Uko Blackberry yasigaye inyuma mu rugamba rw’ikoranabuhanga rya telefone zigezweho

Yanditswe na Iradukunda Serge
Kuya 9 Ukuboza 2019 saa 10:25
Yasuwe :
0 0

Ku muntu utarabyiboneye biragoranye kumwemeza ko mu myaka mike ishize telefone za Blackberry zakanyujijeho kugeza aho kuyitunga byari inzozi kuri buri wese wakurikiraniraga hafi ibijyanye n’ikoranabuhanga.

Amateka n’ibigwi bya Blackberry n’imibare irabigaragaza kuko mu 2011 yari yihariye isoko rya telefone zigezweho ku kigero cya 50% muri Amerika na 20% ku Isi hose, aho yagurishije izirenga miliyoni 50.

Abenshi mu bakoresheje telefone za Blackberry bazikundiraga umutekano usesuye mu kubika amakuru yabo.

Gusa ibi bihe byiza siko byakomeje kuko kuri ubu imibare igaragaza ko Blackberry isigaranye isoko riri munsi ya 3%.

Bamwe mu bahanga bamenyereye amasoko ya telefone bavuga ko Blackberry yizize mu makosa agera kuri atatu yose aganisha ku kuba batarahaye agaciro icyo abakiliya bashaka.

Amwe mu makosa Blackberry yakoze

Gutinda kuzana impinduka zigamije ihangana mu bucuruzi. Abayobozi ba Blackberry ntibigeze baha agaciro uburyo bwa telefone zikoresha ibirahure binini kandi bikorwamo (touch screen) nk’uko iPhone yabigenje, ahubwo bakomeza gutsimbarara ku buryo bwabo bwa telefone zikoresha amatushi (clavier) bavuga ko ari bwo abakiliya babo bakunda.

Nyamara nyuma yo kubona ko telefone zakorwaga na Apple zitangiye kwigarurira isoko na bo bahisemo gukora telefone ikoresha ubu bwoko bw’ikirahure bayita ‘BlackBerry Storm’ n’ubwo itakunzwe cyane.

Nyuma y’iyi telefone izindi bashyize hanze zakomatanyaga uburyo bw’ikirahure gikorwamo ndetse n’amatushi. Ibi byatumye ku isoko Blackberry igaragara nk’aho itazi icyo ishaka kuko isoko ryaririmo ririgarurirwa na telefone za iPhone ndetse n’izikoresha porogaramu ya Android.

Blackberry ntiyamenye ko isoko rizahinduka. Blackberry ntiyigeze iha agaciro icyo abantu benshi bifuzaga birimo uko igaragara ndetse na porogaramu zigezweho, ahubwo yakomeje guha agaciro icyo amwe mu makompanyi yari abakiliya babo b’imena yifuzaga.

Nyuma y’uko izi kompanyi zifashe ingamba z’uko abakozi babo bazajya bizanira telefone bashaka abenshi bahagaritse gukoresha telefone za Blackberry, kuko zitahazaga ibyifuzo byabo bayoboka iPhone na Samsung.

BlackBerry ntiyumvise neza akamaro ka telefone zigezweho (smartphones). Uruganda rwa Blackberry rwahaye agaciro cyane ibijyanye n’umutekano wa telefone bakora birengagiza gutanga ibyo abantu benshi bakeneye.

Kuba Blackberry nta porogaramu nyinshi yagiraga byatumye abazitunze batihanganira gucikwa na byinshi byiganjemo imyidagaduro byabaga muri porogaramu za iPhone na Samsung.

Kubera ibi bibazo bitandukanye byatumye abakiliya bayo bayishiraho nayo mu 2013 itangaza ko itazongera gukora telefone ahubwo ubu burenganzira bwo gukora telefone mu izina ryayo ibuha kompanyi yo mu Bushinwa yitwa TCL, yo ubu yibanda mu gukora porogaramu za telefone.

Blackberry yananiwe kujyana n'ibyifuzo by'abakiriya bayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza