00:00:00 IGIHE NETWORK KN KINYARWANDA EN ENGLISH FR FRANCAIS

Covid-19 iravuza ubuhuha i Burayi; abarenga 700.000 bashobora gupfa bitarenze Werurwe

Yanditswe na Muhonzire Sylvine
Kuya 24 Ugushyingo 2021 saa 09:42
Yasuwe :
0 0

Coronavirus ikomeje kototera ibihugu by’i Burayi ndetse bimwe byatangiye gushyiraho amabwiriza akarishye yo kwirinda ikwirakwira ryayo harimo n’ibyatangiye gushyiraho Guma mu Rugo nka Autriche.

Ishami ry’Umuryango w’Abibumbye ryita ku Buzima, OMS, ryatangaje ko icyorezo gikomeje kwiyongera, uyu mugabane ugizwe n’ibihugu 53 ndetse n’ibice bimwe by’u Burayi byazageza muri Werurwe 2022 bibuze abantu barenga 700.000 bahitanwe na Covid-19.

Kugeza ubu u Burayi bumaze gupfusha abarenga miliyoni n’igice bazize Coronavirus ndetse OMS itangaza ko icyorezo gikomeje kwiyongere nk’uko biri ubu uyu mugabane wazageza muri Nzeri 2022 umubare w’abamaze gupfa bose ugeze kuri miliyoni 2.2.

OMS ivuga ko kwiyongera kw’iki cyorezo biri guterwa n’umubare munini w’abantu badakingiye ndetse na Coronavirus yihinduranyije ya Delta, aho ubushakashatsi bugaragaza ko yandura ku rugero rwa 60% kurusha Coronavirus isanzwe.

Umuyobozi wa OMS mu Burayi, Dr Hans Kluge, yasabye abatuye uyu mugabane kwihutira gufata inkingo kugira ngo birinde gutakaza ubuzima bitari ngombwa, kuko impfu za Covid-19 zikubye kabiri ku munsi kuva muri Nzeri, aho hasigaye hapfa abantu 4200 ku munsi.

Ibihugu nk’u Budage, u Bufaransa, u Bwongereza, u Bugiriki, u Burusiya ndetse na Autriche, nibyo byibasiwe cyane kuruta ibindi mu gihe u Buholandi bwo bwatangiye kohereza abarwayi b’iki cyorezo mu Budage kubera ubwinshi bwabo ari nako bwotswa igitutu n’abaturage bigaragambya basaba ko amabwiriza akarishye yo kwirinda Coronavirus yavaho.

U Burayi bumaze gukingira abagera kuri 67,7% by’abaturage bose ariko iyi mibare ikazamurwa n’uko hari ibihugu bimwe biba byarakingiye abantu benshi ibindi bitaranakingira abangana na 30% by’abaturage.

OMS yatangaje ko muri Werurwe 2022 hazagera u Burayi bumaze gupfusha abarenga 700.000

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .