00:00:00 IGIHE NETWORK KN KINYARWANDA EN ENGLISH FR FRANCAIS

Ukuboko kwa Jolly, ubuhanuzi bwa Rugagi, ibanga ryo gutsinda: Ikiganiro na Miss Shanitah (Video)

Yanditswe na Mukahirwa Diane
Kuya 10 Mutarama 2022 saa 06:23
Yasuwe :

Umunyana Shanitah yizihije Noheli mu buryo budasanzwe. Uwo munsi mu 2021, yegukanye ikamba rya Miss East Africa ahesha ishema u Rwanda mu karere.

Umunyana asanzwe azwi mu marushanwa y’ubwiza bitewe no kuba yaritabiriye Miss Rwanda mu 2018 akegukana n’ikamba ry’igisonga cya mbere ndetse aza no kwitabira Miss Supranational mu 2019 arayegukana.

Mu kiganiro IGIHE yagiranye na Miss Shanitah yatangaje byinshi ku rugendo yagiriye muri Tanzania n’ibyo ateganya gukora mu gihe cy’umwaka azamara yambaye ikamba rya Miss East Africa.

Kuri we avuga ko gutsinda iri rushanwa ari inzozi zabaye impamo kandi ko itsinzi atari iye ku giti cye ahubwo ari iy’Abanyarwanda muri rusange.

Ati “Kuba Miss East Africa ni ibyishimo kuri njye, umuryango ndetse n’igihugu muri rusange, kuko ni intsinzi y’Abanyarwanda n’u Rwanda. Nari hariya nka Shanitah ariko nari mpagarariye u Rwanda bajya no kuvuga uwatsinze ntibamvuze bavuze u Rwanda rero ni ibyishimo ku gihugu nanjye ku giti cyanjye.”

Umunyana yitabiriye amarushanwa atandukanye y’ubwiza haba mu gihugu no hanze, kuri we avuga ko biri mu byamufashije kubasha kwegukana ikamba kuko hari ibyo yayigiyemo.

Ati “Kuba naranyuze mu marushanwa atandukanye mu myaka ishize ntekereza ko aribyo byanteguye kugira ngo ibi bizabe gutya, hari ibyo nigiyemo nakoresheje hariya mvuga ko aribyo byangejeje ku ikamba kuko nabashije kumenya kwitegura kurenza uko nabikoraga mu yandi marushanwa.”
Yakomeje avuga ko ikindi cyamufashije kwegukana iri rushanwa ari uko umuryango we wari umushyigikiye.

Ati “Mama yarishimye cyane! Njya no kugenda ni we wampaye imbaraga zo kwitabira arambwira ngo nabishobora ngende ngerageze ndebe uko bizagenda, yarishimye byari ishema ku muryango.”

Hari benshi batekereza ko kwitabira amarushanwa y’ubwiza ari ukujya kwerekana indoro n’ingendo gusa nyamara uru ni urubuga abakobwa bagaragarizamo ibyo bashoboye.

Kuri Miss Shanitah avuga ko kuba yaritabiriye amarushanwa atandukanye byamufunguriye amarembo binamwagura mu buryo bw’imitekerereze.

Ati “Amarushanwa y’ubwiza ni urubuga abakobwa bahabwa kugira ngo bumvikanishe ibitekerezo byabo, bagaragaze uko bumva ibintu. Ni urubuga rwangaragaje rumpa amahirwe atandukanye harimo no kuba narabashije gutangira ubucuruzi.”

“Kuva cyera nahoranye inzozi zo kuzaba umugore w’umucuruzi wiyubatse, aya marushanwa yamfashije kubigeraho kuko yatumye mbasha kwitinyuka ndetse mpura n’abantu batandukanye bamfasha muri uwo mushinga.”

Abakobwa bose bitabiriye Miss East Africa bari bafite imishinga itandukanye, Miss Shanitah umushinga we ni uguteza imbere uburezi bw’umwana w’umukobwa mu buryo bw’ikoranabuhanga.

Miss Shanitah avuga ko azakorana n’abakobwa bari kumwe mu irushanwa kugira ngo abashe kugeza umushinga we mu bihugu byose ndetse anasobanura ko yibanze ku bakobwa ngo nabo babashe kwiga.

Ati “Mu bakobwa twabanye mu mwiherero bose twabaye abavandimwe, nzafatanya nabo n’inzego z’uburezi zitandukanye mu bihugu byabo babashe kumpa abakobwa bakwiga ikoranabuhanga bahabwe amasomo akaba ari uburyo bwiza bwo kwerekana ibyo bashoboye bagateza imbere Afurika.”

Ukuboko kwa Jolly n’ubuhanuzi bwa Bishop Rugagi

Nyampinga w’u Rwanda mu 2016 Mutesi Jolly ni umuyobozi wungirije w’irushanwa rya Miss East Africa. Benshi batekereza ko kuba ari umuyobozi biri mu byafashije Miss Shanitah kwegukana ikamba.

Miss Shanitah avuga ko ntacyo Jolly yongereye ku tsinzi ye ahubwo yamuteye imbaraga zo gukora cyane ngo amuheshe ishema.

Ati “Kuba Jolly ari umunyarwandakazi byanteye imbaraga zo gukora cyane kugira ngo nk’umunyarwanda turi kumwe hariya, abashe kugira ishema ko Umunyarwanda mugenzi we yatsinze.”

“Ntaho nahuriye nawe mu ntsinzi ahubwo nakoze ibyo nagombaga gukora, we na bagenzi be bari mu kanama nkempurampaka bakoze ibyo bagombaga gukora.”

Mu 2018 ubwo Umunyana yahataniraga ikamba rya Miss Rwanda, Bishop Rugagi yamuhanuriye ko azegukana iri kamba ariko ubu buhanuzi ntibwahise busohora.

Ubwo yegukanaga ikamba rya Miss East Africa benshi bavuze ko bwa buhanuzi busohoye ndetse na Rugagi arabyemeza, ku ruhande rwa Miss Shanitah avuga ko iki cyari igihe cy’Imana.

Ati “Ubuhanuzi bwarasohotse, iyo igihe cy’Imana kigeze bya bintu biraba. Ntekereza ko cyari igihe cy’Imana cyari kigeze ubu.”

Umunyana Shanitah agiye kumara umwaka afite ikamba rya Miss East Africa arashishikariza abana b’abakobwa kwitinyuka bakitabira amarushanwa y’ubwiza ndetse n’abantu muri rusange bakabashyigikira.

Miss Shanitah niwe wegukanye ikamba rya Miss East Africa mu 2021/2022
Miss Umunyana Shanitah yavuze ko kwitabira amarushanwa menshi biri mu byamufashije kwegukana ikamba
Umunyana Shanitah yatangaje ko itsinzi ye ayitura Abanyarwanda n'u Rwanda
Miss Shanitah avuga ko kuba Jolly ari umuyobozi byatumye akora cyane ngo amuheshe ishema

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .