00:00:00 IGIHE NETWORK KN KINYARWANDA EN ENGLISH FR FRANCAIS

Umugenzuzi w’Imari yatahuye imishinga ishobora guhombya leta agera kuri miliyari 426,7 Frw

Yanditswe na Kanamugire Emmanuel
Kuya 13 May 2022 saa 07:50
Yasuwe :

Raporo y’Umugenzuzi w’Imari ya Leta y’umwaka wa 2020/2021 igaragaza ko igipimo cy’ikoreshwa ry’ingengo y’imari igenewe imishinga itandukanye mu nzego za leta, kikiri hasi ku buryo agera kuri miliyari 426,7 z’amafaranga y’u Rwanda ashobora kudakoreshwa yose nk’uko yari ateganyijwe.

Ni ibyasobanuwe n’Umugenzuzi Mukuru w’Imari ya Leta, Kamuhire Alexis ubwo yagezaga iyi raporo ku bagize Inteko Ishinga Amategeko, kuri uyu wa 12 Gicurasi 2022.

Mu bisobanuro yatanze, yavuze ko mu bigo 206 byagaenzuwe, 96 byagize raporo ya ’nta makemwa’, 60 bigira raporo ya ‘byakwihanganirwa’ mu gihe 13 byagize raporo ’igayitse’.

Ibigo byabonye raporo ya nta makemwa byarazamutse kuko byavuye kuri 53% mu mwaka wa 2019/2020 bigera kuri 57% nubwo bitabujije leta guhomba bitewe no gukererwa kw’imishinga, iyatawe n’iyahagaze ndetse n’imitungo idakoreshwa.

Igipimo cy’ishyirwa mu bikorwa ry’imwe mu mishinga byagaragaye ko kiri hasi kuko hari iyari hafi kurangira nyamara ibikeneye gukorwa bikiri byose.

Ikibazo gikomeye kigaragara mu mishinga irimo uw’Ikigo gishamikiye kuri REG, gishinzwe ibikorwaremezo byo gukwirakwiza umuriro w’amashyanyarazi (EDCL) uzwi nka ‘Interconnection of Electrical Grids of Nile Equatorial Lakes countries project’.

Igihe ntarengwa cyo guhabwa amafaranga na KFW, Banki yo mu Budage cyari giteganyijwe ku ya 31 Ukuboza 2021. Nyamara hari miliyoni zisaga 30 z’amayero biteganyijwe ko azatangwa mu Ukuboza 2022 mu gihe nta mpamvu yasobanuwe y’icyatumye igihe cyo gutanga aya mafaranga cyigizwa inyuma.

Iyi raporo ivuga ko agera kuri miliyari 35,4 Frw ashobora guca leta mu myanya y’intoki ku bw’iyo mpamvu.

Izindi mpungenge ziri ku mushinga w’urugomero rwa Rusumo ruhuriweho n’ibihugu bitatu ari byo u Rwanda, Tanzania n’u Burundi (Regional Rusumo Falls Hydropower Project Transmission Lines component).

Biteganyijwe ko imirimo yawo izasozwa ku wa 31 Kanama 2022 nyamara hari ingengo y’imari igera kuri 48% by’agaciro k’umushinga itarakoreshwa aho bishoboka ko EDCL yahombya leta miliyari 17,4 Frw.

Mu Kigo Gishinzwe Gukwirakwiza Amazi, Isuku n’Isukura (WASAC) naho hagaragaye umushinga watangijwe mu 2018 ugomba gusozwa ku ya 31 Ukuboza 2023 ariko kugeza ubwo igenzura ryakorwaga hari hamaze gukoreshwa 18% by’ingengo y’imari iteganyijwe ku buryo hari impungenge z’uko miliyari 352 Frw ashobora guhomba.

Ikibazo nk’iki kandi kiri mu mushinga w’Urwego Rushinzwe Iterambere (RDB) mu mushinga wa ‘Rwanda Innovation Fund (RIF)’ biteganyijwe ko uzasozwa ku ya 31 Ukuboza 2022. Nubwo bimeze bityo, kugeza ku ya 30 Kamena 2021 hari hamaze gukoreshwa 73% by’ingengo y’imari ku buryo miliyari 21,7 Frw yari atarakoreshwa.

Amasezerano yashyizweho umukono hagati ya Guverinoma n’abatanze ayo mafaranga agena ko ku mafaranga atakoreshejwe ku gihe hatangwa amande. Bitewe n’ikigero gito cy’ishyirwa mu bikorwa ry’imishinga, byatumye amafaranga atinda kuri za konti agenda yiyongera ku buryo amande agera kuri miliyari 1,2 z’amafaranga y’u Rwanda nk’uko iyi raporo ikomeza ibigaragaza.

Uyu mwaka (2020/2021) hagenzuwe imishinga, ibigo n’inzego bya leta bigera kuri 206 byahawe ingengo y’imari igera kuri miliyari 3562 Frw.

Mu bindi bibazo bikomeye bigaragara muri iyi raporo ni ibishingiye ku idindira ry’imishinga igenewe guhindura ubuzima bw’abaturage nk’uko byari biteganyijwe muri gahunda ya NST1.

Ibi byagaragaye mu mishinga 37 ifite agaciro ka miliyari 201 Frw iri mu nzego za leta zigera kuri 28.

Muri iyi mishinga harimo 25 ifite agaciro ka miliyari 89,9 Frw yagaragaye muri uyu mwaka wakozwemo igenzura na 12 ifite agaciro ka miliyari 111 Frw yo mu myaka yabanje. Idindira ryageze ku myaka itandatu.

Ikindi ni uko abagenzuzi batahuye imishinga 11 ifite agaciro ka miliyari 102,9 Frw mu bigo icyenda yatawe ituzuye. Abatsindiye amasoko bahagaritse ibikorwa ku mpamvu zirimo imikorere mibi, ibibazo mu ngengo y’imari cyangwa ubukererwe mu kuyishyira mu bikorwa.

Hari kandi ibikorwaremezo cyangwa ibikoresho bigera kuri 88 bya miliyari 37,2 Frw byasanzwe mu bigo n’inzego za leta 49 bitabyazwa umusaruro.Birimo 54 bishya bifite agaciro ka miliyari 28,8 Frw na 34 bifite agaciro ka miliyari 8,4 Frw byagaragaye muri raporo zakozwe mbere.

Ku bijyanye n’imisoro byagaragaye ko ibigo 35 bitigeze bikata abakozi umusoro ungana na miliyoni 431 Frw mu gihe 53 byawukase ariko ntibishyikirize Ikigo cy’Imisoro n’Amahoro (RRA) agera kuri miliyari 26 Frw nk’uko itegeko ry’umusoro ribigena.

Ikindi kibazo cyagaragajwe ni ikijyanye n’uburyo ibigo bya leta bitinda kwishyura ba rwiyemezamirimo baba batsindiye amasoko. Nibura agera kuri 41,7 Frw yishyuwe mu bukererwe bugera ku myaka itandatu bikozwe n’ibigo bya leta bigera kuri 82.

Muri raporo kandi amafaranga arenga miliyari 2,4 Frw ntaragaruzwa muri miliyari zirenga eshanu yari yanyerejwe umwaka ushize.

Umugenzuzi Mukuru w'Imari ya Leta, Alexis Kamuhire ubwo yamurikiraga abagize Inteko Ishinga Amategeko, Raporo y'igenzura ryakozwe mu 2020/2021
Abagize Inteko Ishinga Amategeko bagejejweho raporo banayitangaho ibitekerezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .