00:00:00 IGIHE NETWORK KN KINYARWANDA EN ENGLISH FR FRANCAIS

Christine Baingana wa Urwego Bank yashyizwe mu bagore 10 batanga icyizere mu rwego rw’imari muri Afurika

Yanditswe na Iradukunda Serge
Kuya 13 Mutarama 2022 saa 11:52
Yasuwe :

Umuyobozi Mukuru wa Urwego Bank, Christine Baingana, yashyizwe mu bagore 10 bari kugira uruhare rukomeye mu guteza imbere no kuvugurura imikorere y’Urwego rw’Imari muri Afurika.

Ku wa 12 Mutarama 2022, ni bwo byatangajwe ko Christine Baingana yashyizwe ku mwanya wa gatandatu kuri uru rutonde rugaragaraho abandi bagore bo muri Afurika bakora mu nzego zitandukanye z’imari, zirimo ibigo by’ishoramari, amabanki n’ibigo by’ubwishingizi.

Ni urutonde rwakozwe binyuze mu bihembo bitangwa ku bagore bagaragaza impinduka n’ubuhanga mu miyoborere y’urwego rw’imari, bizwi nka ‘Angaza Awards’.

Angaza Awards ni ibihembo bihabwa abagore b’indashyikirwa muri Afurika mu bijyanye na serivisi z’imari n’amabanki, bigamije kubaha agaciro no kuzirikana uruhare bagira mu iterambere ry’urwego rw’amabanki na serivisi z’imari.

Intego y’ibi bihembo ni ukubona umubare munini w’abagore uzamuka ukagera mu nzego zifata ibyemezo mu bigo bitandukanye by’imari.

Uru rutonde rwakozwe nyuma y’isesengura ry’ibikorwa bya buri mugore ururiho. Abahatanye bari babanje guhabwa amezi atatu yo kwiyandikisha no kugaragaza ibikorwa byabo.

Hari hahatanye abagore baturutse hirya no hino ku Mugabane wa Afurika mu bihugu nka Côte d’Ivoire, Kenya, Ibirwa bya Maurice, Nigeria, u Rwanda, Afurika y’Epfo, Uganda, Zambia na Zimbabwe.

Umuyobozi wa Angaza Awards, Nuru Mugambi, yavuze ko abatoranyijwe ari abagore bahize abandi mu kugaragaza uburyo ibikorwa byabo biri guteza imbere Urwego rw’Imari muri Afurika.

Ati “Ku Isi tugomba guhindura imiterere y’ibijyanye n’imiyoborere mu Rwego rw’Imari, aba bagore b’Abanyafurika berekanye impinduka mu bice bitandukanye by’uru rwego ruba rurimo ihangana ritoroshye, kandi rwiganjemo umubare munini w’abagabo.”

Yakomeje avuga ko aba bagore bagaragaje imikorere myiza mu guteza imbere ibigo bayoboye binyuze mu kwimakaza ikoranabuhanga na inovasiyo. Yavuze ko ibyo bakoze bituma baba icyitegererezo ku bana b’abakobwa bifuza gukora mu rwego rw’imari.

Christine Baingana waje ku mwanya wa gatandatu ni Umunyarwandakazi umaze imyaka isaga itandatu ari Umuyobozi Mukuru wa Urwego Bank kuko yayigezemo mu 2017.

Amashuri yisumbuye yayize muri Kibuli H. School muri Uganda mu Ishami ry’Imibare n’Ubukungu, amasomo ya kaminuza yayakomereje muri Cavendish College ndetse na New Port University zo mu Bwongereza. Aha yahakuye Impamyabumenyi y’Icyiciro cya Kabiri cya Kaminuza muri Business Administration.

Yize kandi muri Harvard University Kennedy School of Government, aho yakuye Impamyabumenyi y’Icyiciro cya Gatatu cya kaminuza muri ‘Public Administration’.

Christine Baingana ni umwe mu bagore bafite izina rikomeye mu rwego rw’imari mu Rwanda kuko yagiye akora ahantu hatandukanye. Yakoze imyaka irindwi mu yahoze ari Banki y’Ubucuruzi Iterambere n’Inganda (BCDI). Yahakoze nk’Umuyobozi ushinzwe ibijyanye n’Amakarita y’Ikoranabuhanga, nyuma yaho aza kugirwa umuyobozi ushinzwe Abakiliya bato.

Hagati ya 2002 na 2005 yabaye Umuyobozi Mukuru wa Imprimerie Nouvelle du Rwanda, kuva mu 2006 kugeza mu 2009 aba Umuyobozi ushinzwe Gahunda muri Tulane University yo muri Leta Zunze Ubumwe za Amerika.

Yamaze imyaka 11 kandi ari umukozi w’Umuryango wa Gikirisitu, Hope International, aho yakoze nk’Umuyobozi ushinzwe Ibikorwa by’Ubucuruzi nyuma aza kuba Umuyobozi wawo muri Afurika.

Umuyobozi Mukuru w’uyu muryango, Peter Greer, yigeze kuvuga ko Christine Baingana ari umwe mu bakozi yagize b’inyangamugayo. Yavuye muri iki kigo ajya gukora mu Urwego Bank.

Mu 2018 yigeze kubwira Lancaster Online ko Urwego Bank ari banki yiyemeje gusanga abaturage aho bari mu cyaro kugira ngo ibagezeho serivisi z’imari.

Icyo gihe yagize ati “Icyo Urwego ikora gitandukanye, ni uko tumanuka tukajya mu baturage, aho abakiliya bacu baba aho kubategereza ngo badusange aho turi, ibyo ubwabyo bisaba ikintu kinini. Twatumye habaho icyo twakwita banki ishingiye ku baturage, dutoza abaturage kandi tukabategurira kugera kuri serivisi z’inguzanyo.”

Uretse Christine Baingana, urutonde rwa ‘Angaza Awards’ rugaragaraho abandi bagore nka Marjorie Mayida ukuriye Ikigo cy’Ishoramari cyo muri Zimbabwe cya Old Mutual Investment Group; Rina Hicks uyobora Faida Investment Bank Ltd na Rahel Musyoki uyobora CarePay yo muri Kenya.

Runariho Gakii Mwongera ukora muri Equity Group Holdings na Sharon Kinyanjui ukora muri WorldRemit. Biteganyijwe ko umuhango wo guhemba aba bagore uzaba muri Mata uyu mwaka.

Christine Baingana si Umunyarwandakazi wa mbere ugaragaye mu bihembo bya Angaza Awards kuko mu mwaka ushize na Lina Higiro uyobora NCBA Rwanda yashyizwe mu bagore batatu batanga icyizere mu Karere ka Afurika y’Iburasirazuba (EAC) mu rwego rw’imari.

Christine Baingana wa Urwego Bank yashyizwe mu bagore 10 batanga icyizere mu rwego rw’imari muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .