00:00:00 IGIHE NETWORK KN KINYARWANDA EN ENGLISH FR FRANCAIS

Mutsindashyaka yashyikirije Perezida Ali Bongo impapuro zimwemerera guhagararira u Rwanda

Yanditswe na Ntabareshya Jean de Dieu
Kuya 13 May 2022 saa 08:57
Yasuwe :

Ambasaderi w’u Rwanda muri Gabon, Mutsindashyaka Théoneste yashyikirije Perezida Ali Bongo Ondimba impapuro zimwemerera guhagararira u Rwanda muri iki gihugu.

Kuri uyu wa Gatanu, tariki ya 13 Gicurasi 2022, ni bwo Mutsindashyaka uheruka kugirwa Ambasaderi w’u Rwanda muri Gabon yashyikirije Perezida Ali Bongo Ondimba impapuro zimwemerera kuruhagararirayo.

Ambasaderi Mutsindashyaka asanzwe ahagarariye u Rwanda mu bihugu bitandukanye birimo Congo Brazaville, Centrafrique, Cameroun, Gabon na Guinée Equatorial.

Perezida wa Gabon, Ali Bongo Ondimba, aheruka i Kigali mu 2018, icyo gihe yaganiriye na mugenzi we w’u Rwanda Paul Kagame ku hazaza n’umubano w’ibihugu byomboi.

Kugeza ubu Perezida Ali Bongo amaze kubaka umubano uhamye n’u Rwanda kuko akunze kwitabira inama zitandukanye ziruberamo. Nko muri Kamena 2016 yari i Kigali mu Nama yiga ku mugambi wo kugira Umugabane wa Afurika isoko rimwe mu ikoranabuhanga “Smart Africa ndetse yanitabiriye irahira rya Perezida Kagame muri Kanama 2017.”

U Rwanda na Gabon bisanzwe bifitanye imikoranire n’ubuhahirane binyuze mu bwikorezi bwo mu kirere, Sosiyete Nyarwanda ya RwandAir ikorera ingendo i Libreville mu Murwa Mukuru wa Gabon.

Gabon ni igihugu gikungahaye ku bucukuzi bwa peteroli, ubucuruzi bw’imbaho n’amabuye y’agaciro.

Urugaga rw’Abikorera mu Rwanda n’inzego zo muri Gabon bateganya kunoza imikoranire yo gutangira kuhakorera ubucuruzi nk’inzira yo guteza imbere ibikorerwa mu Rwanda no guhanga imirimo myinshi.

U Rwanda na Gabon byasinyanye amasezerano y’imikoranire mu 1976, aza kuvugururwa mu 2010.

Kuba u Rwanda ari igihugu kiri mu Muryango wa Afurika y’Iburasirazuba na COMESA, birufasha mu bikorwa bitandukanye bigamije guhamya umubano n’ibihugu bitandukanye n’ubucuruzi hagati y’ibihugu bitandukanye.

Ambasaderi Mutsindashyaka Théoneste yashyikirije Perezida Ondimba impapuro zimwemerera guhagararira u Rwanda muri iki gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .