00:00:00 IGIHE NETWORK KN KINYARWANDA EN ENGLISH FR FRANCAIS

Icyo ubushakashatsi bwerekana ku byiza byo kugira inshuti nke

Yanditswe na Zigiranyirazo Bajecteur
Kuya 11 April 2022 saa 08:32
Yasuwe :

Mu 2016 hari ubushakashatsi bwasohotse mu kinyamakuru cyitwa British Journal of Psychology, bwagaragaje ko abantu b’abahanga barushaho kwisumburaho mu bwenge no kugera ku ntego zabo iyo bafite umubare muto w’inshuti.

Abantu bashobora kutabyumva mu buryo bumwe bitewe n’uko inshuti nyinshi bazikesha ibyishimo cyangwa bakanagendera ku mvugo igira iti “ubwenge burarahurwa.”

Hatangwa impamvu nyinshi zishingirwaho mu kuvuga ko kugira inshuti nke bituma ubigize arushaho kuba umuhanga cyane.

Abahanga bavuga ko bidatunguranye kuko abantu b’abahanga bafite ubumenyi bwinshi n’ubushobozi bwo kubukoresha, badakunze kumarana umwanya wabo munini n’inshuti nyinshi kubera ko baba bahugiye ku ntego zabo z’igihe kirekire.

Mu buryo bwagutse, ibi ni bimwe mu biranga aba bantu hamwe n’impamvu zituma bakunda kugira inshuti nke.

 Bifasha gusobanukirwa abantu neza

Abantu b’abahanga bagira umwihariko mu gusobanukirwa no gutahura vuba imyitwarire y’abandi kuko akenshi baba bakunda kubitegerereza ku ruhande bakabasha kumenya vuba imigirire yabo.

Birinda kandi kuba bagira inshuti nyinshi kugira ngo bumve ko bakunzwe, ahubwo bagahitamo nke basobanukiwe neza mu kwirinda ko bajya batakaza igihe kinini bari kumwe n’abo bantu benshi bikagabanya umwanya wabo wo gushikama ku ntego zabo.

 Bituma babasha kuvuga bisanzuye

Abantu b’abahanga kubera kudahora mu kivunge cy’abandi bantu, bituma bagira ubushobozi bwo gushyira ibitekerezo byabo ku murongo neza kandi bakabasha kubitambutsa bashize amanga.

Imitekerereze yabo iba itandukanye n’iy’abandi icyakora ntabwo babangamirwa no kuba bakumva icyo abandi batekereza.

 Ntabwo bahorana amashyushyu yo kumva bacikanwe

Kubera kutimenyereza kuba mu bigare no kwiyumvisha ko ibyishimo byawe ugomba kubikomora ku nshuti nyinshi zaba izo ufite mu bigaragara cyangwa se inshuti zawe ku mbuga nkoranyambaga, bituma udahorana amashyushyu yo kumva ko hari ibiganiro wacikanwe bityo ukabasha gukora neza ibyo uhugiyeho udahuzagurika.

 Barashishoza

Kugira inshuti nke bifasha abantu kugira ubuhanga bwo kwibonera umwanya wo kwicara hamwe bakagira ubushishozi ku bintu bitandukanye.

Muri uyu mujyo ushobora kumusanga yicaye ari gusoma ibica ku mbuga nkoranyambaga ku buryo ashobora kuvaho amaze kubona ishusho y’ubuzima muri ibyo bihe.

Aba bantu kandi banigiramo ubushobozi bwo kudaha abandi icyizere badakwiriye.

 Ntabwo bakunda kwisanga mu makimbirane

Kubera kwirinda kuba mu bigare by’inshuti nyinshi bakizera ko bifitemo ibihagije kugira ngo babashe kubaho neza, bituma batisanga mu makimbirane ya hato na hato cyangwa ngo babeho bahangayikishijwe n’uko abandi babafata.

Ibindi bijyanye n’ubuhanga bw’abantu bafite inshuti nke, ni uko bumva ko batabereyeho kwemeza abandi, biyumva nk’abanyembaraga kandi bakumva bihagije n’inshuti nke bafite, bakumva bazizi neza ku buryo batagira impamyi yo kunguka inshuti nshya. Bakunda kandi kuvugisha ukuri bashize amanga ndetse imbaraga zabo zose bakazishyira ku ntego z’ubuzima baba barihaye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .