00:00:00 IGIHE NETWORK KN KINYARWANDA EN ENGLISH FR FRANCAIS

MINISANTE yagabanyije iminsi y’akato ku banduye Covid-19 barikingije

Yanditswe na Thamimu Hakizimana
Kuya 11 Mutarama 2022 saa 02:45
Yasuwe :

Minisiteri y’ubuzima (Minisante) yavuze ko yagabanyije iminsi umuntu wanduye Covid-19 amara yarishyize mu kato iva ku minsi 10 ishyirwa ku minsi irindwi ariko ku muntu wafashe inkingo z’iki cyorezo mu buryo bwuzuye.

Umuvugizi wa Minisiteri y’ubuzima, Julien Mahoro Niyingabira, yabwiye IGIHE ko Leta yafashe iki cyemezo nyuma y’ubushakashatsi bwinshi bwagiye bukorwa.

Yagize ati “Ni icyemezo cyafashwe nyuma y’ubushakashatsi bwinshi bwagiye bukorwa bukagaragaza ko mu by’ukuri mu gihe cy’iminsi irindwi, hari n’abakoze ubushakashatsi ku rwego mpuzamahanga bavuze ko mu minsi nk’itanu umuntu yishyize mu kato ubucucike bwa virusi buba bwamaze kugabanuka mu mubiri we iyo yakingiwe.”

Yongeyeho ko iki cyemezo MINISANTE yagifashe cyane cyane ko bizwi ko iyo umuntu yakingiwe Covid-19 ataremba ngo azahare.

Ati “ Twe rero nk’igihugu twashyizeho iminsi irindwi kugira ngo byibuze twubahirize ya minsi itanu ubwo bushakashatsi kukobwagaragaje.”

Yagize ati “ Byumvikane ko uwo muntu biba atari ngombwa ko akomeza kwishyira mu kato ahubwo aba ashobora kujya mu zindi gahunda ariko agakomeza kubahiriza amabwiriza yo kwirinda nk’uko abandi bose bayubahiriza.”

Yahise asaba abantu bari mu kato bakunda gushaka gufatisha ibipimo bya covid-19 mbere y’uko barangiza iminsi yagenwe ko bitemewe kuko byashyirwa mu byago abandi.

Mu minsi irindwi ishize, imibare igaragaza ko abantu 7162 aribo basanzwemo Covid-19. Abagiye mu bitaro muri iyo minsi ni 73 barimo batandatu barembye.

Kugeza ubu abantu banduye Covid-19 barikingije bazajya basabwa kumara iminsi irindwi mu kato aho kuba icumi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .