00:00:00 IGIHE NETWORK KN KINYARWANDA EN ENGLISH FR FRANCAIS

Ababyeyi basabwe kutabona ikoranabuhanga nk’umwanzi w’abana b’abakobwa

Yanditswe na IGIHE
Kuya 31 Ukwakira 2021 saa 11:44
Yasuwe :
0 0

Inzobere zitandukanye mu bijyanye n’ikoranabuhanga ndetse n’uburezi bw’abana by’umwihariko ab’abakobwa, barasaba ababyeyi kutabona ikoranabuhanga nk’umwanzi w’abana, ahubwo bashishikarizwa gushyiraho uburyo butuma abana bakoresha ikoranabuhanga mu buryo bwiza.

Si kenshi ababyeyi bumva batekanye iyo abana babo by’umwihariko abangavu bari gukoresha ibikoresho by’ikoranabuhanga nka mudasobwa cyangwa telefone, kuko akenshi bumva ko bashobora guhuriraho n’ibishuko bishobora kwangiza ejo hazaza habo.

Umuyobozi Ushinzwe ibikorwa mu Muryango Nyarwanda utari uwa Leta Save Generations Organization (SGO), uharanira iterambere ry’umwana, urubyiruko n’umugore, Umukunzi Sandrine yavuze ko aho Isi igeze ubu, kubuza abana gukoresha ikoranabuhanga byaba ari ukubahohotera.

Uyu muryango umaze iminsi mu bukangurambaga n’ubuvugizi bigamije kugabanya icyuho ku ikoreshwa ry’ikoranabuhanga hagati y’abagabo n’abagore.

Ubu bukangurambaga bwakozwe hifashishijwe ibiganiro kuri radiyo, kuri televiziyo, ku mbuga nkoranyambaga, no mu itangazamakuru aho bahamagarira indi miryango itari iya Leta, abikorera n’abandi gutanga ubufasha mu kuzamura abagore n’abakobwa bagafashwa kwitabira ikoranabuhanga.

Yavuze ko ahubwo ababyeyi bakwiriye kumenya uburyo bwiza bwo kubafasha kurikoresha, kugira ngo ribagirire akamaro.

Ati “Ikoranabuhanga rifite umumaro cyane muri iyi minsi, niho hatangirwa serivisi nyinshi kandi no mu buryo bw’amakuru, amakuru atandukanye ushobora kuyakura mu ikoranabuhanga.”

Yakomeje agira ati “Icyakora, mu ikoranabuhanga nanone ni ahantu abana bashobora gukura amakuru y’ibihuha. Ayo makuru atandukanye iyo atizewe, akayahuza na ya matsiko aba afite, hari indi myitwarire bishobora kumutera, ugasanga uko agiye kubigerageza niho atwariye za nda zitifuzwa. Hakenewe ko rya koranabuhanga rinakoreshwa mu kubagezaho ya makuru yizewe kandi bifuza.”

Umukunzi yavuze ko mu bihe bitandukanye, abana b’abakobwa bagiye basigazwa inyuma mu ikoreshwa ry’ikoranabuhanga, bityo ko igikenewe ubu ari ukubafasha kuryisangamo aho kumva ko ibyo basangaho ari ibibi gusa.

Ati “Ikoranabuhanga ntituribone nk’ikintu kibi gusa, ahubwo turibone nk’inzira nziza yo kugira ngo ba bangavu n’ingimbi babone amakuru ashobora kubafasha muri ya nzira nziza barimo.”

Umutoni Vanessa w’imyaka 19, ni umwe mu bafashijwe na Save Generations Organization mu bijyanye n’ubumenyi ku buzima bw’imyororokere.

Yavuze ko atunze telefone kandi imufasha byinshi mu kumenya amakuru agezweho ndetse no kwihugura byinshi mu masomo yiga.

Icyakora, Umutoni yavuze ko nk’umwana w’umukobwa, ikoranabuhanga ridakoreshejwe neza rishobora kuba ikibazo.

Ati “Nko ku mbuga nkoranyambaga duhuriraho n’abantu batandukanye, abeza n’ababi. Hari abifashisha iryo koranabuhanga umugambi ari ugushuka abana b’abakobwa, bakabikora babita inshuti ariko atari ubushuti nyabwo, ugasanga barabashutse, barababeshye hakaba havamo za nda zitateganyijwe.”

Yakomeje agira ati “Izo WhatsApp na YouTube nta kibazo zakoreshwa ariko zigakoreshwa mu mwanya wazo. Hari ubwo usanga ziri gukoreshwa mu mwanya w’ibindi bifite umumaro nko kwiga n’ibindi.”

Ishimwe Benjamin ukora mu muryango ukorera abana ubuvugizi, Coalition Umwana ku Isonga (CUI), yavuze ko ari inshingano z’ababyeyi gufasha abana babo kwisanga mu ikoranabuhanga, ariko ko ari n’inshingano kugenzura ibyo bakoresha iryo koranabuhanga.

Yavuze ko nka za telefone na mudasobwa, zibamo uburyo bufasha umubyeyi kuvanamo ibyo atifuza ko umwana we abona nubwo abenshi batabigenzura.

Ati “Ni inshingano z’umubyeyi kumenya ko umwana ari gukoresha rya koranabuhanga mu bimugirira akamaro. Agomba kumenya ko ibiri muri icyo gikoresho cy’ikoranabuhanga bitaza kubangamira wa mwana.”

Uwase Mariam, umwe mu babyeyi akaba n’umurezi, yavuze ko kugira ngo umubyeyi amenye neza ibyo umwana we ahurira nabyo ku ikoranabuhanga, bimusaba kubanza kuba inshuti.

Ati “Icya mbere ni ukuba inshuti y’umwana, kuko nituba turi inshuti, nabibona azabinyereka. Iyo uri umubyeyi umwana arakubaha akanagutinya. Hari no kuba inshuti y’umwana, hamwe uzicara ugashaka kuba ku rwego rw’imitekerereze ye kugira ngo mubashe kugendana mu biganiro. Akubahe nk’umubyeyi ariko akwisanzureho.”

Umukunzi Sandrine yavuze ko hagikenewe imbaraga nyinshi kugira ngo abakobwa n’abagore bisange mu ikoranabuhanga, aho kubereka ko buri gihe ikoranabuhanga ririho ibintu bibi.

Ati “Umubyeyi nabona umwana arimo acokoza nk’iradiyo, amubwire ko nabyo abishoboye yabikora. Ejo amujyane muri iryo shuri rikora ibintu nk’ibyo. Umwarimu nabona umwana afite ubushobozi runaka, amutere imbaraga.”

Kugeza ubu ku rwego mpuzamahanga, abagore n’abakobwa bari inyuma mu bijyanye n’ikoreshwa ry’ikoranabuhanga, ndetse mu bihugu bikennye ikoreshwa ry’ikoranabuhanga ku bagore riri kuri 32.9 % ugereranyije n’abagabo.

Save Generations Organization yatangaje ko ariyo mpamvu ihamagarira abafatanya bikorwa batandukanye kuzirikana uruhare n’akamaro k’ikoranabuhanga ku mwana w’umukobwa mu bikorwa byose, kuko bizarushaho kuzamura ubwitabire bw’abakobwa mu ikoresha neza ry’ikoranabuhanga.

Hagaragajwe ko abakobwa iyo bafashijwe mu ikoranabuhanga, inyungu ziba nyinshi
Save Generations Organization n'abafatanyabikorwa bayo bagaragaje ko hari uburyo bwiza bwoi gushyigikira abakobwa mu ikoreshwa ry'ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .