00:00:00 IGIHE NETWORK KN KINYARWANDA EN ENGLISH FR FRANCAIS

Bitangira ari inzozi: Urugendo rw’inzitane rwa Harindimana watangiye ishoramari ku myaka 21

Yanditswe na Ntabareshya Jean de Dieu
Kuya 17 Ugushyingo 2021 saa 12:36
Yasuwe :
0 0

Ahakomeye niho hava amakoma, iyi ni imvugo ikunze gukoreshwa mu gushishikariza abantu kwihangana no mu bihe babona ko batangiye gucika intege no gusubira inyuma mu bikorwa binyuranye bari gukora by’umwihariko ibirebana n’iterambere.

Ku rubyiruko iyi ni imvugo ikwiye kuba umusemburo wo kugera ku ntego kuko abenshi muri rwo batangira ibintu runaka bagamije kugera ku iterambere bahura n’imbogamizi bagacika intege n’ibyo bakoraga bakabitera umugogo.

Harindimana Aphrodis, umusore w’imyaka 24 watangiriye ku bitekerezo gusa, kuri ubu amaze gushinga imizi mu ishoramari rishingiye ku ikoranabuhanga binyuze mu gutumiza ibicuruzwa mu mahanga nko mu Bushinwa ndetse no gufasha abifuza kwiga mu mahanga.

Mu kiganiro na IGIHE yagaragaje urugendo rwe mu ishoramari, aho yashinze ikigo cyitwa Be Mirror Empire.

Be Mirror Empire Ltd (BME Ltd) ni ikigo cyifashishwa n’abatari bacye batumiza ibicuruzwa mu mahanga cyane cyane mu Bushinwa. gifite umwihariko wo kuba cyita ku bayigana mu buryo bwihariye, kubaha serivisi nziza ndetse no kwita kukurinda icyizere bagirirwa.

Harindimana yatangiye akiri muto, ariko aza gutinyuka nubwo yahuraga n’imbogamizi zinyuranye zirimo no kuba ari muto kuri bamwe icyizere yagirirwaga kikagabanyuka.

Yavuze ko yatangiriye ku gitekerezo ubwo yigaga mu mwaka wa mbere mu Bushinwa atekereza uko yahuza Abanyarwanda n’isoko ryo mu Bushinwa ndetse n’abifuza kwigayo akababera umuranga.

Ati “Natangiriye ku gitekerezo, buriya iyo ufite igitekerezo birashoboka byose. Narabitekerezaga ariko nkibaza uko byagerwaho bikanyobera. Ariko aho ntangiriye mu 2018 natangiye ndi mu Bushinwa nayo yari indi mbogamizi cyane ko n’Abanyarwanda bari batarahindura imyumvire ngo bumve ko ibyo bintu bishoboka koko.”

“Uyu munsi tumaze gushinga imizi kuko dufasha abantu benshi kubona ibikoresho by’ikoranabuhanga (telefoni, Camera n’ibindi) ndetse n’abanyeshuri bashaka kwiga mu mahanga.”

Yakomeje avuga ko iki kigo yashinze gishyira imbere kwita ku bakiliya. Ati “Umwihariko wacu ni ukurinda icyizere tugirirwa kandi twebwe dukunze gukoresha ijambo ngo nitwe twenyine, bivuze ko ari twe tubagezaho serivisi nziza kandi twibanda gukorera abakiliya bacu ibishoboka byose kugira ngo turinde icyo cyizere batugiriye.”

Uyu musore w’imyaka 24, amaze kugera kuri byinshi ku myaka mike, mu minsi itari myinshi amaze mu ishoramari. Aha niho ahera asaba buri wese uri mu ishoramari by’umwihariko urubyiruko kugira umutima ukomeye.

Ati " Mu by’ukuri nahuye n’imbogamizi nyinshi ariko hamwe no kudacika intege no kumenya icyo nshaka, narakomeje none ubu rwose ndashima Imana. Kuri ubu twaragutse ndetse usanga abantu batugana cyane.

Urubyiruko rwinshi rukunze kugaragaza ko rwabuze amahirwe yo kwiteza imbere, rimwe na rimwe rugatanga inzitizi y’igishoro ariko Harindimana avuga ko atari byo ahubwo ko biterwa no gushaka kuba uwo utariwe.

Kuri ubu Be Mirror Empire igeze kure kandi afite gahunda ko mu minsi iri imbere azaba yaguye ishoramari ku buryo bugarara, ikagira amashami hirya no hino mu gihugu ndetse n’i mahanga nk’uko n’ubundi bakorana na sosiyete z’ubucuruzi mu Bushinwa bakabasha kohereza ibintu mu bihugu byo mu Burayi.

Afite intego yo kuba iki kigo cye cyaba icya mbere gifasha Abanyarwanda gutumiza ibicuruzwa mu mahanga.

Harindimana yasabye abagana Be Mirror Empire gukomeza uwo muhate no gukomeza kuyigirira icyizere kandi bakarushaho gukundisha bagenzi babo ibyiza babonye bijyanye na Serivisi zinoze bahabwa.

Yakomeje agira ati “N’uwaba yumvise The Mirror Empire ku nshuro ya mbere ndamusaba kugira ngo atugirire icyizere, atugane tumufashe muri serivisi zitandukanye. Hari amaduka menshi n’abacuruzi bakomeye muri uyu mujyi dukorana nabo kandi banyurwa n’imikorere yacu.”

Yongeye kwibutsa urubyiruko ko amahirwe rufite ari ubuto bwarwo kandi rwari rukwiye kuyabyaza umusaruro rutaragera mu zabukuru rubure imbaraga zo gukora.

Yanasabye abakuru kwizerera mu rubyiruko kuko narwo rushobora gukora ibintu bisobanutse kandi bifite icyerekezo kizima mu gihe rwahawe umwanya.

Kuri ubu Be Mirror Empire ikorera mu Mujyi wa Kigali, mu Karere ka Gasabo mu Murenge wa Gisozi mu nyubako ya Gisozi Samantha house gusa inzozi za Harindimana ni uko bagira amashami hirya no hino mu gihugu mu rwego rwo gufasha abanyarwanda bakora ubucuruzi.

Harindimana Aphrodis ku myaka 21 yatangije ikigo gifasha Abanyarwanda kurangura mu mahanga
Be Mirror Empire Ltd ifasha n'abashaka kujya kwiga mu mahanga kubona ibigo
Harindimana yasabye urubyiruko gutinyuka
Be Mirror Empire Ltd ifasha abantu kurangura ibikoresho bitandukanye byiganjemo iby'ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .