00:00:00 IGIHE NETWORK KN KINYARWANDA EN ENGLISH FR FRANCAIS

Abakoresha SPENN mu Rwanda barenze ibihumbi 400

Yanditswe na Iradukunda Serge
Kuya 1 September 2022 saa 06:17
Yasuwe :

Kuva yatangizwa mu Rwanda mu 2018, SPENN ikomeje kwaguka haba muri serivisi itanga ndetse no ku mubare w’abazikoresha, aho imaze kugeza mu bihumbi 400 n’amashami mu bihugu birindwi ku Isi.

SPENN isanzwe itanga serivisi z’imari zirimo kubika, kohererezanya amafaranga no kubona inguzanyo y’igihe guhera mu 2018 ndetse kuri ubu ikaba yaranashyizeho uburyo bufasha abakiliya kwishyura imishahara y’abakozi babo.

Mu nama yahurije hamwe abakozi batandukanye bakorera muri Norrsken ari naho SPENN ikorera, Umuyobozi wa SPENN mu Rwanda, Norbert Haguma yagaragaje ko bamaze kugera ku ntera ishimishije ndetse ko bakomeza gusaba ibitekerezo abakoresha serivisi zayo kugira ngo bakomeze kuzinoza.

Ati “Uyu munsi twashatse guhura n’abakorera ibigo byinshi bikorera hano muri Norrsken kugira ngo tubabwire icyo dukora kandi tubasabe kuduha ibitekerezo kuko abenshi bakoresha SPENN haba ku giti cyabo mu kwishyura imishahara abakiliya babo. Ni uburyo bwo kumenya abakiliya bacu uko bumva SPENN n’icyo twayihinduraho”.

Mark Abel umwe mu basanzwe bakoresha serivisi za SPENN, avuga ko ikintu cya mbere yishimira ari uburyo bwo kubika no kubikura amafaranga.

Ati “Ahandi hantu henshi dushyira amafaranga ntabwo yunguka kandi nubwo kuyishyiraho amafaranga byoroshye no kuyakuraho ni uko. Kandi icyiza ni konti nk’izindi zose kuko ikwemerera no gufata inguzanyo muri I&M Bank.”

Nelly Rwagitare yavuze ko yungutse uburyo bushya bwo kuba yakwishyura abakozi akoresheje SPENN.

Ubu buryo bwa SPENN bukoreshwa muri telefone, bwatangiye mu Rwanda mu 2018, butangijwe na sosiyete y’ikoranabuhanga mu by’imari, Blockbonds ikomoka muri Norvège ku bufatanye na I&M Bank Rwanda.

Uretse gutanga serivisi zo kohereza no kubikuza amafaranga ku buntu, SPENN ifasha abayikoresha kwishyura ibintu bitandukanye nk’umuriro n’amazi, kuzigama, kwishyura ibicuruzwa byaguzwe kuri murandasi ndetse no guhererekanya amafaranga hagati y’umuntu n’undi nta kiguzi.

SPENN kandi ifite n’uburyo bushya bukoreshwa mu kwishyura umucuruzi hakoreshejwe ikimenyetso cy’ikoranabuhanga (QR Code) ndetse n’uburyo bukoreshwa n’ibigo cyangwa sosiyete zitandukanye igihe zishaka kwishyura abantu benshi icyarimwe buzwi nka ‘Bulk Payment’.

Kugira ngo umuntu abashe gukoresha iri koranabuhanga asabwa gusa kumanura [download] porogaramu ya SPENN kuri Play Store cg App Store, ku bafite telefone zigezweho, bakiyandisha bakoresheje indangamuntu na nimero ya telefone gusa.

Abafite telefone zisanzwe bo bashobora gukoresha serivisi za SPENN bakanze *580# mu gihe baba bariyandikishije bakoresheje App cyangwa banyuze ku mu-agent wa SPENN.

Abakoresha serivisi za Spenn bakomeje kwiyongera uko bucyeye n'uko bwije
Abitabiriye iyi nama ubwo bari bakurikiye ibiganiro byayitangiwemo
Bamwe mu bitabiriye inama yahuje ubuyobozi bwa Spenn n'abakoresha serivisi zayo
Ubu buryo bwa SPENN bukoreshwa muri telefone, bwatangiye mu Rwanda mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .