cya Kivu.

Uru rugo yarwubatse ubwo yari atabarutse[Avuye ku rugamba] i Butembo muri Repubulika iharanira Demokarasi ya Congo. Nirwo yakoreyemo umuhango w’umuganura inshuro nyinshi[Zirindwi] ugereranyije n’ahandi yagiye awukorera.

Ibitero byinshi Kigeri IV Rwabugiri yagabye ku Ijwi n’i Bunyabungo, yabiteguriraga muri urwo rugo, ingabo zatabaruka zikahavugiriza amacumu zizanye n’iminyango zakuye ku rugamba nawe akazishimira, azambika impeta z’ubutwari.

Kuva i Rubengera ku kibuye ugera aho uru rugo rwari rwubatse, mu modoka ugenda iminota itarenga 10, ugahita ubona icyapa kizamuka mu gahanda gato kabanza ku kugeza ahahoze iriba i Bwami bavomagaho amazi.

Uvuye kuri iryo riba uyu munsi ryubakiwe kijyambere, ugenda metero nka 30 ugahita ubona inzira y’abanyamaguru igera aho urugo rwe rwari ruri, uyu munsi hagaragazwa n’ikigabiro cy’igihondohondo n’ibindi byarangaga urugo rw’umwami nk’inzu ya kinyarwanda.

Umuyobozi w’Ingoro z’Umurage w’u Rwanda, Amb Robert Masozera, yavuze ko ‘Ubushakatsi bwakozwe bwerekanye ko mu Rwanda hari ahantu nyaburanga 500 hari amateka akomeye hashobora gusurwa n’abakerarugendo harimo n’aho hahoze urugo rwa Kigeri IV Rwabugiri’.

Ati “Mu bushakashatsi dukora burimo no gucukura dushaka ibisigaratongo, hano twahabonye ibimenyetso by’icyo gihe biranga ubutwari bw’Umwami Rwabugiri birimo intango z’imitsindo yakoreshaga.”

Yavuze ko habitse amateka menshi kandi hafitiwe gahunda yo kuyabungabunga muri gahunda yo kwagura ubukerarugendo bukarenga gushingira ku Ngagi na Pariki.

Amb Masozera yijeje ubufasha abanyamuryango ba Koperative Tugarure Umuco biyemeje gutegura ibikorwa bitandukanye byo kwakira abakerarugendo bazajya basura ahohoze urugo rwa Kigeri IV Rwabugiri n’utundi duce nyaburanga dukikije umukandara wa Kivu.

Bakinnye umukino usobanura ukuntu Kigeri yashimiraga ingabo nyuma yo gutsinda urugamba
i Bwami hahoraga abakaraza bizihiwe
Ibwami hahoraga abaja n'abagaragu bakora imirimo ya buri munsi
Icyapa kigaragaza ahahoze urugo rw'Umwami Kigeri IV Rwabugiri n'ubutwari bwe
Imwe mu nzu y'ibyatsi yubatswe mu itongo ry'umwami Kigeri IV Rwabugiri
inzu ihari igaragaza aho Umwami n'Umwamikazi babaga bicaye mu nzu ibwami
Koperative Tugarure umuco itegura imikino igaragaza uko kugera ibwami byabaga bigoye mu nzira hari abarinzi
Mbere y'uko ikintu cyose gikorwa ibwami, babanzaga kubaza umupfumu, agatera inzuzi akareba ko kizabahira
Phiona Mbabazi ushinzwe guhunda yo guteza imbere ubukungu n'umurimo arimo gusya, umwe mumirimo yakorwaga i Bwami
Ubwo iri tsinda ryageraga mu Murenge wa Rubengera rigiye gusura ahahoze urugo rwa Kigeri IV Rwabugiri
Umutware mukuru niwe watangaga ikaze ku bashyitsi bagiye kubonana n'umwami

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza