00:00:00 IGIHE NETWORK KN KINYARWANDA EN ENGLISH FR FRANCAIS

Imiti yica udukoko, inzobere zabyigiye: Ibituma Ingoro ya Rudahigwa na “Kambere” ziramba

Yanditswe na Dufitumukiza Salathiel
Kuya 9 Nzeri 2021 saa 03:21
Yasuwe :
0 0

Ingoro z’abami ni kimwe mu byitabwaho cyane mu bihugu byinshi kuko ziba zibumbatiye amateka akomeye n’umuco byabyo. Hakorwa ibishoboka byose kugira ngo zidata umwimerere wazo bigatuma ibisekuru bishya bitabasha gucengerwa n’ibyaranze abakurambere.

Uretse ako kamaro zigirira abenegihugu, ni na kimwe mu bikorerwaho ubukerarugendo cyane bikazana amadevize, tutibagiwe no gufasha abashakashatsi.

Nk’iyitwa Forbidden City y’Abashinwa ifatwa nk’iya mbere nziza ku Isi isurwa na miliyoni 14 ku mwaka. Kugira ngo umuntu mukuru umwe asure iyo Ngoro yabaye ubuturo bw’Abami 24 b’icyo gihugu, yishyura 9,99 $.

Kuyibungabunga biroroha kuko nubwo ari yo mu myaka ya kera yubakishijwe ibikoresho byinshi nk’ibigikoreshwa n’ubu. Yubatswe mu 1406 ariko magingo aya iracyakomeye.

Ingoro yatuwemo n’Umwami w’u Rwanda igihari ni imwe rukumbi. Ni iya Mutara III Rudahigwa iri mu Rukali rw’i Nyanza. Yubatswe mu buryo bwa kijyambere kuko yabayeho mu bihe by’abakoloni, bivuze ko yo kuyibungabunga bitagoye cyane. Yayitashye mu 1932.

Ku rundi ruhande, hari Urugo rwa Kinyarwanda ruhagarariye ingo z’abami babayeho mbere y’ubukoloni. Rwubatswe mu myaka ya 2000 hagendewe ku rwa Yuhi V Musinga kuko ari we wa nyuma muri icyo cyiciro.

Rugizwe n’inzu eshatu zubatse mu buryo bwa Kinyarwanda, zirimo inini izwi nka “Kambere” ifatwa nk’Ingoro y’Umwami n’izindi ntoya zitwa “Kagondo” zirimo iy’amata n’iy’inzoga.

Mu kiganiro cyihariye na IGIHE, Umuyobozi w’Ingoro yo mu Rukali, Gahongayire Yvonne, yavuze ko zubakishijwe ibiti by’inturusu, imigozi y’ibarakatsi, inshinge, uruguhu, n’imihotora.

Yagize ati “Kubungabunga izi nzu rero birakorwa, haba izi za Kinyarwanda cyangwa Ingoro ya Mutara wa III Rudahigwa.”

Zibungabungwa haterwamo imiti yica udukoko tumwe na tumwe dushobora kuzamo tukaba twateza ikibazo.

Umwihariko kuri Kambere

Nk’uko byasobanuwe haruguru, Kambere na za Kagondo zubatse mu buryo bwa Kinyarwanda. Kuziteramo imiti yica udukoko gusa ntibyaba bihagije kugira ngo zimare imyaka myinshi zigifite umwimerere.

Gahongayire yagize ati “Hari uburyo ducanamo hakazamo umwotsi uhoraho ariko nawo ukaba ari uw’ibyatsi byakoreshwaga na mbere. Bihumura neza ku buryo uwo mwotsi ubasha kwirukana udukoko.”

“Ikindi dukora ni ukuba twacunga ko hari ahava hagasanwa hakiri kare. Ni ibintu bihoraho kuko ubundi inzu y’ibyatsi ntiyamara igihe kingana n’icy’iy’amatafari ariko byose binaterwa n’uburyo yitaweho.”

Yasobanuye ko hari abashinzwe ako kazi by’umwihariko, bijyanye n’uko uretse izo nzu hari n’ibindi birango by’amateka byinshi “bigomba kwitabwaho kugira ngo n’abazadukomokaho bazabisange”.

Yatangaje ko abo bashinzwe bagenerwa amahugurwa ahoraho akabongerera ubumenyi bubafasha kurushaho kubikora neza.

Ayo amahugurwa atuma bamenya uko buri kirango cy’amateka cyitabwaho bitewe n’ibyo gikozwemo.

Mu itegurwa ry’ayo habaho imikoranire n’ibigo birimo n’ibyo mu mahanga.
Gahongayire yatangaje ko hari Kaminuza zo mu Ntara ya Rhénanie-Palatinat yo mu Budage zitegura amahugurwa zigafata bamwe muri abo bakozi bitewe na serivisi irimo guhugurwaho.

Yakomeje ati “Hari n’umwe dukorana wigeze guhugurwa n’abo mu Nzu Ndangamurage y’u Bwongereza. Ni ibintu baba barize mu ishuri ntabwo ari ibyo bahimba. Kumenya uko ubungabunga urubaho cyangwa ikindi kikagumana umwimerere wacyo baba barabyize.”

Umushinga wo kwagura Urukali wamaze gukorerwa inyigo
Mu ntangiriro za Gashyantare, Umuyobozi w’akarere ka Nyanza, Ntazinda Erasme, yabwiye IGIHE ko batangiye umushinga wo kubaka umudugudu Ndangamuco (Nyanza Cultural Village) no kwagura Urukali.

Gahongayire yemeje ko inyigo y’umushinga wo kwagura Ingoro y’Amateka y’Abami hubakwa urugo nyarwo rw’umwami mu Rukali yarangiye. Ruzubakwa hagendewe ku rwa Yuhi V Musinga rwari rugizwe n’inzu 36.

Yongeyeho ati “[Inzu zizubakwa] zishobora kutagera kuri 36 bitewe n’ahantu uko hangana. […] Aho kuzishyira hahagije ntabwo haboneka ariko zizaba zirenga 10 ku buryo zizajya zinabyazwa umusaruro mu buryo buzagenwa nyuma zimaze kubakwa. Nazo zizaba zubatswe mu buryo gakondo.”

Ikoreshwa ry’ikoranabuhanga mu Rukali

COVID-19 yatumye inzego zitandukanye zimakaza ikoranabuhanga hirindwa ko ibikorwa byahagarara bitewe no kwirinda guhuriza abantu benshi hamwe nk’isoko y’ikwirakwizwa ryayo.

Ubukerarugendo ni kimwe mu bihuza abantu benshi, ari nayo mpamvu bwasubiye inyuma cyane muri iyi myaka y’icyorezo.

Nko mu Rukali hasuwe n’abababarirwa mu 41.292 mu 2017-2018, mu 2018-2019 bariyongera baba 65.017. Byageze mu 2019-2020 baraganuka bagera ku 35.965, naho muri 2020-2021 hamaze gusurwa n’abagera ku 7.910 gusa.
Gahongayire yahishuriye IGIHE ko hari gutegurwa uko abashaka kuhasura babikora batahageze ahubwo hakifashishwa ikoranabuhanga.

Yagize ati “Gahunda irahari y’uko habaho uburyo bwo gusura Inzu Ndangamurage binyuze ku ya kure (online). Abashinzwe iby’ikoranabuhanga barimo kubikoraho nibirangira nabyo bizajya ahagaragara.”

Yashishikarije Abanyarwanda gusura Urukali bakarushaho kumenya amateka n’umuco by’abakurambera, bityo n’iterambere riza bakajyana naryo bamenya ibyo bashungura.

Inzu Umwami Rudahigwa yari atuyemo nayo iri mu zibungabungwa nubwo yubatse kijyambere
Iyi nzu hifashishwa imiti ya buri gihe kugira ngo ihorane umwimerere, hatagira udukoko tuyangiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .