00:00:00 IGIHE NETWORK KN KINYARWANDA EN ENGLISH FR FRANCAIS

Real Madrid yageze ku mukino wa nyuma wa Supercopa de España isezereye FC Barcelone (Amafoto)

Yanditswe na Bukuru JC
Kuya 13 Mutarama 2022 saa 08:29
Yasuwe :

Real Madrid yageze ku mukino wa nyuma w’igikombe kiruta ibindi muri Espagne “Supercopa de España” isezereye mukeba, FC Barcelone, ku bitego 3-2 nyuma yo kwitabaza iminota 30 y’inyongera mu mukino wa ½ wabaye ku wa Gatatu.

Muri uyu mukino wabereye muri Arabia Saoudite, Real Madrid yabonye igitego cy’intsinzi ku munota wa 98, cyinjijwe na Federico Valverde wari wagiye mu kibuga asimbuye.

Amakipe yombi yakinnye iminota 30 y’inyongera nyuma y’uko Ansu Fati wari umaze amezi abiri adakina kubera imvune, yishyuriye FC Barcelone ku munota wa 85 ku mupira wari uvuye muri koruneri.

Real Madrid ni yo yari yayoboye umukino bwa mbere ubwo Karim Benzema yatangaga umupira kuri Vinicius Jr wafunguye amazamu ku munota wa 25.

Ibyishimo by’abakinnyi batozwa na Carlo Ancelotti ntibyageze mu kiruhuko cy’umukino kuko Luuk de Jong yishyuriye FC Barcelone ku munota wa 41 nyuma yo guhabwa umupira na Ousmane Dembélé.

Karim Benzema yatsindiye Real Madrid igitego cya kabiri ku munota wa 72 ndetse yashoboraga kubona izamu mu bundi buryo bubiri bukomeye, ariko hari aho umupira yateye wasubijwe inyuma n’umutambiko w’izamu.

FC Barcelone y’umutoza Xavi, na yo yabonye uburyo butandukanye kuri Ousmane Dembélé, Pedri na Fati bagiye mu kibuga basimbuye, ariko ntiyabasha kububyaza umusaruro.

Gutsinda byatumye Real Madrid igera ku mukino wa nyuma uzaba ku Cyumweru ndetse igomba gutegereza ikipe ikomeza hagati ya Atlético Madrid yatwaye Shampiyona ya La Liga mu mwaka ushize na Atheltic Bilbao mu wundi mukino wa ½ uteganyijwe kuri uyu wa Kane saa Tatu z’ijoro.

Vinicius Jr ni we wafunguye amazamu kuri King Fahd Stadium
Luuk de Jong yishyuye mu minota ya nyuma y'igice cya mbere nyuma y'amakosa ya Eder Militao
Karim Benzema yahushije uburyo bwiza muri uyu mukino
Ansu Fati ukirutse imvune yishyuriye FC Barcelone ku munota wa 85
Federico Valverde winjiye mu kibuga asimbuye yishimira igitego yatsinze mu minota y'inyongera
Pedri yafashije Barcelone gusatira cyane ubwo yari agiye mu kibuga
Vinicius yari yagoye abakinnyi ba FC Barcelone
Xavi Hernandez waryohewe na El Clasico ari umukinnyi yahuraga na Real Madrid bwa mbere nk'umutoza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .