Inkomoko y’Insigamugani:Yatanze Rwantorero

Yanditswe na Nsanzabera Jean de Dieu
Kuya 7 Kanama 2019 saa 04:31
Yasuwe :
0 0

Uyu mugani bawucira ku muntu bumvise yitaranga bidakwiye, nyuma bikamugaruka; ni we banegura bagira ngo “Yatanze Rwantorero” Wakomotse ku munyagisaka witwaga Rwantorero; ahasaga umwaka wa 1312.

Rwantorero uwo yabayeho ku ngoma ya Ruganzu Bwimba, igihe Abasinga batinyiriye ingoma; nyirarume wa Ruganzu Nkurukumbi amaze kwihadika intugunguru avuga ko yazanye amagara atashobora gutabara. Ubwo Robwa mushiki wa Ruganzu yari amaze kurongorwa na Kimenyi Musaya umwami w’i Gisaka.

Mu irongorwa rye akaba yarajyanye n’umugabo Mukubu wa Mushyoma, (Urukubanzoka mugabo wiciwe mu mariba ya Rwishwima), amuhaweho indongoranyo. Bamaze kugera i Gisaka, Kimenyi atonesha Mukubu cyane. Mukubu na we mu bo asanze i Gisaka abana cyane n’umuhungu witwaga Rwantorero, bituma Robwa na we akunda uwo muhungu cyane. Haciyeho iminsi Robwa yoherereza nyina na musaza we amaturo ashorejwe na Mukubu na mugenzi we Rwantorero.

Bagejeje amaturo mu Rwanda bavuga ubutumwa, barangije bakomeza ibiganiro. Rwantorero akaba ingenzi mu magambo; araganira cyane bimukundisha Ruganzu.

Bukeye bamaze gusezera ngo batahe, Ruganzu atuma Mukubu ati “Ugende umbwirire Robwa uti yarabashimye cyane, kandi arabasaba ko nimugira icyo mushaka kumutumaho muzajya mutuma Rwantorero”. Intumwa zirasezera zirataha. Zigeze i Gisaka zivuga ubutumwa zashohoje n’ubwo zigarukanye. Baburangije Mukubu ati “Andi magambo natumwe na Ruganzu ni ay’uko ngo muramutse mugize icyo mumutumaho mwazajya mutuma Rwantorero”.

Hacaho iminsi, Ruganzu yoherereza mushiki we amaturo; ajyanwa na Mugarura Sekabote w’Umutsobe, wari utuye i Kinyambi cya Runda na Gihara ho mu Rukoma. Kinyambi iyo ni ya yindi bavugaho ngo “Umugabo ntari kure ari i Kinyambi!”

Nuko Mugarura aragenda atanga amaturo aragaruka. Haciyeho indi minsi, na none Robwa yohereza amaturo; noneho ashorerwa na Rwantorero nk’uko Ruganzu yabisabye. Ayagejeje ibwami arayerekana; ayerekana neza muri bwa bugeni bwe.

Ruganzu yumvise amagambo avuga biramushimisha kurusha ubw’amambere; abaza Rwantorero, ati “Uwakwisabira Kimenyi akaguhaka wabikunda?” Rwantorero ati “sinabyanga”. Ruganzu, ati “Na Kimenyi aramutse atanadukundiye ndagusaba ko nzaguhaka kandi nzagukiza”. Umugambi bombi barawunoza. Bamaze kuwuzuza, Rwantorero arasezera arataha.

Ngo haceho iminsi, Ruganzu yoherereza Kimenyi inka ebyiri z’imbyeyi zo gusaba Rwantorero ngo amuhake. Intumwa igeze i Gisaka yerekana inka. Kimenyi n’Abanyagisaka barazishima cyane.

Intumwa ya Ruganzu iba iboneyeho ijambo; iraterura, iti “Ruganzu yampaye izi nka nkuzaniye kugira ngo agusabe Rwantorero amuhake: ngo aramukunda mugirire ubuntu umumuhe”. Kimenyi amaze kumva ayo magambo asubiza iyo ntumwa, ati “Ugende umbwirire Ruganzu uti Rwantorero ni umugaragu we akunda cyane ntabwo yamuguha. Uti ahubwo urebe ikindi umusaba naho we sinamutanga”.

Ibyo byose babivugaga Robwa mushiki wa Ruganzu abyumva. Amaze kubyumva arababara, kuko Kimenyi yimye musaze we icyo akunda. Yihererana umugabo we aramubwira, ati “Uhemukiye umwami mugenzi wawe, kuko umwimye icyo agusabye.” Bavuga ko Ruganzu na mushiki we babigiriraga imigambi y’ubucengeri, kuko bombi bari abacengeri.

Kimenyi yumvise amagambo umugore amubwiye bimutera akantu biturutse ku bukundwakazi. Yemera guha Ruganzu Rwantorero. Azana n’iyo ntumwa. Ruganzu abakubise amaso biramushimisha, kuko abonye uwo yifuzaga.

Intumwa yerekana Rwantorero ivuga n’uko Kimenyi yamumuhaye. Ruganzu ahita agabira Rwantorero Rukoma yose. Yubaka Gishyeshye ku ka Rubare.

Nuko amaze kugabana Rukoma, aba umutoni wa Ruganzu asigiye na Rugina w’umusinga wari mubyara wa Ruganzu. Bukeye Rwantorero amaze kumutambutsa ubutoni, amugirira ishyari amusabana ibye avuga ko ari umugome wanga Ruganzu. Igihe Ruganzu atarabimuha, nyirarume Nkurukumbi yihadika intugunguru avuga ko yazanye amagara adashobora gutabara; naho kwari ukwanga gutabarira ingoma nyiginya kandi we ari umusinga!

Ruganzu amaze kumva ko nyirarume atinyiriye ingoma yiyemeza kuyitabarira we ubwe. Ariko agenda rubanda batabizi, bazi ko ari ugutambagira u Rwanda rwe gusa. Byari bizwi n’abiru na Rwantorero bonyine. Ruganzu akiri mu nzira ataragera i Gisaka, Rwantorero aramwegera, ati “Ese mugiye mugenje mute kuri bya bintu bya Rugina nabasabaga?” Ruganzu aramwihorera. Noneho Rwantorero abonye ko undi amunaniye, ararika inshuti ze; arazibwira ati “Buriya Ruganzu atabaye bucengeri (ubutazagaruka) kandi nari naramusabye ibintu bya Rugina, none agiye gutanga atabimpaye. None nimuce hasi dufatanye turege Rugina asige amutanze.”

Rwantorero amaze kumena ibanga atyo, noneho rubanda bose bamenya ko Ruganzu atabaye bucengeri. Ibwami n’abiru bagumya kubaririza icyabibamenyesheje. Hagati aho Rugina amenya ko ari Rwantorero; aba abonye urwaho rwo kwihimura aca hasi n’inshuti ze babibwira abiru; bati “Ibi byose mwumva byaciye igihugu umugongo byaturutse kuri Rwantorero wasabaga ibya Rugina, akaba ashaka ko Ruganzu asiga amaze kubimuha kandi anamutanze”.

Nuko abiru n’ibwami barabyemera; babyemezwa n’uko bazi ko Rwantorero ari we wari ubizi kuko yari umutoni w’akadasohoka wicara mu bitaramo by’abiru. Bemeza ko atangwa Ruganzu ataratabara.

Ruganzu yemera kumutanga kandi yamukundaga, ahamagara rubanda n’abakuru, bamaze guterana aramutanga amujijije amazimwe ye. Rwantorero arapfa apfana n’umuryango we wose. Uwaba ngo yararokotse ni umukobwa we witwaga Nyirakamagaza, wari warashyingiwe mu Basengo b’i Gishyeshye; akaba nyirakururuza w’Abasengo b’aho bakivugwa na magingo aya.

Kuva ubwo rero abantu bagwa mu kantu barumirwa; bakajya bavuga ngo:”Ruganzu yatanze Rwantorero ku bw’ubwitarange bwe”. Kuva ubwo rero rubanda batangira kubikwiririkanya mu mvugo, bivamo umugani baneguza uwitaranga wese bati “Naka yatanze Rwantorero” (Yitaranze ubwe).


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza