00:00:00 IGIHE NETWORK KN KINYARWANDA EN ENGLISH FR FRANCAIS

MTN Rwanda yafunguye Ishami ku Gisozi rifite umwihariko wo korohereza abafite ubumuga (Amafoto)

Yanditswe na Mukahirwa Diane
Kuya 13 Ukwakira 2021 saa 11:07
Yasuwe :
0 0

Sosiyete y’Itumanaho, MTN Rwanda, yafunguye ishami rishya mu Murenge wa Gisozi mu Karere ka Gasabo, rifite umwihariko wo korohereza abafite ubumuga mu gihe bashaka serivisi.

Iri shami ryafunguwe ku wa Gatatu, tariki ya 13 Ukwakira 2021, riherereye mu Gakinjiro ka Gisozi. Muri ryo hazajya hatangirwamo serivisi zose zitangirwa mu mashami ya MTN cyane izijyane n’ikoranabuhanga.

Kuri iri shami hashyizweho uburyo bworoshye abafite ubumuga bazabasha kubona serivisi, hari umukozi uzi ururimi rw’amarenga uzajya asobanurira abafite ubumuga bwo kutumva ndetse n’intebe z’abandi babana n’ubundi bumuga.

Iki cyemezo kiri mu bikubiye mu bufatanye MTN Rwanda iheruka kugirana n’Ihuriro ry’Imiryango y’Abafite Ubumuga mu Rwanda (NUDOR), ko buri shami rizaba riha abafite ubumuga serivisi bakwiye.

Umuyobozi wa MTN, Ishami rya Gisozi, Mugabo Abdul Karim, yavuze ko bashyizeho umwihariko ku bafite ubumuga kuko badashaka kugira uwo baheza mu gutanga serivisi.

Yagize ati “Burya ushaka kugera kure ajyana na bose, turifuza kugera ku bantu bose ntawe usigaye inyuma, haba ufite ubumuga n’undi mucuruzi usanzwe agahabwa serivisi nziza.”

Yakomeje avuga ko iri shami barishyize muri aka gace kuko ari hamwe mu hagaragara abacuruzi benshi mu Mujyi wa Kigali, bakaba bizeza abahakorera kubona serivisi nziza kandi ku gihe.

Uwari uhagarariye Umuyobozi wa NUDOR, Rwema Jean Baptiste, yavuze ko bashimishijwe no kuba MTN Rwanda yaratekereje ku bafite ubumuga bakoroherezwa mu kubona serivisi.

Yagize ati “Abantu bafite ubumuga kimwe mu bibazo bibakomereye ni ukugera kuri serivisi zo mu ngeri zitandukanye, wasangaga no kugera kuri serivisi za MTN bigoye. Kuba hafunguwe iri shami ku buryo ufite ubumuga azagera kuri serivisi nta mbogamizi ni ijwi rikomeye ku Banyarwanda by’umwihariko abafite ubumuga.”

Yakomeje asaba ibigo n’abantu batanga serivisi gushyira imbaraga mu gushaka uko bakorohereza abantu abafite ubumuga kugera kuri serivisi.

Ku ruhande rw’abakorera ubucuruzi muri aka gace bavuze ko banejejwe no kwegerezwa iri shami kuko hari serivisi bakeneraga zidatangwa n’aba-agents bikabasaba kujya kure ku yandi mashami.

Mutiganda Jean Baptitse ucuruza ibikoresho by’ubwubatsi yavuze ko bagorwaga no kubona serivisi za MTN cyane izijyanye no guhinduza simcard ‘Sim swap’.

Yagize ati “Twagorwaga no gukoresha serivisi yo guhinduza simcard ‘sim swap’, ukajya kureba aba-agents bakakubwira ko badatanga iyo serivisi, bakakubwira ngo jya ku cyicaro bikakugora kujya Nyabugogo cyangwa Nyarutarama. Ubu turajya tubona serivisi hafi.”

Ibi abihuje na Nishimwe Chantal, wavuze ko bagorwaga no guhinduza simcard n’izindi serivisi zidatangwa n’aba-agents; yasobanuye ko bagiye kujya bazibonera ku ishami.

MTN Rwanda yashyize imbaraga mu gufasha abifite ubumuga kuko ubu batanze utuzu ‘kiosque’ 60 ku bafite ubumuga ndetse banabaha igishoro cy’ibihumbi 150 Frw.

MTN Rwanda yatangiye gukorera mu Rwanda mu 1998, kugeza ubu ifite amashami ‘MTN Services Centre’ 55 hirya no hino mu gihugu.

MTN Rwanda yafunguye ishami rishya rya Gisozi ryorohereza abafite ubumuga
Ishami rya MTN rya Gisozi riherereye mu Gakinjiro
Abayobozi batandukanye muri MTN batemberejwe ishami rya Gisozi
Abakozi bo muri iri shami biteguye gutanga serivisi nziza
Intebe zashyiriweho abafite ubumuga
MTN yatashye ishami rishya, ni igikorwa cyari kiryoheye ijisho
Muri iri shami hazajya hacururizwamo amatelefoni y'ubwoko butandukanye
Abakozi ba MTN Rwanda bari bitabiriye umuhango wo gutaha ishami rishya ku Gisozi
Bamwe mu bayobozi b'amashami ya MTN bari bitabiriye uyu muhango
Hari umukozi ukoresha ururimi rw'amarenga mu gufasha abafite ubumuga
Umuyobozi Mukuru wa MTN Rwanda, Mitwa Ng'ambi, yavuze ko iyi sosiyete izakomeza guha serivisi nziza abafite ubumuga
Umuyobozi Mukuru w’Urugaga rw’Abikorera mu Rwanda, PSF, Stephen Ruzibiza, yashimye MTN ku gutekereza ku bafite ubumuga
Umuyobozi Mukuru wa MTN Rwanda, Mitwa Ng'ambi, yahasize ubutumwa
Umuyobozi wa MTN, Ishami rya Gisozi, Mugabo Abdul Karim, yavuze ko bashyizeho umwihariko ku bafite ubumuga kuko badashaka kugira uwo baheza mu gutanga serivisi
Uwari uhagarariye Umuyobozi wa NUDOR, Rwema Jean Baptiste, yavuze ko bashimishijwe no kuba MTN Rwanda yaratekereje ku bafite ubumuga bakoroherezwa mu kubona serivisi
Mutiganda Jean Baptitse ucuruza ibikoresho by’ubwubatsi yavuze ko bagorwaga no kubona serivisi za MTN cyane izijyanye na ‘Sim swap’
Nishimwe Chantal yavuze ko bagorwaga no guhinduza simcard n’izindi serivisi zidatangwa n’aba-agents
Iri shami riri mu gace gakorerwamo ubucuruzi cyane muri Gisozi
Abakorera mu Gakinjiro bishimiye ishami rishya rya MTN begerejwe

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .