00:00:00 IGIHE NETWORK KN KINYARWANDA EN ENGLISH FR FRANCAIS

Ibuka yakiranye yombi icyemezo cyo gutangiza urubanza rwa Kabuga mu mizi

Yanditswe na IGIHE
Kuya 20 Kanama 2022 saa 09:25
Yasuwe :

Umuryango ureberera abarokotse Jenoside yakorewe Abatutsi, Ibuka, watangaje ko wakiriye neza umwanzuro wo gutangiza urubanza rwa Kabuga Félicien mu mizi, uyu akaba akurikiranyweho ibyaha bya Jenoside n’ibyibasiye inyokomuntu.

Kabuga azatangira kuburana mu mizi ku wa 29 Nzeri 2022. Icyemezo cy’Urwego Mpuzamahanga rushinzwe imirimo yasizwe n’Inkiko Mpuzamahanga, rukorera i La Haye mu Buholandi cyatangajwe ku wa Kane w’iki Cyumweru nyuma y’imyaka ibiri ishize atawe muri yombi mu 2020.

Ubwo yatangazaga uyu mwanzuro, umucamanza muri IRMCT, Iain Bonomy yavuze ko uru rubanza ruzatangira humvwa impande zombi bikazakurikirwa no kumva ibijyanye n’ibimenyetso.

Ati “Urukiko rutegetse ko iburanirasha rizatangira i La Haye haherewe ku kumva impande zombi ku wa 29 Nzeri 2022, kumva ibijyanye n’ibimenyetso bizaba kuwa 5Ukwakira.”

Kabuga Félicien w’imyaka 80 yafatiwe mu Bufaransa muri Gicurasi 2020 nyuma y’imyaka 25 yari amaze yihishahisha, kuri ubu akaba afungiye i La Haye kuva mu Ukwakira 2020.

Mu kiganiro yagiranye na The East African, Umunyamabanga Nshingwabikorwa wa Ibuka, Ahishakiye Naphtali yagize ati “Twakiriye neza icyemezo cyo gutangiza urubanza muri Nzeri. Rwari rumaze igihe rutegerejwe. Urubanza rwa Kabuga ni intambwe ikomeye mu gutanga ubutabera ku barokotse Jenoside. Kuba ageze mu zabukuru akaba afite n’ibindi bibazo by’ubuzima ni ibigomba gushingirwaho mu kurwihutisha kugira ngo ubutabera butangwe.”

Kabuga Félicien akurikiranywe n’amategeko kubera uruhare yagize muri Jenoside yakorewe Abatutsi.

Afatwa nk’uwagize uruhare runini mu gutera inkunga umugambi wa Jenoside, anatanga umusanzu mu gushinga radio RTLM yabibaga urwango.

Mu nyandiko y’ibirego havugwa ko Kabuga wari umwe mu baherwe agakorana bya hafi n’ubutegetsi bwa Juvénal Habyarimana wari umukwe we, yategetse, yafashije Interahamwe zagize uruhare mu kwica no kugirira nabi abantu bafatwaga nk’Abatutsi muri za Perefegitura ya Kigali, Kibuye na Gisenyi.

Byongeye kandi bivugwa ko afatanyije n’abandi bantu, Kabuga yashyizeho ikigega cyo kurengera igihugu hagamijwe gukusanya amafaranga yo gushyigikira, mu rwego rw’imari n’ibikoresho, ibikorwa by’Interahamwe byo kwica no kugirira nabi Abatutsi.

Bivugwa kandi ko Kabuga, afatanyije n’abandi bantu, yiyemeje gutegura, gushyiraho no gutera inkunga y’imari, umutwe w’abantu bitwaraga gisirikare bitwaga Interahamwe za Kabuga muri Segiteri ya Kimironko, i Kigali, wari ufite intego yo gushimangira urwango rushingiye ku moko hagati y’Abahutu n’Abatutsi kugira ngo bagere ku ntego yo gukora jenoside.

Kabuga ashinjwa gutuma abantu bakora ibyaha, abahamagarira gukora jenoside cyangwa avuga amagambo arangwa n’itoteza mu nama zinyuranye n’ahantu hatandukanye mu Rwanda hagati ya Gashyantare cyangwa Werurwe 1994 na Gicurasi 1994.

Ahishakiye yongeyeho ko gukerereza cyangwa kutemera kwa bimwe mu bihugu n’inkiko kuburanisha cyangwa kohereza mu Rwanda abakekwaho ibyaha bya Jenoside ari ikibazo ku butabera abarokotse jenoside yakorewe Abatutsi mu 1994 bakeneye.

Urubanza rwa Kabuga Félicien rugiye gutangira kuburanisha mu mizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .