00:00:00 IGIHE NETWORK KN KINYARWANDA EN ENGLISH FR FRANCAIS

Abaturage ba Kangondo batsembeye Umujyi wa Kigali ko bataba mu nzu wifuzaga kubimuriramo

Yanditswe na Ntabareshya Jean de Dieu
Kuya 14 Mutarama 2022 saa 03:53
Yasuwe :

Bamwe mu baturage bari batuye mu Midugudu ya Kangondo na Kibiraro, yo mu Kagari ka Nyarutarama, Umurenge wa Remera, Akarere ka Gasabo, batsembeye Umujyi wa Kigali ko bataba mu nzu wubatse washakaga kubimuriramo, basaba ingurane z’imitungo yabo mu mafaranga.

Muri 2017 nibwo Umujyi wa Kigali watangiye kubarira abatuye Kangondo na Kibiraro hazwi nka Bannyahe, amafaranga ajyanye n’imitungo yabo bari bahafite kugira ngo bazimurwe kubera inyungu rusange.

Mu biganiro bitandukanye Umujyi wa Kigali wari wemeje ko abazemera bazahabwa ingurane ihwanye n’igenagaciro ryakozwe cyangwa bagababwa inzu zihwanyije agaciro n’izo bari batuyemo.

Inzu zarubatswe ndetse zinahabwa abaturage ariko bamwe banga kuzijyamo bavuga ko bakeneye ingurane mu mafaranga, ibintu byatumye bamwe bahitamo kugana inkiko kugira ngo barenganurwe.

Muri Werurwe 2020, Umujyi wa Kigali wagiranye amasezerano n’aba baturage babarirwa imitungo y’aho bari batuye kugira ngo bahabwe inzu gusa bamwe barabyanze.

Mu rubanza ruheruka, Urukiko Rwisumbuye rwa Nyarugenge rwari rwabagiriye inama yo kubanza kunyura mu buhuza.

Bake cyane muri bo nibo ibibazo byabo byabashije gukemuka abandi birananirana kuko basabye ko bahuza ubutaka bwabo bakigurishiriza ku giti cyabo cyangwa bakubaka mu buryo bujyanye n’igihe ariko Umujyi wa Kigali na wo urabihakana.

Kuri uyu wa Gatanu tariki ya 14 Mutarama 2022 nibwo bari bongeye gusubira mu Rukiko Rwisumbuye rwa Nyarugenge kugira ngo urubanza rwabo rukomeze kuko ubuhuza bwananiranye.

Mu baburana harimo abasaba gusubizwa uburenganzira ku mutungo wabo, abandi basaba ko amasezerano yasinywe muri Werurwe hagati yabo n’Umujyi wa Kigali yakubahirizwa mu gihe hari n’abifuza kuyasesa.

Basabye ko bahabwaga ingurane mu mafaranga aho kuba inzu Umujyi wa Kigali ukomeje kubashishikariza kujyamo.

Ni abaturage bagera kuri 25 bunganirwa n’abarimo Me Ndihokubwayo Innocent, Me Buhuru Pierre Célestin, Me Songa Jean Claude n’abandi mu gihe Umujyi wa Kigali wari wunganiwe n’abavoka batatu barimo Me Safari Vianney na Me Shema Gerard.

Mu baburanye kuri iyi nshuro harimo Kabera, wasabye ko amasezerano yagiranye n’Umujyi wa Kigali yo gutuzwa mu nzu yaseswa kuko byateje amakimbirane mu muryango bitewe n’uko yasinywe umugore we atabyemera.

Me Safari wunganira Umujyi wa Kigali yavuze ko amasezerano hagati y’Umujyi wa Kigali n’uwitwa Kabera yakozwe mu bwisanzure ku mpande zombi cyane ko n’inzu yo gukodesha yateganywaga mu masezerano yayigiyemo gusa ngo yanze gutuzwa mu nzu yubakiwe.

Bakunduseke Frolien we yavuze ko kwemera kujya mu nzu y’ubukode bw’Umujyi wa Kigali bamaze kumusenyera byari amaburakindi, yagaragaje ko atemera inzu yo mu Busanza ko yahabwa ingurane mu mafaranga kuko yabariwe ingano y’amafaranga agera kuri miliyoni 40 Frw.

Nubwo yavuze gutyo ariko umugore we ntiyemera n’ayo masezerano kuko agaciro kahawe isambu ye ari gato agasaba ko yaseswa burundu.

Nyiramwiza Gloriose, yasabye ko yasesa amasezerano yagiranye n’Umujyi wa Kigali muri Werurwe kubera ko harimo inenge nyinshi cyane ko n’umugabo we atigeze ayashyiraho umukono kandi afite uburenganzira ku mutungo.

Munyandekwe we yasenyewe nta masezerano ahawe ariko ko hahabwa agaciro yarasenyewe kangana n’asaga miliyoni 17,5 Frw.

Uwitwa Ntakirutimana Gloriose yavuze ko niba koko aho yari atuye ari mu kajagari, yazakuraho inzu hanyuma agakoresha ubutaka bwe kubera ko batigeze bemeranywa ku ngurane y’ubutaka cyangwa akigurishiriza.

Me Ndihokubwayo Innocent yagaragaje ko kuba umukiliya we yemera kwisenyera akwiye guhabwa ubwo burenganzira ku mutungo we kugira ngo azigurishirize aho kwimurwa ku gahato.

Yagaragaje ko n’abandi yunganira bifuza ingurane ikwiriye, impozamarira ku ihungabana ryo kuba barasenyewe inzu batabizi no gusubizwa uburenganzira ku nzu zabo ku bo zitarasenywa.

Abunganira Umujyi wa Kigali bo bagagaje ko ibyo aba baturage basaba bitashoboka kuko bemeye gushyira umukono ku masezerano bityo mu kubaka inzu zo kubimuriramo hakoreshejwe amafaranga bakanga kuzijyamo nyuma. Bagaragaje ko abifuza gutuzwa muri izo nzu zubatswe mu Busanza bazihabwa kuko zihari.

Perezida w’iburanisha yahise apfundikira urubanza, rukazasubukurwa ku wa Gatanu tariki ya 21 Mutarama 2022.

Abimuwe Kangondo bubakiwe inzu mu Busanza mu Karere ka Kicukiro; bamwe banze kuzijyamo batsimbaraye ku guhabwa ingurane mu mafaranga
Abaturage bahawe izi nzu nk'ingurane ku mitungo bari bafite Kangondo
Zubatswe mu mudugudu ugezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .