00:00:00 IGIHE NETWORK KN KINYARWANDA EN ENGLISH FR FRANCAIS

Kubera iki abagabo basigaye batinya abagore bisobanukiwe?

Yanditswe na Léana Bisa
Kuya 27 February 2022 saa 08:40
Yasuwe :

Muri iki gihe abantu bamwe basigaye bifata ku ngingo yo gushaka bitana bamwana ku bagore cyangwa abagabo bazima; mbese muri make hasigaye hari impaka nyinshi mu bituma abagabo n’abagore batumvikana iyo bageze mu rushako cyangwa mu rukundo.

Hari amagambo menshi twumva abagabo ndetse n’abagore bavuga iyo bashatse gusobanura uburyo abagore b’iki gihe bitwara.

Ni kenshi uzumva abantu bavuga ngo ‘abagore b’iki gihe ntibashobotse, ntiwababasha’.

Umwe mu bagabo twaganiriye yavuze ko bamwe mu bagore b’iki gihe baba bitwara nabi kandi bakitwaza iterambere.

Ati “Mpora mbona abagore bakuru basigaye bitwara nk’abakobwa bakiri bato, ugasanga bahora basohotse, bahora basinze, ese ibi ni byo abantu bagomba kwita iterambere? Iterambere ntirivanaho inshingano umugore n’umugabo bafite mu ngo.”

Ibyo naganiriye n’uyu muntu utarashatse ko dutangaza amazina ye byatumye nibaza nti ’ese iyo bavuze umugore uteye imbere cyangwa se uw’iki gihe baba bashaka kuvuga ba bandi birengagiza inshingano bakajya mu mico mibi?’

Umugore uteye imbere ntabwo ari abo muri iki gihe bita ‘slay queen’, bakunda amafaranga batakoreye ahubwo birirwa barya ayo bavanye mu bagabo no mu yindi mico mibi.

Iyo umuntu avuze umugore uteye imbere, ni ufite icyerekezo ashaka kujyanamo ubuzima bwe kandi ufite n’ubushobozi bwo kugira icyo yimarira adategereje gutungwa n’abandi.

Kuba abagore benshi baramaze kwisobanukirwa bakumva ko ubuzima bwabo budakwiye gushingira ku bagabo 100%, ni byo bamwe bagaragaza nk’impamvu ituma abagabo b’uyu munsi babatinya ndetse bakumva batashaka umeze utyo.

Umwe muri aba bagabo twaganiriye yagize ati “Ntibiramenyerwa ahantu hose ko ubu umugore atagitungwa n’umugabo.”

Yakomeje avuga ko “muri iki gihe abagore bose bifuza kwiteza imbere bagakira kandi bakagera ku rwego rwisumbuye. Kera mu gihe cyacu buri mugore wese yifuzaga gushaka akabyara ariko abagore b’ubu icyo bifuza ni amafaranga n’ubuzima bwiza.”

Ambwiye gutyo nahise nibaza niba koko ari ikintu kibi kuba umugore yashaka kwiteza mbere kurusha uko yakwifuza gushaka cyangwa se kubyara. Ese umugore witeje imbere agakira ntabwo yashaka?

Iki kibazo nagize nakiganirije inshuti yanjye Mugabo Kayiganwa Kessy ambwira ko bishoboka cyane ko umukobwa yatera imbere kandi akagira n’urugo rwiza.

Yambwiye ko nubwo bishoboka, hari igihe iyo umukobwa yibeshejeho nta muntu agira icyo asaba bibangamira abagabo bifuza kuba bakundana na we.

Ati “Iyo umukobwa amaze kugira aho agera biragora cyane ko umugabo yamwegera byoroshye, hari igihe yakumva bisebetse ko umukobwa amurusha amafaranga cyangwa akumva ko we nk’umugabo ntacyo yamumarira mu buzima; ibi si byo.”

Yahuje igitekerezo n’umwe mu bagabo twaganiriye wambwiye ko muri kamere y’abagabo bo muri Afurika bumva ari igisebo gushaka umugore ubarusha amafaranga, amashuri n’ibindi.

Ati “Abagabo barashaka abagore batabarenze gusa abagore bafite aho bageze ku rwego rwo hejuru nabo baba bashaka abagabo babarenze kandi ibi byose ntibyakunda.”

Ibi byose byerekana ko ikosa atari iry’umugabo cyangwa umugore witeje imbere. Ikibazo kiri mu myumvire abantu bamwe na bamwe bagifite itajyanye n’ibihe tugezemo.

Ubu ikizubaka si ubugufi cyangwa uburebure cyangwa amashuri n’amafaranga umwe arusha undi, ikizubaka ni ubufatanye no gukorera hamwe no koroherana kandi tukamenya ko nta wurusha undi inshigano ko ahubwo zisangirwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .