U Rwanda rwamenyeye mu itangazamakuru itariki nshya y’ibiganiro na Uganda

Yanditswe na Rabbi Malo Umucunguzi
Kuya 21 Ukwakira 2019 saa 09:17
Yasuwe :
0 0

Umunyamabanga wa Leta muri Minisiteri y’Ububanyi n’amahanga y’u Rwanda, Amb. Nduhungirehe Olivier, yavuze ko bitangaje kubona mu itangazamakuru ryo muri Uganda itariki yiswe ko ari iy’ibiganiro bigamije kuzahura umubano w’ibihugu byombi, kandi inzego z’u Rwanda zitarabimenyeshwa.

Kuri iki Cyumweru nibwo ikinyamakuru Chimpreports cyo muri Uganda cyanditse ko Minisiteri y’Ububanyi n’Amahanga ya Uganda yohereje ubutumire i Kigali, buha ikaze intumwa z’u Rwanda “mu nama iteganyijwe ku wa 13 Ugushyingo.”

Ni inama ya kabiri irimo gutegurwa, ya komisiyo ihuriweho y’u Rwanda na Uganda yashyizweho n’amasezerano Perezida Paul Kagame na Yoweri Museveni basinyiye i Luanda muri Angola, ku wa 21 Kanama. Ni amasezerano agamije guhosha ubwumvikane buke bumaze iminsi hagati y’ibihugu byombi.

Ibibazo byafashe indi ntera ubwo mu myaka ibiri ishize Abanyarwanda batangiye gufatwa bagakorerwa iyicarubozo, abandi bagafungwa mu buryo bunyuranyije n’amategeko, bashinjwa kuba intasi z’u Rwanda.

Icyo kibazo cyiyongereyeho kubangamira ubucuruzi bw’Abanyarwanda muri Uganda, ndetse Uganda igashinjwa gutera inkunga imitwe yitwaje intwaro igamije guhungabanya umutekano w’u Rwanda. Ni impamvu zatumye u Rwanda rugira abaturage barwo inama yo "kutajya muri Uganda."

Mu gihe ibinyamakuru byo muri Uganda byamaze gutangaza itariki y’ibiganiro, Nduhungirehe yahamije ko nta butumire Minisiteri y’Ububanyi n’amahanga y’u Rwanda irakira.

Mu butumwa yanyujije kuri Twitter yagize ati “Biratangaje kumenyera ibi mu binyamakuru byo muri Uganda. Ntabwo u Rwanda rwigeze ruganirizwa ku itariki iyo ari yo yose, kandi yaba Minisiteri y’Ububanyi n’Amahanga y’u Rwanda cyangwa Ambasade y’u Rwanda muri Uganda, nta wakiriye ubwo butumire.

Ku wa 16 Nzeri nibwo i Kigali habereye inama ya mbere ya Komisiyo ihuriweho n’u Rwanda na Uganda, yashyiriweho gucoca ibibazo bikomeje guteza umwuka mubi hagati y’ibi bihugu by’ibituranyi. Hemejwe ko inama itaha izaba nyuma y’iminsi 30 uhereye igiye iya mbere yabereye, yo ikabera i Kampala.

Iyo ni nayo igomba kuganirirwamo ku ngingo zirimo ikibazo cy’urujya n’uruza rw’abantu, ibicuruzwa na serivisi ku mipaka isanzwe hagati y’ibi bihugu.

Mu nama ya mbere, u Rwanda rwahaye Uganda urutonde rw’Abanyarwanda bafungiwe muri icyo gihugu, yemera kugenzura ayo makuru hagamijwe ko abari kuri urwo rutonde banyuzwa mu nzira zigenwa z’ubutabera, no kurekura abo bizagaragara ko nta bimenyetso bihari cyangwa ibyaha bakurikiranwaho.

Kimwe n’indi myanzuro yemeranyijweho, Nduhungirehe kuri iki Cyumweru yabwiye IGIHE ko "nta kintu gishya kirabaho".

Indi myanzuro yari yemeranyijweho harimo ko ibihugu byombi byemeranyije kwihutisha amasezerano yo kohererezanya abanyabyaha, hagamijwe ko mu gihe kiri imbere hazajya habaho ubufatanye mu gukurikirana abakora ibyaha mu gihugu kimwe bagahungira mu kindi.

Ibihugu byombi kandi "byemeranyije guhagarika icengezamatwara iryo ari ryo ryose ribangamiye kimwe muri ibi bihugu, ryaba irinyuzwa mu bitangazamakuru byemewe cyangwa imbuga nkoranyambaga."

Iyo tariki ibaye ari ukuri, si ubwa mbere ubutumwa bwa Uganda bureba u Rwanda bunyuze mu itangazamakuru, mbere y’uko bugera ku bo bugenewe.

Muri Werurwe uyu mwaka nibwo hatangajwe ibaruwa Perezida Yoweri Museveni wa Uganda yandikiye mugenzi we w’u Rwanda Paul Kagame, yemera ko yahuye na bamwe mu bagize umutwe wa RNC ugamije guhungabanya umutekano w’u Rwanda, hazamurwa ibibazo byinshi ku miterere yayo, igihe yasohokeye n’amagambo yayikoreshejwemo.

Iyo baruwa yasohotse mu kinyamakuru The New Vision cya Leta ya Uganda, igaragazwa ko yanditswe ku wa 10 Werurwe 2019.

Ibibazo bibiri bikomeye byahise bitangira kugarukwaho ni uburyo iyi baruwa yasohotse mu itangazamakuru kandi amakuru ahamya neza ko Perezida Kagame yari igenewe yari itaramugeraho, n’uburyo Museveni yemeye ko yagiranye ibiganiro n’abagize RNC na Rujugiro ubwe, ibintu ubutegetsi bwa Uganda bwakunze kwamagana ko ntaho buhuriye n’abifuriza u Rwanda inabi.

Icyo gihe amakuru yahamije ko iyo baruwa yashyikirijwe Ambasaderi w’u Rwanda muri Uganda ku mugoroba wo ku wa 18 Werurwe, igera ku wo igenewe yamaze gusakara mu itanmgazamakuru rya Uganda.

Minisitiri Kutesa aramutsa Nduhungirehe mbere y'ibiganiro
Ibihugu by'abahuza muri ibi biganiro byari bihagarariwe n'Umuyobozi w’urwego rw’ubutasi rwa RDC, Inzun Justin Kakiak, Minisitiri w’intebe wungirije wa RDC, Gilbert Kankonde Malamba, Minisitiri w’ububanyi n’amahanga wa Angola, Manuel Domingos Augusto n’Umujyanama muri ambasade ya Angola mu Rwanda, Horacio Uliengue
Itsinda rya Uganda riyobowe na Minisitiri w’Ububanyi n’amahanga, Sam Kutesa ririmo Minisitiri w’umutekano Gen. J.J Odongo Abu, Umuyobozi mu Biro bya Perezida Yoweri Museveni, Amb Joseph Ocwet, Intumwa nkuru ya Leta William Byaruhanga na Ambasaderi wa Uganda mu Rwanda Oliver Wonekha
Intumwa z'u Rwanda na Uganda mu biganiro
Umunyamabanga wa Leta Nduhungirehe na Minisitiri w'Ububanyi n'amahanga wa Uganda Sam Kutesa, baganira n'itangazamakuru nyuma y'inama yabereye i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza