00:00:00 IGIHE NETWORK KN KINYARWANDA EN ENGLISH FR FRANCAIS

Igiti cy’amayobera ku Kamonyi; gihora gitoshye kuva mu myaka isaga 600 ishize

Yanditswe na Kanamugire Emmanuel
Kuya 5 Mutarama 2022 saa 06:47
Yasuwe :

Cyahawe izina ry’Umuganzacyaro ryakomotse ku ntsinzi Abanyarwanda bakuye ku Banyoro, barugabyeho igitero ku ngoma y’Umwami Kigeli I Mukobanya hirindwa ko yazava aho yibagirana.

Uwo mwami yategetse u Rwanda hagati ya 1378 na 1411 ari na bwo ubwami bw’Ubunyoro bwagabye igitero gikomeye ku gihugu cye, giturutse hafi y’Ikiyaga cya Albert ku mupaka wa Uganda na Repubulika Iharanira Demokarasi by’ubu.

Abanyamateka bavuga ko Ubwami bw’Abanyoro buri mu bwari bukomeye muri iyo myaka yo hambere kandi ko bwagabye igitero ku Rwanda bugambiriye kunyaga inka bitewe n’uko izabo zari zaramazwe n’icyorezo.

Imirwano yabereye mu bice bimwe bya Kigali y’ubu kugeza ubwo Abanyoro batsimbura Abanyarwanda, urugamba ruhinaye babambuka Nyabarongo babakurikira kugera i Runda.

Aho urugamba rwa nyuma rwabereye, ubu ni mu Kagari ka Muganza, Umurenge wa Runda, Akarere ka Kamonyi, icyo gihe habarurirwaga muri Rukoma na Ndiza.

Niho Kigeli I Mukobanya yateye igiti cy’Umuganzacyaro cyo kwibutsa ko bahatsindiye Abanyoro. Mu Kinyarwanda cyo hambere ‘icyaro’ byasobanuraga igihugu cy’amahanga.

Iyo ntsinzi ni yo yatumye u Rwanda rwisubiza Umurwa Mukuru Kigali wari warigaruriwe n’Abanyoro, ingabo zabo zirukanwa ku musozi wa Mont Kigali. Amazina nka Nyamirambo (ahaguye Abanyoro benshi), Akumunigo n’ayandi bitewe n’ibyo bakorewe kimwe n’ibyababayeho bahunga.

Magingo aya icyo giti kiracyahari. Ucyitegereje ubona kimeze nk’ikinyeshyamba ariko izina ryacyo ‘Scientifique’ ntirizwi neza.

Ntambara Claude, utuye mu gace giherereyemo yabwiye IGIHE ko bagifata nk’igiti cy’amayobera bitewe n’uko bakibona ndetse n’ibikivugwaho kuva mu mateka yo hambere.

Ati “Nta rindi zina ryacyo rizwi keretse Umuganzacyaro. Ni igiti cy’amayobera bishoboka ko umwami yagitongereye mu gihe cyo kugitera. Nta wuzi aho cyaturutse. Twumvise ko abazungu bagiye bagisura bakagifotora bakajya muri pariki zitandukanye gushaka ibindi bimeze nka cyo ariko ngo byarabuze.”

Yakomeje ati “Imbuto zacyo ntizimera ngo habe haboneka ingemwe zacyo. Uretse ko ku ruhande rwacyo hameze ikindi bigaragara ko cyashibutse ku muzi ariko ntushobora kubona urugemwe rwacyo. No mu gihe cy’izuba ryinshi ntikijya cyuma ahubwo gihora gitohagiye nyamara ntikigira amazi nk’ay’umuyenzi cyangwa umukoni.”

Andi makuru atangwa n’abagituriye avuga ko amababi yacyo avamo imiti nk’uko byavuzwe n’umuvuzi gakondo (aherutse gupfa) ko yajyaga agikoresha avura amahumane.

Ikindi ni uko ngo hari abagifata nk’igitanga amahirwe nk’iyo bafite imanza mu nkiko bakizera ko kibafasha kuziburana neza no kuzitsinda. Ibyo bituma hari abitwaza udushami cyangwa amababi yacyo bagiye mu manza cyangwa bafite urugendo bikabarinda umwaku mu mayira.

Ntambara yavuze ko no mu gihe cy’urugamba rwo kubohora igihugu, Inkotanyi zanyuze ku Muganzacyaro ziturutse i Kigese (mu Murenge wa Rugalika) bikaba bifatwa ko muri aka gace zahatsindiye inzirabwoba.

Ati “Ni igiti kiri mu bintu byibutsa ubutwari bw’Abanyarwanda biri mu gihugu. Ikindi twumva mu mateka ni uko iyo Abanyarwanda bajyaga kugaba igitero, babanzaga kuza ku Muganzacyaro kuhashakira intsinzi.”

Abanyoro bongeye gutera u Rwanda bararuzengereza

Kigeli I Mukobanya amaze gutanga agasimburwa n’umuhungu we Mibambwe I Sekarongoro I Mutabazi, Abanyoro bongeye gutera u Rwanda, igitero kiyobowe n’uwitwa Cwa rya Nyabwongo.

Sekarongoro n’ingabo ze bahungiye inyuma y’ishyamba rya Nyungwe, Abanyoro babakurikirayo ariko baza kubiganzura babatsinda ruhenu.

Amateka avuga ko mu bashoboye kurokoka icumu rya Sekarongoro harimo abahisemo kuguma mu Rwanda biswe ‘Indara’ batemye amashyamba ahitwaga mu Buhangandara (uduce twa Gisagara na Nyaruguru by’ubu) n’Abasigi batuye mu duce tw’Intara y’Amajyaruguru (y’ubu) kubera ko bumvaga badafite inkuru bazabara nibagera iwabo.

Ibindi biti by’imitsindo i Runda

Bivugwa ko ku ngoma y’Umwami Yuhi IV Gahindiro watuye i Rubona rwa Gihara hatewe ibindi biti by’imitsindo bivanywe i Karagwe muri Tanzania.

Harimo icyitwa Umuganashya watewe ku Ruyenzi cyari kigamije kwirukana abanzi, ikindi cyitwa Umwamira giterwa i Rubona (Gihara) naho icyitwa Umunzenze giterwa hepfo gato ya Gihara cyari gifite umumaro wo kuzengereza abanzi b’u Rwanda.

Igiti cyahawe izina ry'Umuganzacyaro ryibutsa uko u Rwanda rwatsinze Abanyoro
Nta mubyimba munini iki giti gifite ugereranyije n'imyaka bivugwa ko kimaze gitewe
Amababi yacyo ngo yaba yifashishwa mu buvuzi nk'uko byasobanuwe na bamwe mu batuye mu gace giherereyemo
Mu myaka kimaze, iki giti ngo ntikijya cyuma nubwo haba mu gihe cy'impeshyi
Umuganzacyaro ni kimwe mu bintu bifatwa nk'ibiranga amateka y'ubutwari biri mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .