00:00:00 IGIHE NETWORK KN KINYARWANDA EN ENGLISH FR FRANCAIS

Yabuze umubyeyi akiri muto, yiga bigoranye: Urugendo rwa Mukunzi Christophe warokotse Jenoside

Yanditswe na Mihigo Saddam
Kuya 11 April 2022 saa 09:35
Yasuwe :

Kenshi iyo umuntu ari muto, agira inzozi zo kuzaba umukinnyi w’icyamamare mu mukino runaka. Nubwo bisa nk’ibyoroshye, ariko kuba uwabigize umwuga ntabwo ari ikintu cyoroshye, ku buryo mu mikino myinshi, abari munsi ya 2% by’abagerageje gukina nk’abanyamwuga ari bo bonyine babona ayo mahirwe.

Mukunzi Christophe ni umwe mu babashije kugira ayo mahirwe mu Rwanda. Yarakinnye agera ku rwego rwo kubigira umwuga ndetse agera no hanze y’u Rwanda, by’akarusho aba na Kapiteni w’Ikipe y’Igihugu ya Volleyball.

Urebeye inyuma, Mukunzi yabashije kugera kuri byinshi byifuzwa na benshi, icyakora ibi ntibivuze ko urugendo yanyuzemo rworoshye, dore ko ari umwe mu barokotse Jenoside yakorewe Abatutsi mu 1994.

Uyu mugabo w’imyaka 33, kuri akinira APR Volleyball Club. Ni umwe mu Banyarwanda bazwi cyane muri uyu mukino. Iyo muganira, ntabura kukubwira ku buryo ababazwa no kuba atagira se umubyara wakabaye ari kwishimira intambwe umuhungu we agezeho yiteza imbere, iyo ataza kwicwa muri Jenoside yakorewe Abatutsi.

Uyu mugabo yarokotse ari kumwe na nyina n’abavandimwe be batatu, maze kimwe n’abandi bantu benshi muri icyo gihe, urugendo rwo kwiyubaka rutangira rugoranye nubwo rwaje gushoboka.

Mukunzi wavukiye mu yahoze ari Kibuye, ubu ni mu Karere ka Karongi, yagombaga kwiga nyuma yo kurokoka Jenoside, nk’uko umubyeyi we yahoraga abivuga, ariko ibi ntabwo byari byoroshye kuko byasabye ko umubyeyi yari asigaranye akubita inzu ibipfunsi kugira ngo uyu mugabo n’abavandimwe be bashobore kugana ishuri.

Uku kugorwa n’ubuzima ndetse no gutakaza umubyeyi muri Jenoside, ni ingaruka zageze kuri Mukunzi n’umuryango we, uretse ko waje gukotana ukiteza imbere.

Yagize ati “Ingaruka Jenoside yangizeho, icya mbere navuga ku myigire n’ubuzima busanzwe, kuko twize tugoranye ku mukecuru, kuko twari abana bane agomba kutwitaho. Ntabwo byari byoroshye, nawe ubuzima bwari bumugoye cyane. Kugira ngo aturere turinde dukura kugera ubwo tungana uku, twabaga mu miryango itandukanye kubera ubushobozi butari buhagije."

Nubwo bitari byoroshye, umubyeyi wa Mukunzi wari usigaye yanze ko abana be babura amahirwe yo kwiga, ndetse uyu musore yaje gukomereza amashuri yisumbuye muri Groupe Scolaire Birambo, aza no kwiga ku Ruyenzi muri ISETAR ari nako akomeza kwerekana impano ye muri Volleyball, nubwo icyo gihe nta nyungu yari yakabonye muri uyu mukino.

Ntabwo byari byoroheye umuryango wa Mukunzi kuko watinyaga ko uyu musore ashobora kwirundumurira mu mikino akananirwa ishuri. Ni yo mpamvu uyu muryango wahoraga umushishikariza kureka iby’imikino agashyira imbaraga mu ishuri.

Icyakora impano yari muri uyu musore ntiyamuhaye agahenge, kuko yakomeje gukina ku rwego rwo hejuru kugeza ubwo Kigali Volleyball Club (KVC) imurabutswe mu 2006, itangira kumuha amahirwe yo kuyitorezamo.

Kubera impano idasanzwe yagaragaje, mu 2007 Mukunzi yatangiye gukinira iyi kipe mu mikino ya Shampiyona ku myaka 18 gusa, mu 2010 yitabiriye Igikombe cya Afurika cy’abatarengeje imyaka 20 (U-20) cyabereye muri Libya, ari nabwo ikipe yo muri Libya yamubengutswe ajya gukina muri Shampiyona y’icyo gihugu ari kumwe na Dusabimana Vincent uzwi nka Gasongo.

Icyakora uru rugendo ntirwamuhiriye kuko akigera muri Libya, iki gihugu cyahise cyinjira mu bihe by’intambara yakomeje guca ibintu kugeza ubwo uyu musore ahisemo kugaruka mu Rwanda, uretse ko urugendo ruva muri icyo gihugu narwo rutari rworoshye.

Ati ’’Nubwo Jenoside yabaye nkiri umwana, ariko muri Libya bibaye nari nzi ko birangiye...nkavuga nti ‘ubu birarangiye’ kuko nari mukuru nzi n’ubwenge mbona ibintu byose, byari biteye ubwoba. Ku bw’amahirwe n’Imana, turongera dutaha amahoro, twaritegeye turataha.”

Yakomeje agira ati “Ntabwo twari dutuye kure y’ikibuga cy’indege, kuva mu nzu twabagamo twashatse taxi tuyitega saa kumi za mu gitondo, kuko umushoferi yaratubwiye ati ‘mu ma saa kumi nibwo abarwanyi baba bananiwe bagiye kuruhuka gake’, nibwo yadutwaye atugeza ku kibuga cy’indege ubundi tubona gutaha.”

Nyuma yo kuva muri Libya, uyu musore ntiyacitse intege, kuko yakomeje gukina nk’uwabigize umwuga mu bindi bihugu nka Algeria, Qatar, Turukiya, Bulgaria na Arabia Saoudite.

Mukunzi Christophe ni Kapiteni w'Ikipe y'Igihugu ya Volleyball

Agahinda gakomoka kuri Jenoside yakorewe Abatutsi

Mukunzi yishimira ibyo yagezeho nyuma ya Jenoside yakorewe Abatutsi, ariko akababazwa n’uko atabashije gusangira n’umubyeyi we kuri iryo terambere.

Yagize ati "Mpamya ko umubyeyi ari we muntu wa mbere ushobora kwishimira ikintu ugezeho...iyo umusaza wacu aba akiriho, ndumva yari kwishimira ko ari kubona umuhungu we ari umukinnyi wabigize umwuga, cyangwa ari Kapiteni w’Ikipe y’Igihugu. Birakubabaza ariko nk’uko tuvuga ngo ababyeyi bacu aho bari bishimira abo twabaye bo, nanjye iyo mpagaze aha, byanze bikunze mvuga ngo ndi Kapiteni w’Ikipe y’Igihugu cyangwa ndi umukinnyi wabigize umwuga, biranshimisha nkumva nanjye hari ishema muhesha, nubwo wenda yagiye atabizi. Umuntu agomba kubiharanira, kugira ngo ashimishe uwo akomokaho.”

Avuga kandi ko uretse kwiteza imbere mu buzima busanzwe na cyane ko ari umugabo wubatse, ikindi akesha Volleyball ari uko yamufashije kwibagirwa ibibazo yatewe na Jenoside.

Mu rugendo rwo kwiyubaka, uyu mugabo ashimira cyane Muhizi Giramata Nice bashakanye, akavuga ko yamufashije gucunga neza umutungo kuko yahoze asesaguraga mu buto bwe, yaba mu bihe yakinaga nk’uwabigize umwuga cyangwa ari mu biruhuko mu Rwanda.

Urugendo rwa Mukunzi Christophe mu mukino wa Volleyball

Urugendo rw’umukinnyi wabigize umwuga kuri Mukunzi Christophe rwatangiye mu 2007 ubwo yari agiye mu Cyiciro cya Kabiri cy’Amashuri yisumbuye muri ISETAR.

Yatangiye gukina Volleyball ayishyizeho umutima aza kubengukwa na Jean Marie watozaga KVC, na yo atangira kuyikinira mu 2008, aho yamazemo imyaka ibiri akanayihesha ibikombe bya ‘Carre d’AS’ na ‘KAVC Memorial Tournament’, begukanye bakuye i Kampala muri Uganda mu 2009.

Mu 2010 yerekeje muri Tarsana Club yo muri Libya ariko ntiyayitindamo kuko yahise agaruka muri KVC kubera ibibazo by’intambara. Mu 2011 yerekeje muri Blida Club yo muri Algeria ayikinira umwaka umwe mbere yo kujya muri Al Arabi Sports Club yo muri Qatar nayo yamazemo umwaka umwe.

Hanze y’u Rwanda kandi yakiniye amakipe arimo El Fanar Ain-Azel Club yo muri Algeria, Payas Belediye Sport Club yo muri Turukiya, Marek Union-Ivkoni yo muri Bulgaria na Al-Mooj VC yo muri Arabie Soudite.

Mu 2017 ni bwo yagarutse mu Rwanda asinyira Gisagara VS ayikinira umwaka umwe, ayivamo yerekeza muri REG VC nayo yakiniye umwaka umwe mbere yo kujya muri UTB VC yakiniye umwaka umwe. Kuri ubu ari muri APR Volleyball Club.

Kuva mu 2010, Mukunzi ni umukinnyi w’Ikipe y’Igihugu y’u Rwanda.

Mukunzi yatangiye gukinira Ikipe y'Igihugu mu 2010
Mukunzi yakinnye mu makipe atandukanye arimo na REG VC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .