00:00:00 IGIHE NETWORK KN KINYARWANDA EN ENGLISH FR FRANCAIS

Ubuzima bwa Niyogisubizo wavukiye mu mashyamba ya Congo aho agereranya n’ikuzimu

Yanditswe na Prudence Kwizera
Kuya 2 Ukwakira 2021 saa 07:14
Yasuwe :
0 0

Niyogisubizo Léandre w’imyaka 21 y’amavuko yanyuze mu buzima bushaririye kuko ni Umunyarwanda wavukiye mu mashyamba ya Repubulika Iharanira Demokarasi ya Congo ubwo ababyeyi be bari impunzi.

Uyu musore kuri ubu atuye mu Murenge wa Kinazi mu Karere ka Huye aho abana na nyina nyuma yo guhunguka mu 2019. Ni umwe mu banyeshuri 246 basoje amasomo y’imyuga mu mashuri y’ubumenyingiro mu Rwanda ku ya 1 Ukwakira 2021.

Uyu musore yaganiriye na IGIHE asobanura ubuzima bubi yisanzemo akimara kuvukira mu mashyamba ya Congo n’uko batahutse mu Rwanda bagasanga ni igihugu cyiza kandi barabwirwaga ko ari ahantu habi.

Yavuze ko yavutse mu 2000 mu mashyamba ya Congo nyuma baza kwerekeza mu nkambi yo muri teritwari ya Walungu.

Ati “Bwari ubuzima bubi cyane nahagereranya n’ikuzimu ariko kuko ari bwo twari twaravukiyemo twarabyakiriye.”

Bitewe n’uko aho babaga hari Abanyarwanda benshi, abasha kuvuga Ikinyarwanda neza nta gutegwa ariko muri ayo mashyamba ntabwo yabashije kwiga.

Avuga ko ababyeyi babashyiraga hamwe ari abana kugira ngo babigishe kwandika no gusoma gusa ntabyo kuvuga ngo barashyiraho ishuri.

Abajijwe niba ababyeyi babo cyangwa abandi babanaga barababwiraga u Rwanda, yasubije ko bababwiraga ko ari igihugu kibi kibamo ubwicanyi.

Ati “Batubwiraga ko u Rwanda ari igihugu kitameze neza, nta mutekano urimo. Bakavuga ko Umuhutu ugeze mu Rwanda ahura n’ibibazo bakaba bamugirira nabi.”

Kuri ubu Niyogisubizo afite nyina gusa kuko Se na bakuru be babiri bapfiriye mu mashyamba ya Congo.

Mu 2019 ni bwo we na nyina hamwe n’abandi Banyarwanda babanaga mu nkambi batashye mu Rwanda barakirwa bahita bajyanwa mu Kigo cya Mutobo kinyuzwamo abatahuka bitandukanyije n’imitwe yitwara gisirikare iri mu mashyamba ya Congo.

Ati “I Mutobo twarahageze baduha amahurwa badukuramo imyumvire twari dufite mbere batwinjiza mu buzima busanzwe mu Rwanda, batubwira ko tugomba kwitwara neza batwigisha no kwihangira umurimo.”

Niyogisubizo avuga ko ageze mu Rwanda yatunguwe no gusanga ari igihugu cyiza gifite umutekano kandi abayobozi bita ku mibereho y’abaturage.

Agaruka ku buzima babagamo mu mashyamba yavuze ko bwari bugoye cyane kuko buri munsi bahungaga intambara bakabona abantu bicwa ariko bakimara kugera mu Rwanda batangiye kubaho mu mutuzo.

Ati “Ubu ndarya nkaryama umutekano ni wose, nko mu myaka igera kuri itatu maze mu Rwanda ntabwo ndumva isasu ariko muri Congo byabaga bikomeye tugahora duhunga, uyu munsi twaraye aha ejo twimutse twagiye ahandi kubera intambara, ntabwo bwari ubuzima bwaroshye.”

Yize umwuga wo gusudira mu gihe cy’amezi atandatu abifashijwemo na Komisiyo y’Igihugu yo gusezerera no gusubiza mu buzima busanzwe abari abasirikare. Yemeza ko umwuga yize uzamufasha kugira ejo hazaza heza.

Ati “Iyo ndebye ejo hazaza hanjye mbona ari heza kuko umwuga nigiye hano uzamfasha gutera imbere. Ubu twamaze gushinga n’itsinda ry’abantu dutuye mu murenge umwe kugira ngo dutangire gukora kuko baduhaye n’ibikoresho.”

Mu Murenge wa Kinazi mu Karere ka Huye aho abana na Nyina ni ho Se yakomokaga.

Yasabye Abanyarwanda bakiri mu mashyamba kwihutira gutaha bakaza mu Rwanda bagafatanya n’abandi kwiteza imbere no kubaka igihugu kuko aho bari bari gutakaza umwanya wabo.

Perezida wa Komisiyo y’Igihugu yo gusezerera no gusubiza mu buzima busanzwe abari abasirikare, Nyirahabineza Valerie, yavuze ko kwigisha abatahutse imyuga n’ubumenyingiro bigamije kubafasha kwibeshaho no kuzagira ahazaza heza.

Ati “Ni ukugira ngo nibasubira mu miryango bajye kwihangira imirimo ndetse bajye no ku isoko ry’umurimo bashake akazi, kugira ngo babashe kwiteza imbere bo n’imiryango yabo ndetse n’igihugu muri rusange.”

Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho myiza y’Abaturage, Nyirarukundo Ignatienne, yasabye abasoje kwiga imyuga kujya gukoresha ubumenyi n’ibikoresho bahawe bakiteza imbere.

Yabasabye no gushishikariza abavandimwe babo na bagenzi babo bakiri mu mashyamba gutahuka mu Rwanda kugira ngo baze gufatanya n’abandi kubaka igihugu no kugiteza imbere.

Niyogisubizo Léandre w’imyaka 21 y’amavuko yanyuze mu buzima bushaririye kuko ni Umunyarwanda wavukiye mu mashyamba ya Repubulika Iharanira Demokarasi ya Congo
Niyogisubizo ni umwe mu banyeshuri 246 basoje amasomo y’imyuga mu Rwanda ku ya 1 Ukwakira 2021
Perezida wa Komisiyo y’Igihugu yo gusezerera no gusubiza mu buzima busanzwe abari abasirikare, Nyirahabineza Valerie, yavuze ko kwigisha imyuga abatahutse bigamije kubafasha kwibeshaho
Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho myiza y’Abaturage, Nyirarukundo Ignatienne, yasabye abasoje kwiga imyuga kujya gukoresha ubumenyi n’ibikoresho bahawe bakiteza imbere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .