00:00:00 IGIHE NETWORK KN KINYARWANDA EN ENGLISH FR FRANCAIS

Nshimyumuremyi wayoboraga ’Rwanda Housing Authority’ yasabiwe gufungwa imyaka irindwi

Yanditswe na Akayezu Jean de Dieu
Kuya 20 Nzeri 2022 saa 02:27
Yasuwe :

Ubushinjacyaha bwasabiye igifungo cy’imyaka irindwi Nshimyumuremyi Félix wahoze ari Umuyobozi w’Ikigo cy’Igihugu gishinzwe Imyubakire, Rwanda Housing Authority: RHA, ushinjwa icyaha gusaba no kwakira ruswa.

Nshimyumuremyi ureganwa na Mugisha Alexis Emile bitabye Urukiko Rwisumbuye rwa Nyarugenge kuri uyu wa Kabiri tariki 20 Nzeri 2022. Bombi bakurikiranyweho ruswa y’asaga miliyoni 15Frw bari basabye umushoramari bari bemerewe isoko ry’imyubakire.

Nshimyumuremyi na mugenzi we Mugisha bombi bamaze igihe bafungiye by’agateganyo muri Gereza ya Nyarugenge, bitabye Urukiko Rwisumbuye rwa Nyarugenge bunganiwe n’abanyamategeko batanu.

Icyaha bakurikiranyweho gikomoka kuri Sosiyete yitwa See-Far Housing Ltd, ifite umushinga wo kubaka amazu aciriritse asaga 556 mu Kagari ka Kabeza, Umurenge wa Kanombe mu Karere ka Kicukiro.

Bitandukanye n’uko byagenze mu iburanisha ku ifungwa n’ifungurwa ry’agateganyo, kuri iyi nshuro Mugisha yaburanye ahakana ibyo aregwa byo kuba ariwe wari hagati y’uwatanze ruswa n’uwayakiriye.

Mugisha kandi yumvikanye ashinjura Nshyimyumuremyi avuga ko atigeze asaba cyangwa ngo yakire ruswa, ahubwo Kalisa [Sarongo] wari umukozi wa See-Far Housing ariwe wamuhaye amafaranga y’akazi yabakoreye nk’Umu-’Consultant’.

Ubushinjacyaha bwagaragarije urukiko ko Mugisha ariwe wafashije Nshimyumuremyi kwaka ruswa kuko ariwe wabahuje. Ibintu bwasobanuye ko yabaye umukomisiyoneri we.

Bwavuze ko mu ibazwa, Nshimyumuremyi yavuze ko we na Mugisha bari basanzwe bakorana mu kumushakira abashoramari baka ruswa.

Ni ibintu byakuruye impaka mu rukiko, abunganira Mugisha bavuga ko bitumvikana ko umukiliya wabo avugwa ko yari asanzwe ari umukomisiyoneri wa Nshimyumuremyi muri ruswa.

Ku rundi ruhande, Nshimyumuremyi yahakanye icyaha cya ruswa, avuga ko imiterere y’umushinga wa See-Far itashoboraga kumwemerera ko ayisaba ruswa cyane ko abayobozi bayo bandikiranaga nawe ubutumwa binyuze kuri za ‘Email’ kandi ubwo butumwa bugaragaza ko nta hantu yigeze abasaba ruswa.

Ku kuba hari umukozi wa See-Far witwa Eric Salongo Kalisa wagombaga gutanga iyo ruswa, Nshimyumuremyi yabwiye urukiko ko we n’uwo mukozi nta hantu bagombaga guhurira kuko we yavuganaga n’abayobozi bakuru b’iyi sosiyete.

Abunganira Nshimyumuremyi bagaragarije urukiko ko iyo ruswa itigeze igera mu ntoki z’umukiliya wabo kandi ko Ubugenzacyaha bwamutaye muri yombi niba bwari bwatahuye ko hari ruswa igiye gutangwa, bwagombaga kumureka akabanza akayakira, bityo agafatanwa igihanga.

Ubushinjacyaha bwasabye urukiko gutegeka ko bahamwa n’icyaha cya ruswa maze rugahanisha Nshimyumuremyi igifungo cy’imyaka irindwi n’ihazabu yikubye inshuro eshanu, amafaranga yari yasabye nka ruswa mu gihe Mugisha we yasabiwe igifungo cy’imyaka itandatu n’ihazabu yikubye inshuro eshatu ku mafaranga yari agiye kwakira nka ruswa.

Umucamanza wari uyoboye iburanisha yanzuye ko umwanzuro kuri uru rubanza uzasomwa saa munani zo ku wa 14 Ukwakira 2022.

Imiterere y’urubanza

Sosiyete ya See-Far Housing Ltd, yaje gushora imari mu Rwanda ifite umushinga wo kubaka amazu aciriritse asaga 556 mu Karere ka Kicukiro. Wari ufite agaciro ka Miliyari 30Frw ariko Leta y’u Rwanda nayo igafasha uwo mushinga kubaka ibikorwaremezo bifite agaciro ka 30% by’umushinga wose.

Ubushinjacyaha bwavuze ko Leya y’u Rwanda yemeye gukora ibikorwaremezo bifite agaciro ka Miliyari 8Frw kandi ko Rwanda Housing Authority ariyo yagombaga gutera inkunga uwo mushinga wo gushyira ibikorwa remezo ahazubakwa ayo macumbi aciriritse.

Buvuga kandi ko See-Far Housing yagiye igeza ubusabe bwayo ku Muyobozi wa Rwanda Housing Authority mu bihe bitandukanye kuva muri Nyakanga 2020 ngo ibyo Leta yemeye byubakwe, ariko Rwanda Housing Authority ntisubize ubwo busabe ikintu buvuga ko kigaragaza umugambi wo gushaka ruswa.

Muri Nzeri 2021, ngo iyo sosiyete yandikiye Rwanda Housing Authority iyimenyesha ko ibaye ihagaritse umushinga wo gusaba inkunga y’ibikorwaremezo bijyanye n’amacumbi aciriritse kuko babonaga ukurikije ibyo Leta yabasabaga bari guhomba, bitewe n’uko basabwaga ko mu mazu bazubaka 70% yayo azagurishwa ku giciro Leta izashyiraho cya 35,000,000Frw naho 30% yayo bakayagurisha ku giciro kiri ku isoko.

Nyuma y’uko sosiyete See Far Housing Authority ihagaritse umushinga, Mugisha Alexis Emile yaje kunyura aho ikorera ahasanga bamwe mu bakozi b’iyo sosiyete.

Mugisha Alexis Emile yabwiye Eric Salongo Kalisa ushinzwe ibikorwa bya See-Far Housing ko yamenye ko bamaze igihe kinini basaba ko Rwanda Housing Authority kubashyirira ibikorwaremezo ahagombaga kubakwa umushinga w’amazu aciriritse ariko bikaba byaranze kandi akaba yabibafashamo ngo kuko aziranye n’Umuyobozi w’icyo kigo.

Ubushinjacyaha bwavuze ko Mugisha Alexis Emile yabwiye uyu mukozi wa See-Far Housing ko nibemera ibyo abasaba ko nta kabuza ibikorwaremezo bigomba gushyirwa ahazubakwa ayo mazu aciriritse.

Ubushinjacyaha bwavuze ko igihe cyageze hakabaho inama yabereye muri imwe muri Hotel mu mujyi wa Kigali ngo banoza umugambi wa Ruswa wa 3%.

Buvuga ko Nshimyimuremyi Felix we yagombaga gufata Miliyoni 120Frw kuko ariwe wagombaga kwemeza ko igikorwa gitangira asigaye akagabanwa hagati ya Mugisha n’abantu babiri bamufashije bakora muri Sosiyete ya See-Far Housing.

Ubushinjacyaha bwavuze ko igihe cyageze ya Ruswa koko igatangwa aho umukozi wa See-Far Housing yahaye Mugisha Alexis Emile 15,000$ ariko akamubwira ko yari yatse abayozi be 20,000$ ariko amubwira ko yamaze gukuramo aye 5,000$.

Ubushinjacyaha bwavuze ko Mugisha Alexis Emile ubwo yafatwaga n’ubugenzacyaha ahagana saa tanu z’ijoro ataha ajya iwe Kabeza, yafatanywe Amadolari ibihumbi 10,900$, akavuga ko yari ayashyiriye Nshimiyumuremyi.

Ku ruhande rwa Nshimyumuremyi, kuva yatangira kuburana yagiye agaragariza urukiko ko nta ruswa yasabye ndetse nta n’iyo yafatanywe kuko amafaranga yasanganywe Mugisha, akabwira ubugenzacyaha ko yari ayashyiriye Nshimyumuremyi, ataribyo.

Ni mu gihe Mugisha we yabwiye urukiko ko amafaranga yahawe na See-Far atari aya ruswa ahubwo ari akazi yabakoreye nk’umuhanga uzi kugenzura imishinga [consultant], bityo adakwiye guhuzwa na ruswa nk’uko Ubushinjacyaha bubivuga.

Kuva mu ibazwa mu Bugenzacyaha no mu Bushinjacyaha yari yabyemeye, Mugisha kuri iyi nshuro yabihakanye avuga ko ibyo mu ibazwa bidakwiye guhabwa agaciro ahubwo urukiko rwasuzuma ibyo yavuze mu iburanisha ryo mu mizi.

Nshimyumuremyi (wa kabiri uhereye ibumoso) yahoze ari Umuyobozi wa Rwanda Housing Authority

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .