00:00:00 IGIHE NETWORK KN KINYARWANDA EN ENGLISH FR FRANCAIS

Jack Grealish ushinjwa guca inyuma umukunzi we yamuhaye impano idasanzwe

Yanditswe na Bukuru JC
Kuya 4 Mutarama 2022 saa 07:02
Yasuwe :

Rutahizamu wa Manchester City n’Ikipe y’Igihugu y’u Bwongereza, Jack Grealish, yajyanye umukunzi we Sasha Attwood n’umuryango we mu icumbi ryishyurwa 5000£ (agera kuri miliyoni 7 Frw) ku ijoro mu rwego rwo gushimangira urukundo rwe n’uyu mukobwa wamushinjaga kumutendeka.

Icumbi Grealish yakodesherejemo Sasha n’umuryango we riri ku rwego rw’inyenyeri eshanu ndetse rifite ibyumba bitanu byo kuryamamo n’ubwogero butandatu aho riri ku kirwa.

Rishobora kubamo abantu bagera kuri 14, rikagira aho kotera umuriro n’ubwato buto bufasha umuntu kujya no kuva ku nkombe z’ikiyaga.

Jack Grealish na Sasha w’imyaka 25, bagiye kuri The Lakes by Yoo (aho yamukodeshereje) muri Cotswolds mu rwego rwo kwizihiza isabukuru y’amavuko ya se w’uyu mukobwa.

Ibi byose byabaye nyuma y’uko Grealish w’imyaka 26 yashinjwaga guhura cyane n’umuhanzi Emily Atack w’imyaka 32 ndetse akandikirana kenshi n’undi witwa Amber Gill w’imyaka 24.

Hari uwabwiye ikinyamakuru The Sun ko umubano wa Grealish na Sasha wajemo agatotsi kubera kuvugana n’abandi bagore, byatumye amuhitishamo hagati ye na Emily Atack.

Ati “Habayemo agatotsi mu mwaka ushize ubwo Jack yakururanaga n’abandi bagore babiri. Gusa, kuva icyo gihe yagaragaje ko ahazaza he ari Sasha, yagombaga kumwereka ko amwitaho amukorera ikintu cyihariye ku isabukuru y’amavuko ya se.”

Yakomeje agira ati “Ni inzu y’agatangaza iri ahantu heza kandi yamubwiye ko ‘akomeje’. Bongeye kwishimirana kandi inshuti zabo zizeye ko noneho bizaramba.”

Jack Grealish na Sasha usanzwe umurika imideli, bombi bahuye bwa mbere bakiri mu myaka y’ubugimbi ubwo bigaga mu mujyi wa Solihull wo muri Midlands y’Uburengerazuba.

Kuva icyo gihe, barakundanye ndetse Sasha yarebaga imikino ya EURO 2020 uyu mukinnyi yakiniyemo u Bwongereza kugeza ku mukino wa nyuma.

Urukundo rwabo rwajemo agatotsi nyuma ubwo byahishurwaga ko Grealish ahura mu ibanga na Emily Atack aho yasanze uwo mukobwa aho atuye i Londres ndetse bakanahurira muri hoteli ihenze.

Bagenzi b’uyu mukinnyi bavuga ko Grealish yakundaga guhamagara Emily hafi ya buri munsi ndetse bahujwe n’umwe mu bo bakinana muri Manchester City.

Bivugwa ko Sasha yamuhaye gasopo agira ati “njye cyangwa we.”

Grealish yihariye ko ari we mukinnyi wahenze mu mateka y’umupira w’amaguru mu Bwongereza aho yaguzwe miliyoni 100£ ubwo yavaga muri Aston Villa yerekeza muri Manchester City muri Kanama 2021.

Emily yahagaritse gukurikira Jack Grealish ku mbuga nkoranyambaga ndetse bigaragara ko ashobora kuba yarabonye undi mukunzi nyuma yo gufotorwa afatanye mu kiganza n’umuririmbyi Zak Nimmo mu cyumweru gishize.

Amafoto yagaragaje kandi Zak w’imyaka 24 asoma ikirenge cya Emily Atack.

Jack Grealish yajyanye umukunzi we Sasha mu icumbi ryishyurwa miliyoni 7 Frw ku ijoro kugira ngo ashimangire ko amukunda
Sasha Attwood w'imyaka 25 asanzwe amurika imideli
Inzu ya The Lakes by Yoo aho Grealish yakodeshereje umukunzi we, hishyurwa 5000£ ku ijoro
Mu minsi ishize, Grealish yavuzweho gukururana na Emily Atack

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .