00:00:00 IGIHE NETWORK KN KINYARWANDA EN ENGLISH FR FRANCAIS

Ibintu bitanu byafasha Afurika kwigobotora ibibazo ifite mu mitangire ya serivisi z’ubuvuzi

Yanditswe na Muhonzire Sylvine
Kuya 22 Ugushyingo 2021 saa 11:10
Yasuwe :
0 0

Afurika niwo mugabane ufite serivisi z’ubuvuzi zikiri hasi ugereranyije n’indi migabane kuko usanga inkingo, imiti, ibikoresho byo kwa muganga, amavuriro, abaganga, abahanga mu bya laboratoire, abaforomo n’ababyaza hose ifite umubare muto.

Ishami ry’Umuryango w’Abibumbye ryita ku Buzima,OMS, rigaragaza ko muri Afurika yo munsi y’Ubutayu bwa Sahara, buri mwaka hapfa nibura abantu miliyoni 6 bazize kubura imiti ya Malaria, iy’igituntu ndetse n’igabanya ubukana bwa Virus itera Sida.

Uretse ubuke bw’imiti, Afurika iracyafite ibibazo byinshi mu buvuzi birimo umubare muto w’amavuriro atanga ubuvuzi bwizewe, abaganga b’inzobere badahagije, amazi make mu bigo nderabuzima, abaforomo bakora amasaha y’ikirenga kubera ko ari bake, ikoranabuhanga riri hasi, n’ibindi.

Nyamara bigaragara ko hashyizwemo ubushake, hari byinshi uyu mugabane wakwigezaho bitabaye ngombwa ko buri gihe utegera abandi amaboko mu gihe havutse ikibazo.

Ibi ni bimwe mu byagaragajwe nk’ibisubizo byafasha Afurika kuzamura urwego rwayo rw’ubuvuzi, ntihore yishingikirije ku yindi migabane.

Gushora imari mu kubaka inganda zikora imiti

Nubwo muri Afurika hari ibihugu bifite inganda zikora imiti birimo Afurika y’Epfo, Kenya, Maroc na Misiri, irenga 80% ikenerwa iva ku migabane yo hanze cyane muri Aziya, aho usanga hari ibihugu byinshi byo muri Afurika bitanga imiti igabanya ububabare ku barwayi kubera ko iyo kubavura indwara idahari.

Uharagariye Ikigo cy’Ababiligi gishinzwe iterambere, Enabel, mu Rwanda Dirk Deprez avuga ko amasezerano ashyiraho isoko rusange rya Afurika (AFCTA) ari amahirwe akomeye kuri ba rwiyemezamirimo kugira ngo bashore imari mu ikorwa ry’imiti.

Ati “Iyo tuvuga ku bashoramari duhita tureba n’inyungu zibirimo mu bijyanye n’ubukungu. Naratunguwe numvise ko 99% by’inkingo zikoreshwa muri Afurika ziva hanze yayo na 94% by’imiti. Ubushakashatsi bwa 2020 bwa Goldstein research bwagaragaje ko isoko ry’imiti muri Afurika rifite agaciro ka miliyali 28, 5$ kandi azikuba kabiri mu 2030.”

Deprez avuga ko ba rwiyemezamirimo bashoye imari mu nganda zikora imiti byababyarira inyungu, bikarokora ubuzima bw’abantu muri Afurika ndetse bigahesha akazi kenshi.

Umuyobozi w’Umuryango udaharanira inyungu wa Med Aditus, Dr Dhiren Thakker, wanayishinze yavuze ko muri Afurika hari ikibazo cy’imiti y’indwara zitandura nka diabète , cancer, indwara z’umutima, imiti y’abana ndetse n’imiti y’indwara zititaweho, aho agiye gushinga uruganda rukora iyi miti muri Afurika ahereye ku Rwanda na Kenya.

Ati “Twamaze gutangira ibiganiro ku itangizwa ry’izi nganda n’inyigo iri gukorwa ndetse twamaze kumenya ubwoko bw’imiti tuzakora. Igisigaye ubu ni ugushakisha igishoro gihagije yaba muri Leta Zunze Ubumwe za Amerika n’i Burayi ndetse no mu bihugu bya Afurika, ku buryo umwaka utaha wa 2022 uzarangira twatangiye.”

Ikoranabuhanga no guhanga udushya mu buvuzi

Ibi byagaragajwe ko bishobora kurokora inzego z’ubuvuzi muri Afurika, kuko byombi biramutse bishyizwemo ingufu byatuma imikorere mu buvuzi yoroha kandi ikagenda neza kurushaho yaba mu gupima indwara, kuzivura, kuzirinda no gutanga ubuvuzi bwiza kandi kuri bose.

Umuyobozi w’Ikigo cy’Igihugu gishinzwe Ubuzima, RBC, Dr. Sabin Nsanzimana yavuze ko guhanga udushya mu buvuzi ari ingenzi kuko uko imyaka ihita haza indwara nshya n’ibyorezo bishya bityo ko ibitabo abantu bakoreshaga mu 1999 bitakoreshwa mu 2021 havurwa indwara nshya.

Ati “Guhanga udushya kuri njye, ni ugushaka ibisubizo by’ibibazo biriho uyu munsi, kandi ntitwakabaye dukoresha ibisubizo bimwe igihe cyose, yego intego ishobora kuba imwe ariko uburyo dukoresha butadukanye n’ubw’indi migabane kuko uburyo bw’imibereho yacu buratandukanye.”

Umuyobozi w’umuryango mpuzamahanga utegamiye kuri leta, Partners in Health, mu Rwanda, Dr. Mubiligi Joel, yavuze ko ibitekerezo bishya no guhanga udushya bihari ahubwo habura kubigeza ku babikenewe cyane.

Yagize ati “Ikiremwamuntu ntabwo cyigeze kibura ibitekerezo, cyangwa ngo kibure guhanga udushya, ngira ngo twarabibonye mu buvumbuzi bwinshi bwakozwe yaba mu miti cyangwa ikoranabuhanga, ubu abantu basigaye bakorera ubukerarugendo mu isanzure. Icyatunaniye ni ugusangiza abandi ubwo bwenge, bukagera ku babukeneye cyane.”

Urugero rwiza rw’icyo guhanga udushya n’ikoranabuhanga bikora mu koroshya imitangire ya serivisi z’ubuzima ni Zipline, sosiyete itanga amaraso, imiti n’ibikoresho byo kwa muganga hifashishijwe utudege duto tutagira abapilote, (drones) bikagezwa ku bigonderabuzima n’amavuriro mu gihe gito.

Umuyobozi ushinzwe ibikorwa muri Zipline Rwanda, Sineka Samuel Siabnaa, yavuze ko icyo baharanira ari uko buri muturage aho ari hose abona ubuvuzi akeneye kandi bwiza.

Ati “Nko mu bihe bya Covid-19 ubwo abantu batabonaga uko bava mu ngo zabo, twagiranye ubufatanye na Partners in Health, dukoresha drones mu gutanga imiti ya Cancer ku barwayi aho baherereye hose bitabaye ngombwa ko bajya i Butaro. Twababazaga aho ibigo nderabuzima bibegereye biri, drones zikajyanayo imiti akaba ariho bayikura.”

Gushyira imbaraga mu burezi n’ubushakashatsi

Isi muri rusange ifite abaganga n’abaforomo bake ugereranyije n’abakenewe ariko muri Afurika yo munsi y’ubutayu bwa Sahara ho ni bake cyane kuko mu baturage 1000 haba hari abaganga 2.3 mu gihe OMS isaba ko nibura mu baturage igihumbi abaganga bake bagomba kuba ari 4.45.

Umuyobozi w’Ikigo Higher Health ukorera muri Afurika y’Epfo, Prof Ramneek Ahluwalia, yavuze ko uramutse ugereranyije indwara n’ibyorezo Afurika ifite n’izo iyindi migabane ifite usanga Afurika ifite umubare munini w’abarwayi ba Malaria, igituntu, VIH/SIDA, umubare munini w’abana bapfa bavuka n’ibindi.

Gusa wareba ku bijyanye n’uburezi, ubushakashatsi muri siyansi cyangwa imiti mishya ivuka, Afurika ikaza ku mwanya wa nyuma ku Isi.

Ati “Biragoye ko twazagera ku buvuzi bwiza bwemewe ku rwego rw’Isi mu gihe ntagikozwe kuri ibi, kuko twarabibonye neza mu gihe cya Covid-19, ubu turi kureba uko dushyiraho ingamba zo kwigobotora ibyo bibazo mu gihe ibindi bice by’Isi biri gutera imbere.”

Deprez wa Enabel we avuga ko ubuzima bwa bantu bukomeza kwangirika muri Afurika kubera ubushakashatsi buke.

Ati “Hari abaganga bavuga ngo indwara zititaweho ntawazishoramo amafaranga kuko zitunguka, ariko ndatekereza ko hakozwe ubushakashatsi kuri izi ndwara byazana igisubizo cy’iki kibazo kugira ngo izi ndwara zirwanywe.”

Yakomeje avuga ko hanakewe amahugurwa ku baganga no kubatanga serivisi z’ubuzima kugira ngo barusheho gutanga ubuvuzi bufite ireme.

Kongera isuku mu mavuriro no bigo nderabuzima

Covid-19 yatumye hagaragara ibigonderabuzima bitagiraga amazi ahagije ndetse n’amazi meza yo gukoresha. Isuku nke no kutagira amazi byaragajwe ko bituma umurwayi atakariza icyizere ivuriro n’ubuvuzi ahabwa, bikaba byamutera ihungabana ndetse bikamwongerera indwara zituruka ku isuku nke.

Umuyobozi wa WaterAid mu Rwanda, Kwizera Maurice, yavuze ko hari ibigo nderabuzima mu Rwanda biba bifite aho gukarabira h’umurimbo ku buryo iyo ugiye gufungura amazi usanga ‘robine’ yarumye nta mazi aherukamo, ndetse ugasanga hamwe hadafite aho gushyira imyanda hasukuye.

Yakomeje agira ati “Amazi, Isuku n’isukura ni inkingi ya mwamba kugira ngo ubuzima bugende neza, yaba ku bagana ibigo bitanga zerivisi z’ubuzima, haba no ku bakozi bakora muri serivisi z’ubuzima.”

“Covid-19 yasanze ku Isi muri rusange ikigo kimwe muri bine gitanga serivisi z’ubuzima kidafite amazi, kimwe muri bitatu nticyari gifite aho gukarabira intoki, mu gihe gikwiriye ni ukuvuga nko muri laboratoire, aho ababyeyi babyarira, n’ibindi, 10% ntabwo byari bifite ubwiherero bukwiriye.”

Kwizera avuga ko kuba iki cyorezo cyarasanze ibigo bitanga zerivizi z’ubuzima bidafite amazi ahagije ari ibintu abantu batakomeza kurebera, asaba ko guverinoma, abatanga inkunga n’abandi bafatanyabikorwa batandukanye bakwiriye kureba uko hakwihutishwa ishyirwaho ry’amazi, isuku n’isukura mu bigonderabuzima no mu bitaro byo hirya no hino ku Isi.

Ubufatanye bw’ibihugu n’ibigo bitegamiye kuri leta

Dr. Sabin Nsanzimana, yavuze ko ubufatanye ari cyo kintu cya mbere cyatumye u Rwanda rubasha kwitwara neza mu guhangana na covid-19, bityo ko hakenewe ubufatanye kugira ngo inzego z’ubuzima muri Afurika no ku Isi hose zibashe gutera imbere zihashye Covid-19 n’izindi ndwara zibasiye uyu mugabane.

Yagize ati “Ubu icyorezo kiracyahari ariko inkingo ntiziraboneka n’amafaranga yo kugura iziduhagije ntiharaboneka, ibi bigaragaraza ko ku Isi hakiri ikibazo mu bijyanye n’ubuzima ariko dukeneye gutera intambwe tukagafatanya kugira ngo tukirwanye kuko nacyo gisa nk’igikorera hamwe nk’itsinda.”

Avuga ko amwe mu masomo y’ingenzi iki cyorezo cyasigiye ibihugu n’abantu, harimo ubuyobozi bwiza bushyize hamwe ndetse n’ubufatanye kuko nk’u Rwanda kugira ngo rugire Laboratoire ya mbere ipima Covid-19 byaturutse mu bufatanye n’ibindi bihugu kuko nta bushobozi bwari bufite.

Hagaragajwe ko Afurika ikeneye gushyira imbaraga mu rwego rw'ubuvuzi kugira ngo inbashe guhangana n'inbyorezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .