00:00:00 IGIHE NETWORK KN KINYARWANDA EN ENGLISH FR FRANCAIS

Abana bakoresha ’NABU’ mu gusoma ibitabo bashyiriweho uburyo bwo kubibona bitabasabye internet

Umuryango mpuzamahanga utegamiye kuri Leta uteza imbere umuco wo gusoma ibitabo hakoreshejwe ikoranabuhanga (NABU), wakoze impinduka mu mikorere yawo zirimo gusoma ibitabo udafite internet n’ibindi bigamije gutoza abana umuco wo gusoma.

NABU ni uburyo bukoreshwa n’umuntu ufite telefoni igezweho agashyiramo ‘application’ (NABU App), akabasha kubona ibitabo bigenewe abana mu ndimi zitandukanye mu buryo bw’ikoranabuhanga.

Uyu muryango mu rwego rwo gukomeza korohereza ababyeyi n’abana, hari impinduka zitandukanye wakoze zirimo kuba kuri App Store na Play Store itacyitwa NABU.org ahubwo yabaye NABU.

Gukoresha iyi serivisi byasabaga kuba ufite internet ariko ubu bashyizeho uburyo umubyeyi ashobora kumanura ‘download’ ibitabo, igihe atayifite, abana bakabisoma nta nkomyi.

Ikindi bakoze ni uko umubyeyi ashobora gushyiriramo buri mwana konti ye ikaba imwanditseho bidasabye ko abana bose bakoresha konti imwe. Buri mwana agira konti ye kandi binyuze ku nkuru y’umubyeyi wabo. Ibi bikaba bizafasha buri mwana gusoma ibye n’ababyeyi bakabasha kugenzura ibyo basomye.

Mu kurushaho korohereza abakoresha serivisi zabo ubu kuri iyi ‘application’ ahabanza hayo hashyizwe no mu rurimi rw’Ikinyarwanda.

Akarusho kashyizwe kuri iyi application ni uko ibiyiranga bishya bishimishije birimo ibishushanyo mbonera byasubiwemo, byorohereza abana gushaka no gusoma ibitabo bakunda, bityo bakigenga mu misomere yabo.

Umukozi muri NABU, Nkwakuzi Phillipe, yabwiye IGIHE ko bahisemo gukora aya mavugurura kugira ngo barusheho kuba inshuti z’abana kandi babatoze umuco wo gusoma.

Yagize ati “Twari tugamije ko application irushaho kuba inshuti y’abana kandi kwari ukugira ngo buri muntu abashe kubona ibitabo ashaka ndetse no kugabanya internet abakoresha NABU bakoresha.”

Isomero rya NABU kuri ubu ubu rigaragaza inkuru zirenga 1 000 ziri mu ndimi zitandukanye zirimo Ikinyarwanda, Icyongereza n’Igiswahili. Kuri ubu abakoresha NABU mu Rwanda basaga ibihumbi 800.

Abana bakoresha NABU mu gusoma ibitabo bashyiriweho uburyo bwo kubibona bitabasabye internet
Kuri NABU ababyeyi babasha kugenzura ibyo abana babo bari gukora
Hakozwe impinduka kuri application ya NABU zigamije kunezeza abana bayikoresha

Special pages
. . . . . .