00:00:00 IGIHE NETWORK KN KINYARWANDA EN ENGLISH FR FRANCAIS

Sudani yashimye intambwe n’inararibonye mu bwiyunge bw’Abanyarwanda

Yanditswe na IGIHE
Kuya 13 May 2022 saa 06:26
Yasuwe :

Ubuyobozi bwa Sudani bwatangaje ko iki gihugu gikeneye kungukira ku bwiyunge bw’Abanyarwanda n’ibikorwa byose byakozwe kugira ngo bongere kubana mu mahoro no kwiyubaka nyuma ya Jenoside yakorewe Abatutsi mu 1994.

Byagarutsweho mu gikorwa cyo kwibuka ku nshuro ya 28 Jenoside yakorewe Abatutsi cyabereye i Khartoum mu Murwa Mukuru wa Sudani, ku wa 12 Gicurasi 2022.

Iki gikorwa cyateguwe n’itsinda ry’abahagarariye u Rwanda muri Sudani kikaba cyitabiriwe n’abahagarariye ibihugu byabo muri Sudani, abahagarariye imiryango ya sosiyete sivile, abashakashatsi, abo mu nzego za leta, abacuruzi, Abanyarwanda n’inshuti z’u Rwanda.

Guverinoma ya Sudani yari ihagarariwe na Ambasaderi Elzein Ibrahim Hussein, uhagarariye by’agateganyo Ishami rya Afurika muri Minisiteri y’Ububanyi n’Amahanga y’iki gihugu.

Ambasaderi Elzein yavuze ko kwibuka ari ukunamira abagore, abagabo, abahungu n’abakobwa, inshuti n’abavandimwe bishwe muri Jenoside nta cyaha bafite.

Yavuze ko uyu ari umwanya wo kugaruka ku ihame ryo kurwanya umuco wo kudahana, kugendera ku mategeko, kubahiriza uburenganzira bwa muntu n’ibindi.

Ati “Muri Sudani dukeneye kungukira ku inararibonye mu bwiyunge bw’Abanyarwanda n’iterambere ry’ubukungu. Turashimira ko u Rwanda rwashyizeho Minisiteri y’Ubumwe hagamijwe kongera imbaraga muri iyi gahunda binyuze mu nyigisho z’uburere mboneragihugu no kubungabunga amateka ya Jenoside hirindwa ko yazongera kuba ukundi.”

Yijeje u Rwanda ko Sudani izakomeza gufatanya na rwo mu rugendo rwo kugera ku bwiyunge n’imibereho myiza y’abaturage barwo n’abo mu karere muri rusange.

Buhungu Abel uhagarariye u Rwanda muri Sudani, yagarutse ko mateka y’u Rwanda mbere y’ubukoloni agaragaza ko Abanyarwanda bari babanye mu mahoro basangiye umuco, ururimi n’indangagaciro.

Yasobanuye uko abakoloni binjije amacakubiri mu Banyarwanda bagira ngo babone uko babayobora ari na bwo hatangijwe gahunda yo gutanga indangamuntu zirimo ‘amoko’ y’Abahutu, Abatutsi n’Abatwa ari na zo zahereweho mu kujonjora abicwaga muri Jenoside yakorewe Abatutsi kuri za bariyeri zabaga zashyizweho.

Buhungu yanagarutse ku buryo Ingabo za Loni zari mu Rwanda zatereranye abicwaga zikagabanya umubare w’abasirikare ba MINUAR kuva ku 1700 hagasigara 270 gusa.

Yashimiye ingabo zahoze ari iza RPA zari ziyobowe na Perezida Kagame zahagaritse Jenoside, avuga ko ubwitange bwazo butapfuye ubusa.

Yakomeje ashima ibihugu bikomeje gutanga umusanzu wo kurwanya umuco wo kudahana bifata abakekwaho Jenoside yakorewe Abatutsi bikabageza imbere y’ubutabera bwabyo cyangwa bakohererezwa u Rwanda.

Ku bijyanye n’ubukungu bw’u Rwanda, Buhungu bwagiye buzamuka ku gipimo cya 8% inshuro nyinshi zikurikiranya kugeza ubwo icyorezo cya Covid-19 cyadukaga mu 2020.

Hamwe no kuba Abanyarwanda bagera kuri 70% barikingije, ibikorwa by’ubukungu byagiye bifungurwa bwongeye kuzamukaho 10,2% mu 2021 nk’uko Buhungu yakomeje abisobanura.

Yibukije ko u Rwanda rwiteguye kwakira inama ya CHOGM muri Kamena 2022, ahamagarira ibihugu biri muri uyu muryango kuzitabira iyi nama y’ingirakamaro ndetse abizeza ko izaba mu mutekano wuzuye.

Basobanuriwe amateka ya Jenoside yakorewe Abatutsi, uko u Rwanda rwiyubatse mu bukungu n'imibereho myiza y'abaturage
Abitabiriye iki gikorwa basobanuriwe amateka y'u Rwanda n'uko abenegihugu bari babanye neza mbere y'ubukoloni
Abahagarariye ibihugu byabo muri Sudani bari mu bifatanyije n'Abanyarwanda mu Kwibuka ku nshuro ya 28 Jenoside yakorewe Abatutsi
Igikorwa cyo kwibuka Jenoside yakorewe Abatutsi ku nshuro ya 28 muri Sudani cyitabiriwe n'abagera kuri 250

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .