00:00:00 IGIHE NETWORK KN KINYARWANDA EN ENGLISH FR FRANCAIS

BAL 2022: Ibyo wamenya ku ikipe ya AS Salé itozwa n’umukobwa

Yanditswe na Mihigo Saddam
Kuya 13 May 2022 saa 03:09
Yasuwe :

Kuva tariki 21-28 Gicurasi 2022, muri Kigali Arena hazabera irushanwa mpuzamahanga ry’amakipe arusha andi ubukana mu bihugu byayo mu mukino wa Basketball.

AS Salé iri mu makipe umunani azitabira. Association Sportif de Salé ni ikipe y’ubukombe mu mukino wa Basketball ya Afurika, ikaba ikipe izaba ikina irushanwa rya BAL ku nshuro ya kabiri.

AS Salé ni imwe mu makipe akomeye mu gihugu cya Maroc kuko ni nayo ibitse igikombe cya shampiyona ya 2021 kuri ubu ikaba iri gushaka indi ya 2022.

AS Salé yashinzwe mu 1928 mu mujyi wa Salé, kuva icyo gihe kugeza ubu imaze gutwara ibikombe umunani bya shampiyona ya Maroc. Imaze kuba iya kabiri inshuro enye.

Association Sportif de Salé ibitse ibikombe 11 by’igikombe cy’igihugu cya Maroc kuva mu 2005, ikaba yaratsindiwe ku mukino wa nyuma inshuro imwe mu 2004.

Mu 2017, AS Salé yatwaye igikombe cya Afurika gihuza amakipe yabaye aya mbere iwayo. Mu 2010, 2011 na 2016 yari yabaye iya gatatu mu gihe mu 2018-2019 yabaye iya kabiri.

AS Salé yahise ica agahigo ko kuba ikipe ya mbere yo muri Maroc yari itwaye iki gikombe mu myaka 20 yari ishize.

AS Salé niyo kipe izaba ifite agahigo ko gutozwa n’umukobwa, Liz Mills, umutoza wayisinyiye muri Werurwe 2022.

Umunya-Australia, Liz Mills wanatojeho Patriots BBC yo mu Rwanda, ni we wafashije AS Salé kubona itike y’imikino ya nyuma ya BAL 2022.

Liz Mills ni umwe mu batoza ba Basketball bamaze kubaka izina muri Basketball ya Afurika kuko yatoje ikipe y’igihugu ya Kenya inakina AfroBasket.

Mills yabaye umutoza wungirije mu ikipe y’igihugu ya Zambie, Cameroun n’andi makipe (Clubs) atandukanye.

Mu bakinnyi ba AS Salé bazitabazwa muri iri rushanwa barimo kapiteni wayo, Yassine El Mahsini w’imyaka 28 ufite uburebure bwa 1.88 m.

Yassine El Mahsini ni umukinnyi ukina azamura imipira ava inyuma azamuka agana ku nkangara y’ikipe baba bahanganye (Point Guard).

AS Salé ni imwe mu makipe yaboneye itike mu gice cya Sahara Conference cyarimo REG Basketball Club izahagararira u Rwanda.

Andi makipe ane yaboneye itike muri Sahara Conference ni US Monastir (Tunisie) na Seydou Lygacy Club (Guinée).

AS Salé iri mu makipe azakina BAL ku nshuro yayo ya kabiri yikurikiranya. Mu irushanwa riheruka, iyi kipe yageze muri ¼ cy’irangiza.

Umutoza mukuru wa AS Salé yafashije igihugu cya Kenya kujya mu mikino y'igikombe cya Afurika
Association Sportif de Salé yatwaye igikombe cya Afurika mu 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .