00:00:00 IGIHE NETWORK KN KINYARWANDA EN ENGLISH FR FRANCAIS

Abarundi bahoze muri P5 basabiwe gufungwa burundu, batsembera urukiko ko nta cyaha bakoze

Yanditswe na Ntabareshya Jean de Dieu
Kuya 24 Ugushyingo 2021 saa 07:31
Yasuwe :
0 0

Abahoze ari abarwanyi b’Umutwe w’Iterabwoba wa P5 bakomoka mu Burundi basabiwe n’Ubushinjacyaha bwa Gisirikare igihano cy’igifungo cya burundu ku byaha bifitanye isano n’ibikorwa by’iterabwoba ndetse no kugirira nabi ubutegetsi buriho no kubuhirika hakoreshejwe intambara, ariko batsembera urukiko bavuga ko ibyaha bashinjwa ntabyo bakoze.

Mu bahoze ari abarwanyi 37 n’umwe watorotse ubutabera bari kuburanishwa mu Rukiko Rukuru rwa Gisirikare, harimo abanyamahanga 10 bari mu mitwe y’iterabwoba yakoreraga mu mashyamba yo muri Repubulika Iharanira Demokarasi ya Congo igamije gutera u Rwanda.

Aba banyamahanga barimo Abarundi umunani, Umunye-congo ndetse n’Umugande.

Kuri uyu wa Gatatu, tariki ya 24 Ugushyingo 2021 ni bwo Ubushinjacyaha bwatangiye gusabira ibihano abahoze ari abarwanyi b’iyo mitwe bafashwe mu bihe bitandukanye nyuma yo kugaba ibitero mu Ntara y’Amajyaruguru y’u Rwanda mu Karere ka Musanze byangije byinshi.

Uhagarariye Ubushinjacyaha yagaragaje ko aba Barundi bahamwa n’ibyaha bakurikiranyweho birimo kugirira nabi ubutegetsi buriho hakoreshejwe intambara, icyaha gihanishwa igifungo cya burundu, ubujura bukoresheje intwaro gihanishwa imyaka 20 y’igifungo, kuba mu mutwe w’ingabo zitemewe gihanishwa igifungo cy’imyaka 10, icyaha cy’iterabwoba gihanishwa imyaka 20, Ubwicanyi n’ubwinjiracyaha mu bwicanyi gihanishwa igifungo cya burundu.

Yabasabiye guhanishwa igihano cy’igifungo cya burundu hakurikijwe ingingo ya 61 na 62 y’itegeko rigena ibyaha n’ibihano muri rusange ivuga ku byaha byabaye impurirane mpuzamugambi, aho ubihamijwe n’urukiko ahanishwa igihano kiruta ibindi gukomera.

Abaregwa bahawe umwanya ngo bisobanure ku bihano basabiwe n’Ubushinjacyaha bavuga ko batabyemera kuko nta ruhare babigizemo.

Bavuze ko nubwo babaye mu Mutwe wa P5, batigeze batekereza kugirira nabi u Rwanda cyane ko ari igihugu batari barabayemo ku buryo bagira umugambi wo kugihemukira, gusa bemeza ko bashutswe bizezwa akazi bakisanga bari muri iyo mitwe.

Kananura Fred uri mu baregwa yagaragaje ko nta mugambi yigeze agira wo kwihuza n’Umutwe wa P5 mu bikorwa bigamije iterabwoba no kugirira nabi ubutegetsi buriho.

Yasabye urukiko kumugira umwere ku byaha byose akurikiranweho kuko ntabyo yakoze cyane ko hari ibyaha byakozwe afungiye mu Rwanda nk’ibitero byagabwe mu Karere ka Musanze mu 2019.

Si ku nshuro ya mbere Abarundi muri uru rubanza bahakana ibyo baregwa kuko no mu gihe cyo kuburana mu mizi bakunze gutsimbarara ko bagiye muri P5 na RUD Urunana nta bushake babigizemo bityo ko badakwiye kuryozwa ibyakozwe n’abari bafite umugambi mubi ku Rwanda.

Urubanza rw'abarwanyi bahoze muri RUD Urunana na P5 rurakomeje aho bari gusabirwa ibihano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .