00:00:00 IGIHE NETWORK KN KINYARWANDA EN ENGLISH FR FRANCAIS

Imyaka ibiri iruzuye: Uko ifungwa rya Rusesabagina ryahinyuje benshi ku Rwanda

Yanditswe na Mwene Ndabarasa
Kuya 31 Kanama 2022 saa 03:46
Yasuwe :

Hari tariki ya 31 Kanama 2020, ubwo Abanyarwanda n’abanyamahanga batungurwaga n’inkuru y’uko Paul Rusesabagina wayoboraga MRCD-FLN, yafashwe ndetse ari mu maboko y’Urwego rw’Ubugenzacyaha, RIB.

Ni umutwe mu bihe bitandukanye wagabye ibitero ku basivili mu turere twa Nyamagabe, Nyaruguru na Rusizi, urasahura, wica ndetse ushimuta abaturage.

Mu bitero wagabye harimo ibyabaye ku wa 19 Kamena na 5 Ukuboza 2018, byahitanye inzirakarengane icyenda.

Mu gihe abantu bibazaga niba koko yafashwe, bidatinze amafoto ya Rusesabagina yambaye amapingu yarasakaye. Iyo biba amagambo gusa, byari kugorana kwemeza ko umuntu wiberaga muri Leta zunze ubumwe za Amerika n’u Bubiligi, ari muri kasho i Remera.

Abanyarwanda baciye umugani ngo uwanga amazimwe abandwa habona. Niko byagenze kuko urubanza rwa Rusesabagina rwabereye ku karubanda, rwerekanwa no kuri internet mu ndimi zitandukanye, kugira ngo abatuye isi yose barukurikirane.

Mu rubanza, Rusesabagina yari akurikiranyweho ibyaha 13. Birimo ibyo kurema umutwe w’ingabo utemewe cyangwa kuwujyamo, gutera inkunga iterabwoba, gukora iterabwoba ku nyungu za politiki no gukora no kugira uruhare mu bikorwa by’iterabwoba.

Harimo kandi gutanga amabwiriza mu gikorwa cy’iterabwoba, kuba mu mutwe w’iterabwoba, kugambana no gushishikariza abandi gukora iterabwoba n’ubufatanyacyaha ku cyaha cyo kwiba hakoreshejwe intwaro.

Ubwo inteko iburanisha yafataga umwanzuro nyuma y’iburanisha ryamaze igihe kirekire, Rusesabagina wareganwaga n’abandi makumyabiri yakatiwe igifungo cy’imyaka 25, cyagumishijweho mu bujurire.

Muri abo harimo Umuvugizi wa MRCD-FLN, Nsabimana Callixte alias Major Sankara na Nsengimana Herman wamusimbuye, na bo bahaniwe ibyaha by’iterabwoba. Sankara yahanishijwe gufungwa imyaka 20, yaje kugirwa 15 mu bujurire.

Tugiye kugaruka ku byaha byahamijwe Rusesabagina, ndetse n’ibimenyetso byifashishijwe n’Ubushinjacyaha.

Nubwo mu rubanza rwe yarezwe ibyaha yakoze ari mu mutwe wa MRCD-FLN, Rusesabagina yavuzwe kenshi mu gukorana ndetse no gutera inkunga umutwe wa FDLR na mbere ya 2010.

Hari ku wa 28 Ukwakira 2010 ubwo Ubushinjacyaha bukuru bw’u Rwanda bwashyiraga hanze impapuro zishinja Paul Rusesabagina gushyigikira imitwe y’iterabwoba ikorera muri Congo, harimo na FDLR.

Uwari Umushinjacyaha Mukuru w’u Rwanda, Martin Ngoga, yagiye muri Amerika kubonana n’inzego zaho, harimo na FBI yaje guhata ibibazo Rusesabagina. Basanze koko yoherezaga amafaranga muri Congo binyuze ku mugore we Tatiana Mukangamije, nk’uko na we yabyemereye RIB nyuma y’imyaka 10.

Ubushinjacyaha kandi bwagiye mu Bubiligi, aho bari kumwe na bagenzi babo bo muri icyo gihugu, abashinjacyaha bo mu Rwanda babajije Rusesabagina ibijyanye n’ibitero bya FLN.

Yateye umugongo abashinjacyaha bavuye mu Rwanda, avuga ko asubiza abazungu gusa. Abo yateye umugongo mu Bubiligi ni bo yaburanye nabo i Kigali, kugeza bimuyobeye akikura mu rubanza.

Ubwo igihugu cy’u Budage cyakoraga iperereza mu ibanga ku bayobozi bakuru ba FDLR, ari bo Ignace Murwanashyaka na Straton Musoni, inzego z’ubutasi zaho zaje gusanga Rusesabagina akorana bya hafi na Murwanashyaka, ndetse ubutumwa bwabo bwasomwe mu rubanza rwabo rwabereye i Stuttgart muri 2011.

Mu rubanza rwe, hagaragajwe ko Rusesabagina yohereje muri FLN ibihumbi bigera kuri 300 by’amadolari, avuye hirya no hino. Ku giti cye, yavuze ko yahaye abarwanyi 20,000 by’amayero, yiyongeraga ku yatanzwe mu bindi byiciro.

Rusesabagina yanemeye ko yateguye inama zo gukusanya amafaranga yari agenewe gutera inkunga umutwe w’iterabwoba yashinze.

Hari amashusho yo kuri YouTube yagaragayemo yemera uruhare mu bitero bya FLN, yongeraho ko byateguwe hagamijwe kwica abasivile kugira ngo hashyirwe igitutu kuri guverinoma, bityo yemere ibiganiro.

Ayo mashusho yaje gusibwa n’abamushyigikiye mu rwego rwo gusibanganya ibimenyetso.

Hari kandi ubutumwa bwahererekanwe hagati ya Rusesabagina n’umuyobozi w’ingabo ze, Lt Gen Wilson Irategeka, ku wa 30 Ukwakira 2018 no ku yandi matariki, hamwe na Twagiramungu Faustin wahoze ari Minisitiri w’Intebe, na we ubarizwa mu mpuzamashyaka MRCD-FLN, baganira ku bitero.

Hari aho yabwiye Twagiramungu ko ataboneka kubera ko ahuze, ashakisha inkunga igenewe "abahungu banjye".

Mu bundi butumwa, Lt Gen Irategeka yabwiye Rusesabagina mu mvugo yumvikanamo akababaro, ngo "Twe turi gushaka kohereza abahinzi mu murima wowe ukohereza amafaranga aho tutazi koko, urashaka gucamo ibice abahinzi ukoresheje amafaranga?"

Mu butumwa bumwe na bumwe, Rusesabagina hamwe n’abanyapolitiki n’abasirikare bakoreshaga imvugo zirimo "abahinzi", "amasuka" n’"imbuto".

Mu rukiko, Rusesabagina yasobanuye mu gihe cy’ibazwa ko ayo magambo-banga, iyo bavugaga abahinzi byabaga bisobanura abasirikare, amasuka zari imbunda, naho imbuto zikaba amasasu.

Nyuma yuko babonye ko ibitero byabo byahitanye inzirakarengane, ubuyobozi bwa MRCD-FLN bwarateranye, buvuga ko ibyo byaha bagomba kubyegeka kuri Leta y’u Rwanda.

Mu buhamya bwe, umutangabuhamya w’Ubushinjacyaha wanafashije mu ifatwa rya Paul Rusesabagina, ariko akaba yari inshuti ye, Musenyeri Niyomwungere Constantin, yavuze ko icyatumye ahindura imitekerereze akamuvamo, ari uko yabajije Rusesabagina niba aribo bishe abasivile mu bitero bagabye muri 2018/2019 nk’uko byatangajwe n’umuvugizi wabo Callixte Nsabimana.

Rusesabagina ngo yamusubije ko ikibazo atari urupfu rw’abaturage, ahubwo ko ikibazo ari Callixte Nsabimana wabyemeye ku mugaragaro.

Ibi kandi bisubirwamo n’abashyigikiye Paul Rusesabagina. Umwe mu bakobwa be usakuza cyane ko se ari umwere, Carine Kanimba, yavugiye ku mateleviziyo atandukanye ko ibyaha bashinja se byakozwe na Leta y’u Rwanda.

Nk’uko byagaragajwe n’ubutumwa bwa Whatsapp bwavuye muri telefoni za Rusesabagina, bugaragaza ko umunsi ku munsi yahabwaga amakuru y’ibitero bya FLN, hanyuma akababwira icyo bagomba gukora nk’umuyobozi wa MRCD-FLN.

Mu biganiro bagiranye tariki ya 17 Ukuboza 2018, Rusesabagina (wiyitaga Pas Besoin) yaganiraga na Innocent Twagiramungu, umunyamategeko wa MRCD-FLN, uburyo ibitero bigomba gutangazwa mu itangazamakuru.

Yagize ati “Amakuru mbonye mu kanya ava ku Kitabi, ni uko haguye kandi hakomerekeye abantu benshi! Imodoka zarashwe ngo ni Bus nini eshatu zitwara abantu ku buryo abapfuye n’abakomeretse ari benshi! Umwuka ntumeze neza abantu bahahamutse!!!!”

Arakomeza agira ati “ Njye ndasanga twabikora ku buryo bubiri; guceceka abahinzi bakikomereza gahunda zabo uko ziteguye tukajya tuvuga ari uko hatewe ibigo bya gisirikari cyangwa polisi cyangwa ibindi bikorwa bitaguyemo abasivile. Mu gihe haguyemo abasivile twavuga ko byakozwe n’inzego z’umutekano zo mu Rwanda ngo babitwitirire.”

Muri ibyo biganiro kandi, Rusesabagina na Twagiramungu basabye inama Esperance Mukashema, wari ushinzwe Radiyo Ubumwe yaterwaga inkunga na Rusesabagina, bamubaza uko babigenza.

Iri zina rya Mukashema ryagarutsweho kenshi mu rubanza. Mukashema yashyigikiye umugambi wo kubyegeka kuri Leta y’u Rwanda, ndetse ko bashaka undi muntu ubyemeza.

Mukashema wapfuye muri Nyakanga umwaka ushize, yavuzeko azifashisha BBC Gahuza na Radiyo Ijwi rya Amerika.

MRCD-FLN yatangijwe ari impuzamashyaka ihuriweho na CNRD-Ubwiyunge ya Gen Wilson Irategeka alias Rumbago, bikekwa ko yiciwe muri Congo, PDR Ihumure ya Paul Rusesabagina na RRM yashinzwe na Callixte Nsabimana alias Sankara.

Mu miterere y’aya mashyaka, abakuru bayo bagombaga kugenda basimburana ku buyobozi bwa MRCD/FLN. Ubwo ibitero byagabwe mu Rwanda byabaga, Rusesabagina ni we wari ufite ubuyobozi.

Rusesabagina yari yungirijwe na Callixte Nsabimana akaba n’umuvugizi w’igisirikare cya FLN, naho Gen Wilson Irategeka akaba visi perezida wa kabiri n’umuyobozi w’ingabo.

Nubwo hagaragajwe ibimenyetso byose bishoboka, nyuma y’ifungwa rya Rusesabagina, amajwi yabaye menshi asaba ko yarekurwa nk’utarakoze icyaha, kubera ko afunzwe mu buryo butemewe n’amategeko, ko ngo ari inzirakarengane.

Mu ruzinduko aheruka kugirira mu Rwanda, Umunyamabanga wa Leta zunze ubumwe za Amerika ushinzwe ububanyi n’amahanga, Antony Blinken, yahuye na Perezida Kagame, amusaba kurekura Rusesabagina.

Bamwe mu babisabaga banibwiraga ko azava i Kigali amutahanye mu ndege.

Byari bitangaje uburyo igihugu kivuga ko gikomeye muri demokarasi, gisaba ubutegetsi nyubahirizategeko, gutesha agaciro icyemezo cyafashwe n’ubucamanza.

Icyakora, na mbere y’uko Blinken agera mu Rwanda, Perezida Kagame yaje kwandika kuri Twitter ati "Ntibibatere impungenge…hari ibintu bidakora gutyo hano".

Ku wa 31 Kanama 2020 nibwo RIB yerekanye Paul Rusesabagina yambaye amapingu
Rusesabagina yari arinzwe bikomeye nk'umuntu ukekwaho ibyaha by'iterabwoba, cyane ko yemeraga uruhare rwe nk'umuyobozi
Abantu benshi bamenye ko Rusesabagina yafashwe ari uko yeretswe itangazamakuru
Rusesabagina yageze aho yivana mu rubanza, avuga ko atizeye ko azabona ubutabera
Nsabimana Sankara wari umuvugizi wa FLN ni umwe mu bantu 20 bareganwaga na Rusesabagina
Rusesabagina yagize uruhare mu gushaka uwo bagerekaho ibitero bagabye ku Kitabi
Rusesabagina na Twagiramungu basabye inama Esperance Mukashema mu gushaka uko batangaza ibitero byagabwe muri Nyungwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .