00:00:00 IGIHE NETWORK KN KINYARWANDA EN ENGLISH FR FRANCAIS

Kuki EU igira indimi ebyiri ku gisobanuro gikwiye cy’umuntu?

Yanditswe na Mukagasana Yolande
Kuya 13 Ukwakira 2021 saa 07:33
Yasuwe :
0 0

Mbere yo kwandika iyi nkuru, nabanje kwishakamo umwete w’uburyo nayobora umujinya wanjye. U Bubiligi nanjye ni igihugu cyanjye ariko si ndi imfubyi y’Umuryango w’Abibumbye.

Ni yo mpamvu nahisemo kwandika, ndigengesera mu magambo yanjye ndetse nizeye ko ajyanye n’imyimerere ya Sosiyete Sivile y’u Rwanda n’u Bubiligi. Paul Rusesabagina, intwari yakozwe n’abo mu Burengerazuba, ni umuterabwoba.

Uyu yungukiye mu nkunga z’abantu b’inyangamugayo ahita atangiza iterabwoba rye ku Rwanda rwifitiye amahoro.

Nzi neza Rusesabagina mu Rwanda mbere ya Jenoside, mu gihe yabaga na nyuma yayo. Mu Bubiligi, nari nzi Paul na mbere y’uko aza kuhatura ubwo yaguraga inzu ye ya mbere. Namusuye i Laeken, Rue Wautier, n°6.

Ndi Umunyarwandakazi nka Paul Rusesabagina. Ndi Umubiligi nka we. Icyo tudahuriyeho ni uko Paul afite ishyaka rya politiki, njye ntaryo mfite.

Paul yatoranyijwe na Hollywood agirwa Schindler w’Umunyarwanda, nyamara Schindler wa nyawe w’Umu-Nazi yarokoye Abayahudi muri Filime ya Shoah. Uwo “Paul Rusesabagina warokoye ubuzima bw’abantu 1268 mu gihe cya Jenoside’’, nta muntu mu Rwanda umuzi nk’inyangamugayo.

Ariko ni nde washatse kumva abo Batutsi avuga ko yarokoye? Nta n’umwe. Ibyo ntibyabujije ko akomeza kwitwa Schindler w’u Rwanda.

Ikibabaje ni uko buri gihe abanyembaraga ari bo bashaka kuducecekesha. Abarokotse Jenoside yakorewe Abatutsi ntibafite uburenganzira bwo kuvuguruza ukuri kwacuzwe na Hollywood ku mpamvu za politiki ntazi neza. Sinzigera mba igikoresho kigamije kwisenya cyangwa ngo ngirweho ingaruka n’abakoresha amayeri bishakira inyungu.

Nkunda u Rwanda kandi nzahora nduvuganira kuko rwarababajwe bikomeye. Urukiko rwo mu Rwanda rwemeje ko Paul Rusesabagina ari umuterabwoba.

Buri gihe nibaza impamvu u Bubiligi butanga bukoresheje ikiganza kimwe, ikindi kigahita cyisubiza icyo bwatanze. U Rwanda n’u Bubiligi bifite umukoro wo kurinda abaturage babyo nta vangura. Ariko ubwo Bubiligi ni bwo busubira inyuma bugakina ku mubyimba u Rwanda n’Abanyarwanda bagizweho ingaruka n’ibikorwa by’iterabwoba.

Yabyanga cyangwa akabyemera, Rusesabagina ni Umunyarwanda, yakoreye iterabwoba mu Rwanda ndetse ku Banyarwanda. Iyo hari ibikorwa by’iterabwoba mu Bubiligi, ndashengurwa kuko nabwo ari igihugu cyanjye.

Kuki ntagira ibyiyumviro bimwe mu gihe bibaye ku Rwanda? Ariko birandakaza iyo mbonye imyitwarire y’u Bubiligi iyo bigeze ku iterabwoba ryakorewe mu Rwanda.

U Bubiligi ntibwigeze bwicuza ku myitwarire yabwo mu Rwanda rwo hambere nubwo yagize ingaruka zikomeye ku Banyarwanda n’Ababiligi.

Nshengurwa no kubona uko Umuryango w’Ubumwe bw’u Burayi busunitswe n’u Bubiligi wafashe iya mbere mu gutesha agaciro Abanyarwanda bagizweho ingaruka n’ibitero ahubwo ugahanika amajwi usaba uburenganzira kuri Paul Rusesabagina nk’aho ari we kiremwamuntu cyonyine kiri ku Isi. Kuri EU, abagizweho ingaruka n’iterabwoba rya Rusesabagina ntibari abantu.

Mu 1994, u Bubiligi ni bwo bwatije umurindi igikorwa cya Loni cyo kuvana ingabo zayo mu Rwanda mu gihe cya Jenoside, zidusiga mu menyo y’abaduhigaga ngo batwice.

Nari nicaye imbere ya Jean Luc Dehaene wabaye Minisitiri w’Intebe w’u Bubiligi ubwo yavugaga ashize amanga ko yakongera no kubikora biramutse bibayeho. Sinabyibagiwe kandi sinzigera mbyibagirwa.

Ni iyihe mpamvu nasubiye mu Rwanda nyuma y’imyaka 16 nari maze ku butaka bw’u Bubiligi? Ni ukubera umutekano muke waterwaga n’abajenosideri n’inshuti zabo nabanaga na bo mu Bubiligi; ni ba bajenosideri nahunze muri Gashyantare 1995.

Imanza natsinze zirimo n’izo ntigeze mpabwamo indishyi z’akababaro ndetse nkabwirwa ko u Bubiligi ari igihugu cyubahiriza uburenganzira bwa muntu, kikanatanga ubutabera kurusha u Rwanda?

Ubutabera budafite indishyi simbufata nk’ubutabera. Mfite inyandiko z’imyanzuro y’urubanza, zizafasha mu gihe kizaza no mu mateka.

EU ntiyigeze igirira impuhwe abagizweho ingaruka n’ibitero bya Paul Rusesabagina. Ni uburenganzira bwe.

Paul Rusesabagina yareganwe n’Abandi Banyarwanda bakiri bato yakoresheje muri ibyo bitero, mu gihe abana be bo batuje batimaje.

Igitangaje ni uko mu mboni z’Umuryango w’Ubumwe bw’u Burayi, Rusesabagina gusa ari we utarahawe ubutabera buboneye. Urubyiruko yashoye mu ntambara, abagizweho ingaruka n’iterabwoba, nibaza aho iyo EU ibashyira.

Twigarukire ku mfubyi yacu ya Loni yahawe u Bubiligi nk’uko yabivuze mu rubanza rwe. Ndifuza kubaza aho abaterabwoba bafatiwe mu Bubiligi cyangwa mu Bufaransa baherereye. Osama Krayem, Ayoub El Khazzani warashe kuri Gari ya Moshi ya Thalys, Mohamed Abrini n’abandi bari he?

Ni abaterabwoba hashingiwe ku bikorwa bakoreye ku butaka bwo mu bihugu byo mu Burengerazuba n’u Bubiligi by’umwihariko, ahantu rukumbi ubuzima buba burinzwe. Uyu munsi iyo ibitero nk’ibyo biba bitegurirwa mu Rwanda ngo bizagabwe mu Bubiligi, u Rwanda rwari kubireka bikaba? Ese u Bubiligi bwari kwitwara gute?

Ibi binyibutsa ubwo Amerika zahigaga Ben Laden nko kureba umukino wa ruhago. Ubwo yicwaga, Umunyamabanga Mukuru wa Loni yifatanyije mu byishimo na Amerika avuga ko ubutabera bwabonetse ku bagizweho ingaruka n’ibitero byagabwe muri New York.

Umuterabwoba wacu yatawe muri yombi ndetse araburanishwa ndetse nta butabera bukwiye yabonye. Ese yagombaga kwicwa nk’uko byagenze kuri Bin Laden? Bisa nk’aho naba ndi kurota. Abaterabwoba bose ni bamwe kuko bahurira ku mushinga umwe, gukora iterabwoba.

Paul Rusesabagina yageze ku ntego ye. Yaratsinze. Nk’uko iterabwoba rigira intego ya politiki ikoresha intwaro y’ubwicanyi bukorerwa abasivili b’inzirakarengane mu kurema ibibazo bya politiki, ibyatangajwe na EU byerekana ko Rusesabagina yageze ku ntego ye. Paul ni we uzi neza ibyo ari gukora ariko EU ntizi ibyo iri gukora.

Umushinga wa Politiki y’iterabwoba wateguwe by’igihe kirekire kuva ubwo ibihugu byo mu Burengerazuba bitangira kudukorera intwari. Ni ryari iyi ntwari ya Hollywood izahabwa Igihembo cyitiriwe Amahoro cya Nobel? Biragoye kubona imfubyi umuryango we wafashije mbere yo gufasha mushiki we nabonye mu Rwanda. Kuki atari we yahereyeho?

Abo bafatanyije kandi ari we ubahaye amabwiriza bahamijwe icyaha ndetse batanga ubuhamya. Rusesabagina ubwe abinyujije kuri YouTube yatangaje amagambo asa n’uhamagarira abantu gukora iterabwoba, kandi bigaragarira buri wese ko ntacyo yakoze mu ibanga.

Ubwo yazamurwaga mu mapeti, akagirwa intwari na Amerika, abarokotse n’abantu bari munsi y’itegeko rye nta gaciro bari bafite imbere ya EU.

Iyo dukomeza gutuza, uyu munsi wenda aba yariyise Umutaliyani kuko yari guhabwa ubwenegihugu bw’icyubahiro bw’u Butaliyani, mu gihe iki gihugu cyaba cyarayobotse uyu mujyo.

Urubanza rw’iterabwoba rwabaye urwa mbere rwatambukijwe imbonankubone mu Rwanda, ndetse runasemurwa mu ndimi z’amahanga. Ni nde wishyuye ibyo byose? U Rwanda. Rwakoresheje iki? Imisoro y’abagizweho ingaruka n’iterabwoba. Meze nk’uri kurota cyangwa EU ikaba nta mbabazi n’impuhwe na nke igirira ikiremwamuntu.

Rusesabagina yashinze MRCD, ishyaka Nyarwanda aho kuba iry’u Bubiligi, mu gihe Atari Umunyarwanda. Nyuma yanashinze Umutwe w’Ingabo yise Front de Libération Nationale (FLN). Yinjijemo urubyiruko rw’Abanyarwanda abohereza ku rugamba. Abo ni bo batanga ubuhamya uyu munsi wa none.

Nyamara abana be bameze neza aho bari mu Bubiligi na Amerika. Mbere y’ifatwa rye, hari ibyo yasobanuye kuri YouTube avuga amavu n’amavuko ya FLN na MRCD.

Ati “Twatangije MRCD mu Ugushyingo 2016. Ni ihuriro ryari ryarimo CNRD-Ubwiyunge iyoborwa na Wilson Irategeka na PDR-Ihumure nayoboraga. Nyuma y’ibiganiro birebire, twashyizeho inkingi eshanu duhuriyeho. Inkingi ya mbere yashyirwaga mu bikorwa n’abasirikare bacu. Iya kabiri yari dipolomasi, iya gatatu yari ubukangurambaga, iya kane yari itangazamakuru naho iya gatanu ari icungamutungo. Twarakoranye, bigeze mu mpera za 2017, bagenzi bacu bo muri Mouvement Révolutionnaire Rwandais (RRM) ya Callixte Nsabimana bashatse kutwiyungaho. Nyuma yo kubiganiraho, RRM yemerewe muri Werurwe 2018 ndetse icyo gihe twatangiye gushaka izina twita ingabo zacu. Twazise FLN kuko RRM yari yinjije abasirikare bisobanuye ko tugomba kugira izina buri wese yisangamo. Kuva icyo gihe, abahungu bacu twabise FLN ndetse ni yo mpamvu FLN itari iya PDR, CNRD cyangwa RRM, ni iya MRCD.’’

Ndashimira Polisi y’u Bubiligi, Amerika, Interpol n’abandi bagaragaje ubushake bwo gukorana kugira ngo ubutabera butangwe kuri Rusesabagina no ku bagizweho ingaruka n’ibikorwa bye muri Nyabimata n’ahandi.

U Rwanda rufite inyandiko n’ibihamya bihagije ku ruhare rwa Rusesabagina mu bikorwa by’iterabwoba. Niba atavuga rumwe na Perezida Paul Kagame, kuki ajya kubyitura abaturage? Niba yiyumva nk’utavuga rumwe n’ubutegetsi, nta burenganzira afite bwo kwica inzirakarengane.

Mu gusoza, ndashaka kugira inama u Rwanda n’u Bubiligi nifashishije imvugo ebyiri, buri wese arakuramo ibye. Bivugwa ko “Akebo kajya iwa mugarura’’ cyangwa “Nta cyahishwe kitazahishurwa.”

Ibikubiye muri iyi nyandiko ni ibitekerezo bwite by’umwanditsi, Mukagasana Yolande

Paul Rusesabagina yakatiwe gufungwa imyaka 25, ahamijwe ibyaha by'iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .